1. Le bengidi ba Yehova i beshile namani na boba betela bu bene Kidishitu?

 KINTU kimo bidi kishiyañanyanga bengidi ba Yehova na boba betela bu bene Kidishitu i bupyasakane bwabo mu busapudi. (Tet. 2:14) Inoko kyaba kimo, ubwanya kukomenwa kusangela kwenda mu busapudi. Padi ubwanya kwiivwana mweivwanine mukulumpe umo nkanka wanenene amba, “Kyaba kimo, nkikalangapo’tu na mutyima wa kutambila mu busapudi.”

2. Le i bika bibwanya kulengeja kyaba kimo tukomenwe kulama bupyasakane bwetu mu busapudi?

² Tubwanya kusangela bininge kwingila mingilo mikwabo ikola kutabuka’ko kutambila mu busapudi. Mwanda waka? Mwanda kitatyi kyotubaka Mobo a Bulopwe ne kwialongolola, kyotukwasha ku mwingilo wa kuleta bukwashi mu bitatyi bya bimpengele nansha kukankamika banabetu, twimwenanga kiponka na ponka byabuyabuya bilupuka’ko kadi kino kituletelanga nsangaji. Kitatyi kyotwingila na batutu ne bakaka twingilanga mu ndoe ne kwilombola buswe batwe bene na bene. Kadi tuyukile amba batutu ne bakaka bafwijanga’ko pa byotwibalongela. Inoko padi tusapulanga mu bula bwa myaka mivule mu mwaba umo onka ino bantu batyetye kete bo betabija musapu. Nansha padi tubwanya kwitana na bantu bapela musapu wetu. Kadi tuyukile amba mfulo byoyenda ifwena pabwipi, musapu wetu ubwanya kupelwa na bantu bavule. (Mat. 10:22) Le i bika bibwanya kwitukwasha tulame nyeke bupyasakane bwetu mu busapudi nansha kwibuvudijija’ko?

3. Le i bika byotwifunda pa bupyasakane bwa Yesu ku kyelekejo kidi mu Luka 13:​6-9?

³ Tubwanya kwikala na bupyasakane mu mwingilo wetu wa busapudi na kubandaula kimfwa kya Yesu. Mu bula bwa mwingilo wandi, kātyepejepo bupyasakane bwandi. Ino mu kupita kwa kitatyi, po pene wāvudijije’ko bupyasakane. (Tanga Luka 13: 6-9.) Pamo bwa mwingidi wa mu budimi bwa mañanza wākwatakenye kikuyu mu bula bwa myaka isatu ino kupa kipa nansha kimo mpika, Yesu nandi wāsapwidile Bayuda mu bula bwa myaka isatu, ino bavule kebāmutejejepo. Inoko, pamo’nka bwa mwingidi wa mu budimi bwa kikuyu wāendelele kukulupila’mba kikuyu kikapa bipa, Yesu nandi kālekele’byopo kusapwila bantu kadi kātyepejepo bupyasakane bwandi mu busapudi. Ino aye po pene wālongedile’ko bukomo bwa kutenga mityima yabo.

4. Le i bintu’ka biná byotubwanya kwifunda kudi Yesu?

⁴ Mu kino kishinte, tusa kwisambila’mo pa muswelo wālombwele Yesu bupyasakane, nakampata mu myeji isamba ya mfulo ya mwingilo wandi. (Tala bilembwa bya kwifunda bya mu Falanse “Après cela” mu Luka 10:1.) Kwifunda bintu byaāfundije ne kwiula byobya byaālongele kuketukwasha twikale nyeke bapyasakane dyalelo. Shi ke pano, tubandaulei’ko bintu biná byotubwanya kwifunda kudi Yesu: (1) Wātele mutyima ku kiswa-mutyima kya Yehova, (2) wātele mutyima ku bupolofeto bwa mu Bible, (3) wākulupile mu bukwashi bwa Yehova, ne (4) wākulupile nyeke amba bantu bamo bakamuteja.

WĀTELE MUTYIMA KU KISWA-MUTYIMA KYA YEHOVA

5. Le Yesu wālombwele namani amba wādi utele mutyima ku kulonga kiswa-mutyima kya Leza?

⁵ Yesu wāsapwile na bupyasakane “myanda miyampe ya Bulopwe” mwanda wādi uyukile amba o mwingilo wādi umusakila Leza kwingila. (Luka 4:43) Yesu wātūdile mwingilo wa busapudi pa kifuko kibajinji mu bwandi būmi. Enka ne dya ku mfulo kwa mwingilo wandi, wādi wenda “mu kibundi ne kibundi, kikatampe ne kityetye,” ufundija bantu bakwabo. (Luka 13:22) Kadi wāfundije bana ba bwanga bavule basapule nandi pamo.—Luka 10:1.

