Boba “Badi mu Ngikadilo Mifwaninwe” Betabanga

“Boba bonso badi mu ngikadilo mifwaninwe kukamona būmi bwa nyeke baitabija.”—BIL. 13:48, New World Translation.

1, 2. Le Bene Kidishitu babajinji bāitabile namani ku bupolofeto bwānene Yesu amba myanda miyampe ifwaninwe kusapulwa pano pa ntanda ponso?

 MUKANDA wa mu Bible wa Bilongwa ulamine lusango lusangaja lulombola mwāitabile Bene Kidishitu babajinji ku bupolofeto bwānene Yesu amba myanda miyampe ya Bulopwe ifwaninwe kusapulwa pano pa ntanda ponso. (Mat. 24:14) Basapudi bapyasakane bāikele bu batulombwe ba boba bonso bādi ba kwibalonda. O mwanda bana ba bwanga ba Yesu pa kusapula mu Yelusalema, bantu tununu ne tununu, kubadila’mo ne “kitango kikatampe kīne kya bapidishitu,” bātetukila mu kipwilo.—Bil. 2:41; 4:4; 6:7.

² Bamishonele babajinjibajinji bākweshe bantu bavule balonde Bwine Kidishitu. Kimfwa bidi Fidipa, wāendele mu Samadia, kwādi bibumbo byātele mutyima ku binenwa byandi. (Bil. 8:5-8) Polo wāendele ñendo kuntu kuvule pamo na bapwani nandi, wenda usapula musapu wa Bwine Kidishitu mu Saipusa, mu bibundi bya mu Azia Minele, mu Masedonya, mu Ngidiki, ne mu Itadi. Mu bibundi mwaādi usapula, Bayuda ne Bangidiki bavule bene bāitabije’mo. (Bil. 14:1; 16:5; 17:4) Tetusa wāingile mwingilo wandi mu Kelete. (Tet. 1:5) Petelo aye wādi wikwete’ko na mingilo mu Babiloni, kadi mu kitatyi kyaālembele mukanda wandi umbajinji, kubwipi na mwaka wa 62-64 K.K., mwingilo wa Bene Kidishitu wādi muyukane biyampe mu Pontyusa, Ngalatea, Kapodosa, Asha, ne mu Bityinia. (1 Pet. 1:1; 5:13) Bine, byobya byādi bitatyi bya kuloelelwa kashā! Boba basapudi Bene Kidishitu byobādi bapyasakane kutabuka, bāfikije’nka ne balwana nabo ku kwibeta bu “bakufulamuna panopantanda.”—Bil. 17:6; 28:22.

3. I bipa’ka byangulwa na basapudi ba Bulopwe dyalelo mu mingilo ya busapudi, ne kino kibakupe bika ku mutyima?

³ Mu ino yetu myaka namo, kipwilo kya Bwine Kidishitu kyendelelanga kumeso bya binebine. Mwene ukankamikwanga pa kutanga lapolo wa ku mwaka ne mwaka wa Batumoni ba Yehova ne pa kumona bipa byangulwa kujokoloka ntanda yonso? Mwene wivwananga nsangaji ku mutyima pa kuyuka’mba basapudi ba Bulopwe baendeje bifundwa bya Bible midiyo isamba ne musubu mu mwaka wa mingilo wa 2007? Kadi, kibalwa kya batenwe ku Kivulukilo kya lufu lwa Yesu Kidishitu mwaka wadi’mo kilombola’mba kintu kya bantu midiyo dikumi ke Batumonipo ba Yehova basangedile myanda miyampe senene, baiya kutanwa ku kino kitatyi kikatampe kya kuvuluka. Kino kilombola’mba kukidi mingilo mivule ya kwingila.

