Itabija na Kufwija’ko—Pāna na Mutyima tō

YEHOVA, Tata wetu wa mūlu ne wa buswe, witutele mutyima umo ne umo. Kinenwa kya Leza kitukulupija amba utele bengidi bandi mutyima bya binebine. (1 Pet. 5:7) Muswelo umo ulombola Yehova amba witutele mutyima i na kwitukwasha mu miswelo palapala amba tumwingidile na kikōkeji. (Is. 48:17) Nakampata mu kitatyi kyotutanwa na makambakano aleta njia, Yehova usaka tumwene mu bukwashi bwaetupa. Bijila bya Mosesa bilombola buno bubinebine patōka.

Mu bino Bijila, Yehova wākwete mpangiko ya buswe ya kukwasha “mulanda,” pamo bwa mwana-nshiye, mukaji wa kishala, ne mweni. (Levi 19:9, 10; Kup. 14:29) Uyukile amba bengidi bandi bamo basakilwa kukwashibwa na batōtyi nabo. (Yak. 1:27) Nanshi, i kutupu mwingidi wandi ufwaninwe kupela bukwashi bwa bakwabo batononwa na Yehova kumukwasha. Kadi, kitatyi kyotwitabija bukwashi twitabije’bo na mutyima umo.

Inoko, Kinenwa kya Leza kilombola patōka amba bantu ba Leza nabo bafwaninwe kupāna. Vuluka mānga ya “mukaja-mufu mulanda” wāmwenwe na Yesu mu tempelo ya mu Yelusalema. (Luka 21:1-4) Mobimwekela wāmwenine mu mpangiko ya Yehova ya kukwasha bakaji ba bafu itelelwe mu Bijila. Aye’ko, nansha byaādi mulanda, uno mukaja-mufu ukivulukwa bu muntu wāpēne, ke bu muntu wātambwilepo, mhm. Mutyima wandi wa kupāna wādi wa kumupa nsangaji mwanda Yesu wānene amba: “Dyese dya kupana ditabukile dya kupebwa.” (Bil. 20:35) Byowayuka buno bubinebine, le i muswelo’ka ‘okekala kupāna’po’ ne kumona dyese dilupuka’mo?—Luka 6:38.

“Lelo Kyo Nkamupa Yehova” I Kika?

Mulembi wa mitōto wēipangwile amba: “Lelo kyo nkamupa Yehova, mwanda wa byabuntu byandi byonso kudi ami, i kika?” (Mit. 116:12) Le i byabuntu’ka byaātambwile? Yehova wāmukweshe mu kitatyi kya “tusua ne njia.” Kadi, Yehova ‘wanyongolwele muya wandi ku lufu.’ O mwanda, wādi usaka ‘kupa’ Yehova bintu kampanda. Lelo mulembi wa mitōto wādi wa kumupa bika? Wānene amba: “Nkafute byampiko byami kudi Yehova.” (Mit. 116:3, 4, 8, 10-14) Wādi usumininwe kulama mpiko yandi yonso yaāpikile kudi Yehova ne kuvuija mbila yandi.

Nobe ukokeja kulongela monka. Namani? Na kulonda bijila ne misoñanya ya Leza mu būmi bobe bonso. Shi ke pano, longa bukomo bobe bonso, mutōtelo wa Yehova wikale nyeke pa kifuko kibajinji mu bobe būmi, ne kadi mushipiditu wa Leza ukwendeje mu byonso byolonga. (Mus. 12:13; Ngat. 5:16-18) Kunena na bubine, kukokejapo kufuta Yehova pa mwanda wa byonso byakulongela. Inoko ‘mutyima wa Yehova ukasangala’ shi ukumona wipāna na mutyima tō mu mwingilo wandi. (Nk. 27:11) Bine, i dyese dya kutendelwa pa kusangaja Yehova uno muswelo!

 Bweja ku Nsangaji ya Kipwilo

Na bubine, uketabija amba umwenanga mu kipwilo kya Bwine Kidishitu mu miswelo mivule. Yehova uletanga byakudya bya ku mushipiditu bivule kupityila ku kipwilo. Wi muyuke bubinebine bwakukūdile mu bubela bwa bipwilo ne fukutu ya ku mushipiditu. (Yoa. 8:32) Ku kupwila, ku kubungakana, ne ku bitango biteakanibwe na “umpika wa binebine, udi na manwa” watambwile’ko buyuki butwala ku būmi bwa nyeke mu paladisa pano pa ntanda mwampikwa misongo ne masusu. (Mat. 24:45-47) Le ubwanya kubala byabuyabuya byonso byomwenine—ne byokamwena—mu kipwilo kya Leza? Penepa i bika byokafuta kipwilo pa bino byonso?

Mutumibwa Polo wāsonekele amba: “Ngitu yonsololo ībalamankanibwa pamo, ne kulungakanibwa biyampe, senene, shē, ku kyokya kipana bilungwalungwa byonso, monka mo bilongela abyo byonso, aki ne kitūngo kyakyo, aki ne kitūngo kyakyo, kyenda kibaīja ngitu ne kwitamijija ayo mīne monka mu lusa.” (Ef. 4:15, 16) Nansha kino kisonekwa byokisambila dibajinji pa Bene Kidishitu bashingwe māni, musoñanya udi’mo utala ne Bene Kidishitu bonso dyalelo. Eyo, umo ne umo mu kipwilo ubwejanga ku nsangaji ne kutama kwa kipwilo. Mu miswelo’ka?

