Tukwita na Nsangaji Wiye Utanwe’ko

PADI kodi mupityile pa Njibo ya Bulopwe ya Batumoni ba Yehova ya mu kyenu kibundi ne kwiipangula’mba i bika byobalonga’mo. Lelo uyukile amba bantu bonso babwanya kutanwa mu kupwila kwabo kwa yenga ne yenga? Beni batundailwanga’ko na nsangaji.

Inoko, padi wiipangulanga bipangujo kampanda na bino. Mwanda waka Batumoni ba Yehova babungakenanga pamo? Lelo i bika bipitanga ku kuno kupwila? Ne i bika binenanga boba bampikwa kwikala Batumoni ba Yehova pa bitala kuno kupwila?

“Ukabungakanya Bidi Bantu’ba”

Tamba myaka ya kala, bantu bādi babungakena pamo mwanda wa kutōta Leza ne kwifunda myanda yandi. Ke kupite kintu kya myaka 3 500, pālombwelwe Bene Isalela amba: “Ukabungakanya bidi bantu’ba, bana-balume ne bana-bakaji ne twana’twa, ne mweni obe udi munda mwa bipango byobe, amba bevwane, kadi amba balombolwe, ne kwakamwa Yehova Leza wenu, ne kutentekela kulonga binenwa byonso bya uno mukanda-wabijila uno’u.” (Kupituluka 31:12) O mwanda, mu Isalela, bantu bonso, bana ne batame bādi bafundijibwa mwa kutōtela Yehova Leza ne kumukōkela.

Myaka tutwa pa kupita’po, pokwāikele kipwilo kya Bwine Kidishitu, kupwila kwādi nyeke kulēmekibwa bikata mu butōtyi bwa bine. Mutumibwa Polo wāsonekele amba: “Twitei mityima bātwe bene na bene ya pa kwisombela ku lusa ne mīngilo miyampe; ne kuleka’byo kubungakana mpika, pamo na muswelo wa bamobamo, poso kwikwasha bātwe bene.” (Bahebelu 10:24, 25) Monka muningilanga kipwano kya ba kisaka kimo shi bashikatyila kitatyi kilampe pamo, mo monka muningilanga kipwano kya buswe kya boba bengidila Leza kitatyi kitana Bene Kidishitu pamo mu butōtyi.

Mungya binenwe mu Bisonekwa bitelelwe kūlu’ku, Batumoni ba Yehova babungakenanga pamo misunsa ibidi ku yenga mu abo Mobo a Bulopwe. Kupwila kukwashanga boba batanwa’ko bakwate na mutyika misoñanya ya mu Bible, kwiivwanija senene, ne kwiilonda. Popa pobikokejika, mpangiko ikalanga imo yonka ntanda yonso, kadi kupwila ne kupwila kwikalanga na kitungo kyakyo kya ku mushipiditu. Kumeso kwa kupwila ne pa kupwa, boba batanwa’ko bamwenanga mu “kwikankamika” kwa umo ku mukwabo kupityila ku mīsambo yūbaka. (Loma 1:12) Lelo i bika bipitanga ku kupwila ne kupwila?

Mwisambo Wimanine pa Bible

Kupwila kutanwanga’ko bantu bavule musunsa wabo umbajinji i kwa mwisambo wimanine pa Bible utala bantu bonso, kuloñwanga ku mfulo kwa yenga. Divule, Yesu Kidishitu wādi wisamba kumeso a bantu bonso—kubadila’mo ne mwisambo mutumbe wa Bufundiji bwa ku Lūlu. (Mateo 5:1; 7:28, 29) Mutumibwa Polo wēsambile kumeso a Bene Atene. (Bilongwa 17:22-34) Kupwila kwa Batumoni ba Yehova nako kulondanga bino bimfwa, kwikalanga mīsambo itala nakampata bantu bonso, kubadila’mo ne boba baya kutanwa’ko musunsa wabo mubajinji.

Kupwila kushilulanga na lwimbo lwa mu dibuku Imbai Mitendelo Kudi Yehova. * Bonso baswile, bakankamikwanga kwimana ne kwimba kya pamo. Kupwa milombelo mīpi, muneni umo wa bwino wanena mwisambo wa minite 30. (Tala kapango “Mīsambo ya Kamweno ku Bantu Bonso.”) Mwisambo wa muneni wimaninanga pa Bible. Pavule pene, muneni witanga bemvwaniki bapūtule bisonekwa bya  kwibakwasha ne kumulonda patanga mavese. O mwanda, i biyampe nobe upaye Bible obe, nansha kulomba Kamoni wa Yehova umo akupe’ko Bible kumeso kwa kushilula kupwila.