4. I bāni betabijanga musapu wa Bulopwe?

⁴ Pamo’nka na mu myaka katwa kabajinji, “boba bonso badi mu ngikadilo mifwaninwe kukamona būmi bwa nyeke” betabijanga musapu wa bubinebine. (Bil. 13:48, NW) Yehova  ukokelanga bantu ba uno muswelo mu bulongolodi bwandi. (Tanga Hakai 2:7.) Le tufwaninwe kumona nyeke mwingilo wa Bwine Kidishitu namani mwa kwingidila ne pa mfulo uno mwingilo wa kukongakanya bantu?

Sapula Pampikwa Mboloji

5. Le i bantu ba muswelo’ka betabijibwa na Yehova?

⁵ Bene Kidishitu ba mu myaka katwa kabajinji bājingulwile amba “Leza kalemekangapo bantu’mba: Yeu ye yeu, mhm. Nanshi mu mizo yonso enka umutyina, ulonga bilumbuluke nabya ye waitabijibwa kudi aye.” (Bil. 10:34, 35) Lwitabijo lwa muntu mu kitapwa kya kikūlwa kya Yesu lo lwādi lulombola shi upwene na Yehova. (Yoa. 3:16, 36) Ino Yehova “usakila bantu bonso kupanda, bafike ne pa kuyūkidija kwa binebine.”—1 Tem. 2:3, 4.

6. Basapudi ba Bulopwe bafwaninwe kwijiba ku bika, ne mwanda waka?

⁶ Ke biyampepo basapudi ba myanda miyampe bashilule kubōlola bantu na kulonda misaka, bitenta, mumwekelo, bipwilo, nansha bintu bikwabo. Leka bidi: Mwene ufwijanga’ko pa kumona’mba muntu wābadikile kwisamba nobe bubinebine bwa mu Bisonekwa kādipo na mboloji kodi? Penepo kyowikakila kusapwila muntu ye-yense ukokeja kwivwana musapu ubwanya kumupa būmi i kika?—Tanga Mateo 7:12.

7. Mwanda waka tufwaninwe kuleka kutyibila boba botusapwila mambo?

⁷ Yehova i mutonge Yesu bu Mutyibi; nanshi batwe ketupelwepo kishima kya kutyibila muntu ye-yense mambo. Kino i kyendele’mo, mwanda ketudipo bwa Yesu—tukokeja kutyibila bantu butyibi na “mwendele kutala kwa meso” etu nansha “mwendele kūmvwana kwa matwi” etu, ino Yesu aye ubwanya kuyuka milangwe ya mu nkulwe mwa mutyima wa muntu.—Is. 11:1-5; 2 Tem. 4:1.

8, 9. (a) e Solo wādi muntu wa muswelo’ka kumeso kwa kwikala Mwine Kidishitu? (b) Le i ñeni’ka yotufwaninwe kuboila ku kimfwa kya mutumibwa Polo?

⁸ Bantu ba miswelo palapala bālamukanga ke bengidi ba Yehova. Kimfwa kimo kiyukene i kya Solo wa Tasusa, wāyukene mwenda mafuku bu mutumibwa Polo. Solo, paādi Mufadiseo, wādi ulondalonda Bene Kidishitu pampikwa kafuku. Kusumininwa kwaādi usumininwe na mutyima umo amba ke batōtyi ba binepo kwāmulengeje apangepange kipwilo kya Bwine Kidishitu. (Ngat. 1:13) Mungya mumweno wa bu muntu, wādi umweka bu muntu kabwanyapo nansha dimo kwikala Mwine Kidishitu pamo bwa bantu bakwabo batyetye. Ino Yesu wāmwene kintu kiyampe mu mutyima wa Solo, penepo wāmutonga engile mwingilo wa pa bula. Kupwa, Solo wābadilwa mu bantu ba bupyasakane kupita bonso mu kipwilo kya Bwine Kidishitu kya mu myaka katwa kabajinji.