I na kulonga bukomo bwa kwikala muntu ukankamika ne usenga bakwabo ku mushipiditu kyaba kyonso. (Loma 14:19) Kadi tukokeja kubweja ku ‘kubaya kwa ngitu’ na kutamija kipa kya mushipiditu wa Leza mu byonso byotulongela bakwetu betabije. (Ngat. 5:22, 23) Kadi tukokeja kukimba mikenga ya kulonga “biyampe ku bakwetu bonso, ino ku boba badi mu kipango kya kwitabija bo bene.” (Ngat. 6:10; Bah. 13:16) Yense mu kipwilo—tutu ne kaka, mwanuke ne mutame—ukokeja ‘kutamija ngitu monka mu buswe.’

Ne kadi, tubwanya kwingidija bwino, bukomo, ne bituntwa byetu mwanda wa kwingila mwingilo upelwe kipwilo wa kupandija būmi bwa bantu. Yesu Kidishitu wānene amba: “Umbatambula’byo bitupu.” Le tulonge’po namani? “Nenu kebapei byo bitupu,” mo mwaānenene. (Mat. 10:8) Nanshi, wipāne mu uno mwingilo wa kamweno wa kusapula Bulopwe ne kulonga bana ba bwanga. (Mat. 24:14; 28:19, 20) Lelo bukomo bobe bwa kusapula i butyetye? Vuluka mukaja mufu mulanda wātelelwe na Yesu. Twawāpēne twādi tutyetyetyetye. Inoko Yesu wānene amba wapite bonso bakwabo’ba. Wāletele byonso byaadi ukokeja kupāna mungya ngikadilo yandi.—2 Kod. 8:1-5, 12.

Tambula ne Mutyima Umo

Inoko, kudi bitatyi byokokeja kusakilwa bukwashi butamba ku kipwilo. Kokolwa kupela bukwashi bo-bonso bukupa kipwilo polwa na mitabakano ya ino ngikadilo ya bintu. Yehova witupele bana-balume babwanye bisakibwa ne ba kilelo ba “kudisha kipwilo kya Leza”—kukukwasha potanwa na matompo ne byamalwa. (Bil. 20:28) Bakulumpe ne banabetu bakwabo mu kipwilo bakimba kukusenga, kukukwasha, ne kukukinga mu bitatyi bya byamalwa.—Ngat. 6:2; 1 Tes. 5:14.

Nanshi ta mutyima amba kitatyi kyopebwa buno bukwashi, tambula’bo na mutyima umo. Itabija nyeke ne kwikala na mutyima wa kufwija’ko popebwa buno bukwashi. Mona bukwashi bukupa banabenu betabije bu kilomboji kya buntu bwa Leza. (1 Pet. 4:10) Mwanda waka kino i kya mvubu? Mwanda ketusakilepo kwibutambula na mutambwilanga bavule mu ino ntanda—pampikwa kufwija’ko.

Ikala na Bujalale ne Mutyima Unekena

Polo wāsonekele mu mukanda wandi ku Bene Fidipai pa mwanda utala Temote  amba: “Nkidipo ne mukwabo wa mutyima pamo na wandi wakwimubanga binebine bilumbuluke pa myanda yenu, mhm.” Ebiya Polo wabweja’ko amba: “Bonso bēsakilanga byonka byābo bene, bya Yesu Kidishitu mpika.” (Fid. 2:20, 21) Shi tulange pa buno bujinguludi busumininwe bwa Polo, i muswelo’ka otukokeja kuleka kwisakila ‘byonka bya batwe bene’ dyalelo?

Ketufwaninwepo kwikala na kaninga-mpo potulomba banabetu mu kipwilo betute mutyima ne kitatyi kya kwitukwasha mu makambakano etu. Mwanda waka? Langa’po bidi: Ketukabulwepo kufwija’ko bininge shi tutu wetukwasha na bintu kampanda bya ku ngitu mwa kupwijija mwanda wa kibozo. Ino lelo tukamuningila amba enka etupe’byo? Mhm, nansha dimo! Mo monka nansha banabetu baswe byobekalanga nyeke na nsangaji ya kwitukwasha, ino tufwaninwe kwikala na bujalale ne na mutyima unekena pa byotwibalomba ne kitatyi kyotwibadīla. Le kadi, byonso bilonga banabetu betabije mwanda wa kwitukwasha mu bitatyi bya byamalwa, tusakanga balonge’byo na mutyima tō.

Bine ne bine ponka, batutu ne bakaka Bene Kidishitu batengele ne babilanga nyeke kukukwasha. Inoko, kyaba kimo bakakomenwa kukupa byonso byosaka. Shi bibaikala namino, nabya kulupila amba Yehova ukakukwasha mu matompo o-onso akufikila, monka mwaakwashishe mulembi wa mitōto.—Mit. 116:1, 2; Fid. 4:10-13.

Shi ke pano, kokitatana kwitabija na kufwija’ko byonsololo bikulongela Yehova—nakampata mu bitatyi bya tusua ne makambakano. (Mit. 55:22) Usaka witabije’byo. Ino usaka kadi wikale “wakupana ne mutyima, tō.” Nanshi, ‘kanina mu mutyima obe’ kupāna mungya ngikadilo yobe mwanda wa kukwatakanya mutōtelo wa bine. (2 Kod. 9:6, 7) Nabya ukamona muswelo wa—kwitabija na kufwija’ko ne kupāna na mutyima tō.

[Kapango/Kifwatulo pa paje 32]

“Lelo kyo nkamupa Yehova, mwanda wa byabuntu byandi byonso kudi ami, i kika?”—Mit. 116:12

▪ Kimba mikenga ya kulonga “biyampe ku bakwetu bonso”

▪ Ikala muntu ukankamika ne usenga bakwabo ku mushipiditu

▪ Wipāne mu mwingilo wa kulonga bana ba bwanga mungya ngikadilo yodi’mo