Kifundwa kya Kiteba kya Mulami

Mu bipwilo bivule bya Batumoni ba Yehova, pa kupwa dishikulu dya bantu bonso, kulondanga Kifundwa kya Kiteba kya Mulami mu nsaa umo, i kishinte kya bipangujo ne malondololo kimanine pa Bible. Kuno kupwila kukankamikanga boba batanwa’ko balonde kimfwa kya Bene Belea ba mu mafuku a Polo, bāikele “kusepelela mwanda ne mutyima onka wa lubilo, ke basakesake mu bisonekwa.”—Bilongwa 17:11.

Kifundwa kya Kiteba kya Mulami kishilulanga na lwimbo. Myanda ifundwa ne bipangujo bipangulwa na mwendeji bidi mu Kiteba kya Mulami. Ukokeja kulomba Kamoni wa Yehova umo akupe’kyo. Mu bishinte byefundilwe mafuku a kunyuma mubadilwa ne bino: “Bambutwile—Fundijai Benu Bana na Buswe,” “Kekulubwila Muntu Bubi na Bubi,” ne “Kinenenwa Amba Masusu Onsololo Asa Kupwa’nka Panō.” Nansha kuno kupwila byo kwikalanga na bipangujo ne malondololo, kebaningilangapo bantu kulondolola; kadi divule boba balondolola bekalanga batange kala kishinte ne kulangulukila pa bisonekwa bikwatañene nakyo. Kupwila kufulanga na lwimbo ne milombelo.—Mateo 26:30; Efisesa 5:19.

Kifundwa kya Bible kya Kipwilo

Batumoni ba Yehova babungakananga monka kyolwa musunsa umo pa yenga ku Njibo ya Bulopwe mwanda wa mpangiko ya kupwila kusatu iloñanga nsaa 1 ne minite 45. Mpangiko imbajinji i ya Kifundwa kya Bible kya Kipwilo, kiloñanga minite 25. Kikwashanga boba batanwa’ko bayuke senene myanda ya mu Bible, bashinte milangwe ne ngikadilo yabo, ne kwalamuka  kusakilwa bana ba bwanga ba Kidishitu. (2 Temote 3:16, 17) Ino mpangiko ya kupwila imanine pa Bible ipityijibwanga na bipangujo ne malondololo pamo bwa Kifundwa kya Kiteba kya Mulami. Boba balondolola balondololanga na mutyima tō. Myanda ibandaulwa mu kifundwa kya Bible ilupulwanga mu kitabo nansha boloshile ulupwilwe na Batumoni ba Yehova.

Mwanda waka dibuku disambila pa Bible dingidijibwanga ku kupwila? Vuluka myaka isekunwinwe mu Bible, Kinenwa kya Leza kekyādipo kitangwa’nka bitupu. Bādi “balombola mungya mwanda’wa; enka namino’u baivwanija kutangwa kwao.” (Nehemia 8:8) Mu myaka yapityile’i, mabuku ashintulula mukanda wa Isaya, wa Danyele ne wa Kusokwelwa akweshe boba batanwa ku kuno kupwila bevwanije bino bipindi bya mu Bible.

Masomo a Mwingilo wa Kiteokratike

Kupwa Kifundwa kya Bible kya Kipwilo kwikalanga Masomo a Mwingilo wa Kiteokratike. Kuno kupwila kwa minite 30 kukwashanga Bene Kidishitu batamije bwino bwa “kufundija.” (2 Temote 4:2) Kimfwa, le obe mwana nansha mulunda nobe kakwipangwilepo kashā kipangujo kitala Leza nansha Bible kikomo kulondolola? Masomo a Mwingilo wa Kiteokratike akokeja kukufundija mwa kulondolwela ku bipangujo bikomo na malondololo a mu Bible akankamika. O mwanda tukokeja kunena na mwānenene mupolofeto Isaya amba: “Mfumwetu Leza wampe ludimi bwa boba balombojibwe, amba ndyuke mwakukankamijija na binenwa yewa mukōke.”—Isaya 50:4.

Masomo a Mwingilo wa Kiteokratike ashilulanga na mwisambo wimanine pa kipindi kya mu Bible kilombwelwe kala bemvwaniki batange mu yenga’wa. Kupwa uno mwisambo, muneni ukanena bemvwaniki banene mu kīpi myanda yobamwene bu ya kamweno mu butangi bwa Bible. Kupwa uno mwisambo, bana ba masomo belembeje ku ano masomo bakanena bipindi bibapelwe.

Bana ba masomo bapebwanga kutanga kipindi kampanda kya mu Bible ku lukala nansha kulombola mwa kufundijija myanda ya mu  Bisonekwa ku bantu bakwabo. Kupwa kipindi ne kipindi, mudingidi wa bwino ufwijanga’ko mwana masomo pa byalongele biyampe, mungya kitabo kya masomo Mwena Byabuyabuya mu Masomo a Mwingilo wa Kiteokratike. Kupwa, ukadingila mwana masomo pa bunka bwandi pa byakokeja kulemununa.