⁹ Le i ñeni’ka yotuboila ku būmi bwa mutumibwa Polo? Mu mwaba wetu mudi padi bantu kampanda bamweka bu bapela musapu otusapula. Nansha byobikokeja padi kumweka’mba mu abo’ba kemukatambepo Bene Kidishitu ba bine, ketufwaninwepo kuleka’byo kulanguluka nabo. Kyaba kimo, enka ne bantu bamweka bu bakolakane betabijanga. Mwingilo wetu i wa kwendelela na kusapwila bonso ‘kuleka’byo mpika.’—Tanga Bilongwa 5:42.

Madyese Atengele Boba Basapula ‘Kuleka’byo Mpika’

10. Mwanda waka ketufwaninwepo kwikaka kusapwila bantu bamweka bu balenga moyo? Sekununa myanda mimweke ya kwenu.

¹⁰ Mumwekelo wa panja keo kudimbañana. Kimfwa, Ignacio * wāshilwile kwifunda Bible na Batumoni ba Yehova aye papo mu kifungo mu  ntanda imo ya mu Amerika wa Kunshi. Wadi utyinwa mwanda kadipo ufunkwa munwe wakoka’o. Pa kino, bakwabo ba mu kifungo badi bapunga bintu ne kupoteja’byo, badi basela Ignacio pa kukalandula mapu a boba badi na bukokonyongo bwa kufuta. Ino Ignacio pa kwendelela ku mushipiditu ne kulonda byaadi wifunda, aye wadi kipalapala waikala ke muntu muyampe. I kutupu kadi wadi umwita kukalandula mapu, inoko Ignacio usangele pa kuyuka’mba bubinebine bwa mu Bible ne mushipiditu wa Leza bibaalamuna bumuntu bwandi. Kadi ufwijanga’ko mpata basapudi ba Bulopwe bampikwa mboloji balongele buninge bwa kwifunda nandi.

11. Mwanda waka tupempulanga bantu divulevule?

¹¹ Bubinga bumo botujokelajokela kumona bantu botusapwidile kala myanda miyampe i buno: ngikadilo yobadi’mo ne mulangilo wabo bikokeja kushinta ne i bine bishintanga. Tamba potwishiya nabo, bamo bakokeja kubela misongo mikatampe, kujimija twaji, ne kufwilwa baswe babo. (Tanga Musapudi 9:11.) Myanda ipita mu ino ntanda ikokeja kulanguluja bantu pa bitala būmi bwabo kwa kumeso. Bino byonso bikokeja kufikija muntu wadi bidi ñumauma—pakwabo upela’tu patōkelela—ku kuteja biyampe. Nanshi ketufwaninwepo kwikaka kusapwila bantu myanda miyampe ponso potumona mukenga muyampe.

12. I muswelo’ka otufwaninwe kumona bantu botusapwila ne mwanda waka?

¹² Pano bantu kebadi na mushipiditu wa kusañuna bantu ne kwibatyibila mambo. Ino Yehova umonanga umo ne umo pa bula. Umonanga biyampe bidi mu muntu ne muntu. (Tanga 1 Samwele 16:7.) Netu tufwaninwe kwielela’ko kulongela monka mu mwingilo wetu. Myanda mivule mimweke ilombola’mba kumona biyampe boba botusapwila kulupulanga bipa biyampe.

13, 14. (a) Mwanda waka pania umo wamwene bingi mwana-mukaji waetene nandi mu busapudi? (b) I ñeni’ka yotuboila ku uno mwanda mumweke?