6. Le mwingilo wa busapudi ukwatañene namani na mingilo mikwabo ya kiteokratike yotubwanya kwingila? (Tala ne kifwatulo.)

⁶ Ne dyalelo, kusapula myanda miyampe o mwingilo mubajinji witusakila ba Yehova ne Yesu kwingila. (Mat. 24:14; 28:​19, 20) Kudi kukwatañana kukatampe pa bukata bwa mwingilo wa busapudi na mingilo mikwabo ya kiteokratike. Kimfwa, tubakanga mobo a  kiteokratike nansha kwingila ku Betele mwanda wa kukwatakanya bisakibwa bya mu mwaba. Tukwatakanyanga mwingilo wa kuleta bukwashi ke enkapo’tu mwanda wa kukwasha batutu ne bakaka kete, ino i ne mwanda wa kwibakwasha bajokele ku bibidiji byabo bya ku mushipiditu, mwine mubadilwa ne kusapula. Shi twivwanije mvubu ya mwingilo wa busapudi ne kwivwanija’mba o mwingilo mukatampe witusakila Yehova kwingila, kino kiketulengeja tusapule kitatyi ne kitatyi. János, mukulumpe wa mu Hongri unena’mba, “Mvulukanga’mba kekudipo mwingilo nansha umo wa kiteokratike ubwanya kupingakena mwingilo wa busapudi; busapudi o mwingilo wetu mubajinji.”

7. Mwanda waka Yehova usakanga twendelele kusapula? (1 Temote 2:​3, 4)

⁷ Tubwanya kuvudijija’ko bupyasakane bwetu mu busapudi na kumona bantu mwibamwena Yehova. Aye usakanga bantu bavule bevwane myanda miyampe ne kwiitabija. (Tanga 1 Temote 2:​3, 4.) O mwanda witufundijanga tulumbulule muswelo otwisamba na bantu, ke-pantu musapu wetu i upandija būmi. Kimfwa, boloshile Sanswa Bantu—Ulonge Bana ba Bwanga witupa madingi mapotoloke abwanya kwitukwasha tushilule mīsambo na kitungo kya kulonga bana ba bwanga. Nansha shi bantu kebashilwilepo kwingidila Yehova pano, babwanya kwikala na mukenga wa kulonga namino kumeso kwa kyamalwa kikatampe kufula. Bintu byotwibasapwila pano padi byo bikebakwasha bengidile Yehova mu mafuku a kumeso. Inoko, kino kibwanya kulongeka enka shi twendelele kusapula.

WĀTELE MUTYIMA KU BUPOLOFETO BWA MU BIBLE

8. Le kuyuka bupolofeto bwa mu Bible kwākweshe namani Yesu engidije biyampe kitatyi kyandi?

⁸ Yesu wādi wivwanije muswelo ukafikidila bupolofeto bwa mu Bible. Wāyukile amba mwingilo wandi ukalonga’tu myaka isatu ne kipindi. (Dan. 9:​26, 27) Kadi wāyukile bintu byālailwe pangala pa kitatyi kyakafwa ne muswelo wakafwa. (Luka 18:​31-34) Yesu wālekele bintu byaādi uyukile bimukwashe engidije biyampe kitatyi kyandi. O mwanda wāsapwile na bupyasakane mwanda wa kuvuija mwingilo waāpelwe.

9. Mwanda waka bupolofeto bwa mu Bible bwitutononanga tusapule na bupyasakane?

⁹ Kwivwanija kwetu kwa bupolofeto bwa mu Bible kubwanya kwitutonona tusapule na bupyasakane. Bible wālaile binkumenkume ne kulombola mukekadila bantu mu mafuku a mfulo, ne bino ye byotwimwena bilongeka pano. Tumonanga kwilwa kudi pa bukata bwa Umbikalo wa Ntanda wa Angeletele-Amerika ne Rusi pamo ne boba bamukukīle, mokufikidijija bupolofeto butala mulopwe wa kunshi ne wa kungala “mu kitatyi kya ku mfulo.” (Dan. 11:40) Kadi twivwanije amba Umbikalo wa Ntanda wa Angeletele-Amerika i mwelekejibwe na binyantyilo bya nkishi utelelwe mu Danyele 2:​43-45. Tukulupile amba monka mulombwela’kyo bupolofeto, panopano ponka—bine panopano ponka—Bulopwe bwa Leza busa konakanya maludiki a bantu. Buno bupolofeto bonso bulombola’mba tudi bine ku mfulo ya ino ngikadilo ya bintu, o mwanda tufwaninwe kusapula myanda miyampe na kampeja-bukidi.