Ino mpangiko ya bipindi bīpi bīpi ikwashanga mwana masomo ne bemvwaniki bonso basaka kwikala batangi bayampe, baneni, ne bafundiji ba bwino. Kupwa Masomo a Mwingilo wa Kiteokratike, kwimbwanga lwimbo lwimanine mu kisonekwa kampanda lwa kushilula nalo Kupwila kwa Mingilo.

Kupwila kwa Mingilo

Kipindi kya mfulo ku ino mpangiko i Kupwila kwa Mingilo. Bemvwaniki befundanga mwa kufundijija senene bubinebine bwa mu Bible kupityila ku bipindi binenwa, bya kumwena’ko, bwipangudi ne mīsambo na bemvwaniki. Yesu wābungile pamo bandi bana ba bwanga ne kwibalombola mwa kukalongela kumeso kwa kwibatuma mu busapudi. (Luka 10:1-16) Pa kupwa kwibateakanya senene mwa kukasapwila myanda miyampe, bākemwenine’mo myanda mivule isangaja. Kupwa balondi ba Yesu bājokela kwadi ne kumulombola mobyāpityile. (Luka 10:17) Divule bana ba bwanga bādi besapwila abo bene na bene myanda yobemwenine.—Bilongwa 4:23; 15:4.

Mpangiko ya Kupwila kwa Mingilo iloñanga minite 35 ikalanga ku papye ulupukanga kweji ne kweji witwa bu Mwingilo Wetu wa Bulopwe. Kimfwa, mafuku a munyuma, twabandawile ino mitwe ya myanda: “Kutōta Yehova mu Kisaka,” “Kine Kyotujokela’mo Enka Kujokela,” “Iula Kidishitu mu Mwingilo Obe.” Kuno kupwila kufulanga na lwimbo, kupwa, tutu umo mu kipwilo wapebwa kulombela milombelo ya mfulo.

Binenanga Beni Bāya’ko

Bipwilo biloñanga buninge bwa kutundaila bantu bonso biyampe. Kimfwa, André, wadi wivwaninanga Batumoni ba Yehova enka myanda mibimibi. Ino musunsa mubajinji waafikile ku kupwila, watulumukile muswelo obamulubwile’ko. André mwine unena’mba: “Kyokya i kifuko kya nsangaji kifwaninwe kwikala. Natulumukile mpata pa kumona muswelo wadi unta bantu mutyima, badi pamo’nka bwa balunda.” Ashel, nsongwakaji wa mu Kanada, unena’mba: “Bine, kupwila kwansangeje’po kashā! Kwadi kwivwanika biyampe.”

José, wikalanga mu Brezile, wadi muyukane mu kibundi bu muntu wa bikandangobo. Nansha nabya, waityilwe kutanwa ku kupwila ku Njibo ya Bulopwe ya mu kyabo kibundi. Atsushi, wa mu Jampani, uvuluka’mba: “Ndyukile biyampe amba ponakapwidile musunsa umbajinji na Batumoni ba Yehova, nadi neivwana’tu bingi. Inoko, namwene’mba nanshi i bantu’tu bayampe. Bankweshe neivwana biyampe.”

Tukwita Nobe Utanwe’ko

Monka mobyapwa kala kulombolwa’mu, kupwila ku Njibo ya Bulopwe i kintu kiyampe’po kasha. Ukayuka Leza, kadi kupityila ku bufundiji bwa mu Bible bobakakufundija’ko, Yehova ukakulombola “kakumwenamo.”—Isaya 48:17.

Mu kupwila kwa Batumoni ba Yehova mutwelwanga ku bitupu, kekudipo mukongo wa lupeto. Mwene i biyampe nobe ukatanwe ku kupwila kwabo ku Njibo ya Bulopwe ya mu kyenu kibundi? Tukwita na nsangaji nobe ukatanwe’ko.

[Kunshi kwa dyani]

[Kapango pa paje 30]

Mīsambo ya Kamweno ku Bantu Bonso

Mīsambo imanine pa Bible itoñwanga mu mitwe ya myanda mishileshile 170 ne musubu, kubadila’mo ne ino:

◼Kuyuka Kutambile Bantu—Le Kudi na Mwanda pa Byoitabije?

◼Mulangwe wa Leza Utala pa Busongi ne pa Kusambakena Pamo

◼Konakanya Ntanda Kukaleta Mfuto ya Leza

◼Muswelo wa Kunekenya Milangwe ya Kuzumbijazumbija Mutyima Umbūmi

◼Byonso Lelo Bifudila’nka pa Buno Būmi Buno?

[Kifwatulo pa paje 30]

Mwisambo wimanine pa Bible

[Kifwatulo pa paje 30]

Kifundwa kya “Kiteba kya Mulami”

[Kifwatulo pa paje 31]

Kifundwa kya Bible kya Kipwilo

[Kifwatulo pa paje 31]

Masomo a Mwingilo wa Kiteokratike

[Kifwatulo pa paje 32]

Kupwila kwa Mingilo