¹³ Sandra, kaka pania, wadi utambila mu busapudi bwa ku njibo ne njibo pa kisanga kimo kya mu Karaibe, penepo wetana na Ruth, wadi mwipāne bininge mu buimba ne maja a pa masobo etwa bu karnavale. Ruth wapelwe dibidi dituntulu kitenta kya bu mulopwe-mukaji wa karnavale mu ntanda yabo yonso. Nansha nankyo watele mutyima bininge ku byobya byadi binena Sandra, ponka’po belaya kushilula kwifunda Bible. Sandra uvuluka’mba: “Ponadi mpita mu pitapita yandi, namwene foto mikatampe ya Ruth uvwele bivwalwa bya muneñenya bya pa masobo a karnavale kadi ne bikombe byaadi ke mutambule. Papo nalanga kala bya bubela amba muntu mutumbe namino kadi mwipāne mu masobo a karnavale kabwanyapo nansha dimo kuta mutyima ku bubinebine. Penepo naleka’byo kumupempula.”

¹⁴ Kitatyi kampanda pa kupita’po, Ruth waiya ku Njibo ya Bulopwe, kadi kupwila pa kupwa, waipangula Sandra amba, “Kyowalekela kwiya kwifunda nami i kika?” Sandra walomba lusa ne kwilaya belaya monka kwifunda. Ruth waendelela bukidi, wapulula ne bifwatulo byandi bya masobo a karnavale, washilula kwingila mingilo yonso ya kipwilo, ne kupāna wapāna būmi bwandi kudi Yehova. Bine, Sandra waitabije mwenda mafuku amba mumweno wandi umbajinji wadi mufwe.

15, 16. (a) I bipa’ka byalupukile paikele kamoni umo kusapwila wa mu kisaka kyabo? (b) Mwanda waka bibidiji bilonda muntu wa mu kisaka kyetu kebifwaninwepo kwitutyumuna mutyima wa kumusapwila?

¹⁵ Bipa biyampe bikwabo bimonwanga na boba basapwila ba mu bisaka byabo bampikwa kwitabija, nansha ke boba bamweka bu kebabwanyapo kwitabija. Tala bidi kimfwa kya Joyce, kaka Mwine Kidishitu wa mu États-Unis. Bukwe bwandi mwana-mulume wadi ukutwakutwa tamba busongwalume bwandi. Joyce unena’mba: “Bantu badi banena’mba būmi bwandi kebwadipo na mvubu nansha dimo, mwanda wadi wikwete’ko na kutoma madyamba, kwiba, ne kulonga bintu bikwabo bibi. Nansha nankyo, ami nkyadipo nonda byabo, ino nadi musapwila nyeke bubinebine bwa mu Bible myaka 37 mituntulu.” Joyce waeselwe bikata pangala pa bukomo bwandi mwanda bukwe bwandi washilwile kwifunda Bible na Batumoni ba Yehova ne kushinta bya binebine mu būmi bwandi. Mafuku a munyuma, bukwe bwandi wabatyijibwe ku  kitango kya distrike mu Kaliforni, États-Unis, aye papo na myaka 50. Joyce unena’mba: “Nadidile impolo ya nsangaji. Ndi musepelele kashā mwanda nkyalekelepo nansha dimo kumusapwila!”

¹⁶ Padi ukokeja kwikaka kwisamba na babutule myanda ya mu Bible pa mwanda wa bibidiji byabo byobalonda. Ino Joyce kadipo na mutyima wa kwikaka kwisamba na bukwe bwandi. I amo, le abe ukokeja namani kuyuka byobya bidi mu mutyima wa muntu? Padi muntu oleka kusapwila’wa ye ukimba na mutyima umo bubinebine bwa mu Bible. Nanshi kokekaka kumupa mukenga wa kwibutana.—Tanga Nkindi 3:27.

Kingidilwa Kiyampe Kwifunda Nakyo Bible

17, 18. (a) Malapolo atamba pi na pi pano pa ntanda alombola namani mvubu ya dibuku Lelo I Bika Bine Bifundija Bible? (b) I myanda’ka ikankamika yokodi mwimwene pa kwingidija dino dibuku?