10. Le i mu miswelo’ka mikwabo mubwanya kwitukwasha bupolofeto bwa mu Bible tuvudijije’ko bupyasakane bwetu?

¹⁰ Kadi bupolofeto bwa mu Bible bwitupanga musapu otusakanga kusapula na kipyupyu. Kaka Carrie wingidilanga mu Repiblike Dominikene unena’mba, “Milao ya Yehova ikunka mutyima ya būmi bulumbuluke bwa kumeso intononanga nsapwile bantu bakwabo bubine.” Ubweja’ko amba: “Pomona makambakano ekonda na bantu dyalelo, jingululanga’mba  ino milao keintalepo enka ami kete ino ibatala ne abo.” Bupolofeto bwa mu Bible bwitukankamikanga twendelele kusapula, mwanda tuyukile amba Yehova witukwashanga twingile uno mwingilo. Leila ushikatanga mu Hongri unena’mba: “Isaya 11:​6-9 unengejanga nsapwile myanda miyampe nansha ke boba bamweka bu kebabwanyapo kwiitabija. Ndyukile amba muntu yense ubwanya kushinta na bukwashi bwa Yehova.” Kadi Christopher, tutu wa mu Zambia unena’mba: “Monka mwālaile’kyo Mako 13:​10, myanda miyampe i misambakane ntanda yonso, kadi monanga’mba i dyese dikatampe kondi kukwasha’ko ku kufikidija buno bupolofeto.” Le i bupolofeto’ka bwa mu Bible bukutonona wendelele kusapula?

WĀKULUPILE MU BUKWASHI BWA YEHOVA

11. Mwanda waka Yesu wādi unenwe kukulupila mu bukwashi bwa Yehova pa kwendelela kusapula na bupyasakane? (Luka 12:​49, 53)

¹¹ Yesu wākulupile mu bukwashi bwa Yehova pa kwendelela kusapula na bupyasakane. Nansha Yesu byaādi wisamba na bunwa, wāyukile amba myanda miyampe ya Bulopwe ikaleta mushikwa ne kulwibwa kukatampe. (Tanga Luka 12:​49, 53.) Yesu byaādi usapula, bendeji ba bipwilo bāsakile misunsa mivule kumwipaya. (Yoa. 8:59; 10:​31, 39) Inoko Yesu wāendelele kusapula, mwanda wādi uyukile amba Yehova udi nandi. Wānenene amba: “Nkidipo bunka, aa, ino Tata wantumine udi nami. . . . Kandekelepo bunka bwami, mwanda noñanga kyaba kyonso bimusangaja.”—Yoa. 8:​16, 29.

12. Le Yesu wāteakenye namani bandi bana ba bwanga bendelele kusapula kitatyi kyobalwibwa?

¹² Yesu wāvulwije bandi bana ba bwanga’mba bafwaninwe kukulupila mu bukwashi bwa Yehova. Wēbakulupije misunsa mivule amba Yehova ukebakwasha nansha ke kitatyi kyobapangwapangwa. (Mat. 10:​18-20; Luka 12:​11, 12) Yesu byaāyukile amba bantu bavule bakalwa myanda miyampe, wālombwele bandi bana ba bwanga bekale bakosoke. (Mat. 10:16; Luka 10:3) Yesu wēbalombwele baleke kuningila bantu kebasakepo kuteja musapu wabo. (Luka 10:​10, 11) Kadi wēbalombwele banyeme shi kebebapangapanga. (Mat. 10:23) Nansha Yesu byaādi mupyasakane kadi mukulupile mudi Yehova, kādipo witūla mu kyaka bya bituputupu.—Yoa. 11:​53, 54.

13. Mwanda waka ubwanya kukulupila’mba Yehova ukakukwasha?

¹³ Dyalelo tusakilwa bukwashi bwa Yehova pa kwendelela kusapula na bupyasakane kitatyi  kyobetulwa. (Kus. 12:17) Mwanda waka ubwanya kukulupila’mba Yehova ukakukwasha? Tubandaulei’ko milombelo ya Yesu idi mu Yoano shapita wa 17. Yesu wālombele Yehova alame batumibwa bandi. Kadi Yehova wālondolwele ino milombelo. Mukanda wa Bilongwa ulombola Yehova mwaākwashishe batumibwa basapule na bupyasakane nansha byokwādi kupangwapangwa. Kadi mu milombelo yandi, Yesu wālombele’mo Yehova alame boba bakalombola lwitabijo mu busapudi bwa batumibwa. Mu bano’ba mubadilwa ne abe. Yehova wendelelanga kulondolola milombelo ya Yesu. Nobe ukakukwasha monka mwaākwashishe batumibwa.—Yoa. 17:​11, 15, 20.

14. Mwanda waka tubwanya kukulupila’mba tukokeja kwendelela kusapula na bupyasakane? (Tala ne kifwatulo.)

¹⁴ Nansha byobibwanya kwikala bikomo bininge kusapula myanda miyampe na bupyasakane pano penda pafwena mfulo, tukatambula bukwashi bonso botusakilwa. (Luka 21:​12-15) Pamo bwa Yesu ne bandi bana ba bwanga, tulekanga bantu batonge kuteja nansha kuleka kuteja kadi ketwipotomejangapo nabo. Nansha shi mwingilo wetu ubatūdilwa mikalo, batutu ne bakaka bendelelanga kusapula myanda miyampe mwanda bakulupile mudi Yehova, ke mu bukomopo bwabo. Monka mwāpedile Yehova bukomo bengidi bandi ba mu myaka katwa kabajinji, mo mwaetupelanga’bo ne dyalelo amba “busapudi busapulwe ne pa mfulo” muswidile mutyima wandi. (2 Tm. 4:17) Yuka’mba shi ukulupile mudi Yehova, ukendelela nyeke kusapula na bupyasakane.

WĀKULUPILE NYEKE AMBA BANTU BAMO BAKAMUTEJA

15. Le i bika bilombola’mba Yesu wāendelele kukulupila’mba busapudi bwandi bukalupula bipa biyampe?

¹⁵ Yesu wāendelele kukulupila’mba bantu bamo bakateja myanda miyampe. Kino kyāmukweshe alame bupyasakane mu busapudi. Kimfwa, dya ku mfulo kwa mwaka wa 30 Y.M., Yesu wāmwene bantu bavule bādi basaka kuteja myanda miyampe, wēbadingakanya na madimi ke mafikile pa kitatyi kya kwangula. (Yoa. 4:35) Kintu kya mwaka umo pa kupita’po, wāsapwila bandi bana ba bwanga’mba: “Mwangulo i mukatampe.” (Mat. 9:​37, 38) Kadi mwenda mafuku wākomeneje monka amba: “Mwangulo i mukatampe . . . Abijai Mwinē mwangulo atume  bengidi mu mwangulo wandi.” (Luka 10:2) Yesu wāendelele kukulupila’mba kukekala bantu bakateja myanda miyampe, kadi wāsangele pobālongele namino.—Luka 10:21.

16. Le byelekejo bya Yesu bilombola namani mumweno muyampe waādi nao pa mwingilo wa busapudi? (Luka 13:​18-21) (Tala ne kifwatulo.)

¹⁶ Yesu wāfundije bandi bana ba bwanga bekale nyeke na mumweno muyampe pa musapu wabo, mwine wādi wa kwibakankamika balame nyeke bupyasakane. Kimfwa, tubandaulei’ko byelekejo byandi bibidi. (Tanga Luka 13:​18-21.) Yesu wāingidije luze lwa mutade mwanda wa kufundija’mba musapu wa Bulopwe ukasambakana mu muswelo wa kutendelwa ne amba i kutupu ukabwanya kwimika kutanta kwao. Kadi wāingidije kiyujo mwanda wa kwelekeja muswelo ukasambakana bininge musapu wa Bulopwe ne kulengeja kushinta kwine kekubwanyapo kumweka na meso kiponka na ponka. Mu uno muswelo, Yesu wākweshe bandi bana ba bwanga bamone amba musapu obādi basapula ukakwasha bantu bavule.

17. Le i bubinga’ka botudi nabo bwa kulama nyeke mumweno muyampe pa mwingilo wa busapudi?

¹⁷ Bine, tukankamikwanga kwendelela kusapula na bupyasakane kitatyi kyotulangulukila pa muswelo ukwasha mwingilo wa busapudi bantu bavule ntanda yonso. Mwaka ne mwaka, bantu midiyo ne midiyo basangela musapu batanwanga ku Kivulukilo ne kwifunda netu Bible. Bantu tununu ne tununu babatyijibwanga ne kwilunga netu mu mwingilo wa busapudi. Ketuyukilepo buvule bwa bantu baketaba ku mwingilo wetu wa busapudi, inoko tuyukile amba Yehova ukongakanyanga kibumbo kikatampe kikapanda pa kyamalwa kikatampe. (Kus. 7:​9, 14) Mwinē mwangulo ukulupile nyeke amba bantu bavule baketabija myanda miyampe. Nanshi tudi na bubinga buyampe bwa kwendelela kusapula.

18. Lelo i bika byotusaka bantu bamone potudi?

¹⁸ Bana ba bwanga ba Yesu bayukenanga nyeke ku kusapula na bupyasakane. Bantu pobāmwene bukankamane bwa batumibwa, “bajingulula’mba badi pamo na Yesu.” (Bil. 4:13) Netu petumona bantu mu busapudi, i biyampe bamone amba twiulanga bupyasakane bwa Yesu.