¹⁷ Malapolo atamba mu matanda palapala kujokoloka ntanda yonso alombola amba bantu bavule ba mityima miyampe basangelanga kwifunda Bible na kingidilwa Lelo I Bika Bine Bifundija Bible? Penni, kaka pania mu États-Unis, washilwile bifundwa bivule na dino dibuku. Bifundwa bibidi byadi bya bantu bepāne bininge mu bipwilo byabo. Penni wadi utatana amba padi kebasapo kwitabija bubinebine bwa mu Bisonekwa budi mu dibuku Bifundija Bible. Ino ulemba’mba: “Pa mwanda wa milangwe yadyo ilombwelwe mu muswelo upēla, muluji, kadi mupotoloke, bano bantu baitabije bukidi bonka byobadi befunda amba i bubinebine, pampikwa lupata ne lupotopoto lwine.”

¹⁸ Pat, musapudi wa mu Beletanye, washilwile kwifunda Bible na mwana-mukaji lefije utambile mu ntanda ya Azia. Uno lolo wanyemene mu yabo ntanda mwanda basola bantomboki bakwete wandi mulume ne bandi bana bana-balume bajimina lonso. Būmi bwandi bwaikala mu kyaka, njibo yandi yasokwa, aye mwine walālwa ku bukomo. Byonso bino byamulengeja emone bu muntu kafwaninwe kwikala mūmi, penepo kalanga misunsa mivule kwiipaya. Ino kifundwa kya Bible kyamupa lukulupilo. Pat ulemba’mba: “Bushintuludi bupēla ne bifwatulo bidi mu dibuku Bifundija Bible byamutengele bya binebine.” Uno mwifundi waendelele bukidibukidi, wabwanya bisakibwa bya kwikala musapudi wakubulwa kubatyijibwa, ne kulombola walombola’mba usaka kubatyijibwa ku kubungakana kwiya’ko. Bine, kukwasha bantu ba mityima miyampe bevwanije ne kukwata makasa abidi lukulupilo lwitupelwe mu Bisonekwa kuletanga nsangaji kashā!

“Ketukikōkai mu Kulonga Bilumbuluke”

19. Mwanda waka mwingilo wa busapudi i wa kupēlakana nao?

¹⁹ Difuku ne difuku dipita, mwingilo wetu wa kusapula ne kulonga bana ba bwanga nao wikalanga ke wa kupēlakana nao. Bantu tununu ne tununu badi mu ngikadilo mifwaninwe betabanga ku busapudi bwetu mwaka ne mwaka. Ino “difuku dikatakata dya Yehova didi pabwipi,” ko kunena’mba boba bakidi mu fukutu ya ku mushipiditu “basaka kwipaibwa.”—Zef. 1:14; Nk. 24:11.

20. Le batwe bonso umo ne umo tufwaninwe kusumininwa kulonga bika?

²⁰ Pano’ko bidi tukokeja kukwasha bano bantu. Ino pa kwibakwasha, i kipite buya twiule Bene Kidishitu ba mu myaka katwa kabajinji bādi “mafuku onso, kuleka’byo kufundija mpika, kusapula bya Yesu.” (Bil. 5:42) Londa kimfwa kyabo na kutakamana nansha shi utanwa na makambakano, na kuta mutyima ku ‘bwino bobe bwa kufundija,’ ne na kusapwila bantu bonso pampikwa amba yeu ye yeu! “Ketukikōkai mu kulonga bilumbuluke,” mwanda shi tutakamane, tukangula madyese a ntanda ne miseke a kwitabijibwa na Leza.—2 Tem. 4:2; tanga Ngalatea 6:9.

[Kunshi kwa dyani]

Usa Kulondolola Namani?

• Le i bāni betabanga ku myanda miyampe?

• Mwanda waka ketufwaninwepo kubadikila kutyibila botusapwila mambo?

• I bipa’ka bimonwa pa kwingidija dibuku Lelo I Bika Bine Bifundija Bible?

[Bipangujo bya Kifundwa]

[Kifwatulo pa paje 17]

Bantu ba mityima miyampe tununu ne tununu betabanga