Lelo mushipiditu ujila dyalelo ukwashanga namani mu kutonga bakulumpe ne bengidi ba mingilo?

Dibajinji, mushipiditu ujila wākweshe balembi ba Bible basoneke bisakibwa bya bakulumpe ne bengidi ba mingilo. Bisakibwa dikumi ne bisamba pa kwikala bu mukulumpe i bitelwe mu 1 Temote 3:1-7. Bisakibwa bikwabo bidi mu Tetusa 1:5-9 ne Yakoba 3:17, 18. Bisakibwa bya kwikala bu mwingidi wa mingilo i bitelwe mu 1 Temote 3:8-10, 12, 13. Dya bubidi, boba bayukanya ne batonga balombanga Yehova mushipiditu wibaludike pobatala shi tutu kampanda i mubwanye bisakibwa bya mu Bisonekwa mu ludingo lufwaninwe. Dya busatu, muntu uyukanibwa ufwaninwe kulombola bipa bya mushipiditu ujila wa Leza mu bwandi būmi. (Ngt. 5:22, 23) Nanshi mushipiditu wa Leza wingilanga mu myanda yonso ilondwanga pa kutongwa.

Ino le i ani mwine utoñanga batutu? Mafuku kunyuma, kuyukanya konso kwa pa kutonga mukulumpe nansha mwingidi wa mingilo kwadi kutumwanga ku bilo ya musambo ya mu yenu ntanda. Kwine’kwa, kwadi batutu batongelwe na Kitango Kyendeji badi bapelwe mwingilo wa kubandaula kuyukanibwa’kwa ebiya ne kutonga’mo boba babwenye bisakibwa. Kupwa, bilo ya musambo yadi yandikila kitango kya bakulumpe. Bakulumpe nabo, basapwila batutu batongwa’ba kutongwa kwabo, na kwibepangula shi basaka ne shi bemwene bu babwanya kwitabija uno mwingilo. Ku mfulo, musapu waelwa ku kipwilo.

Ino le kuno kutongwa kwādi kulongwa namani mu myaka katwa kabajinji? Kyaba kimo, bādi batongelela kiponka na ponka, kimfwa na mobātongedile bana-balume basamba-babidi mwanda wa kwabanya bidibwa ku bakaji ba bishala. (Bil. 6:1-6) Inoko, bano bana-balume bādi bengila kala bu bakulumpe, kumeso kwa kupebwa’bo uno mwingilo wa ntentekelo.

Nansha Bisonekwa byokebilombwelepo kamo ne kamo ka mwādi mutongelwa muntu, ino kudi bilomboji bitulombola mobyādi bipityila. Twayukile  amba ba Polo ne Banabasa pobādi mu lwendo lwabo lubajinji lwa bu mishonele, bātongele “bakulumpe mu kipwilo ne kipwilo, kadi balombela milombelo ne kushikilwa na nzala, bebatūla mu makasa a Yehova mwine obaitabije.” (Bil. 14:23) Myaka pa kupita’po, Polo wālembela mwendi-nandi Tetusa amba: “Nakushile mu Kelete mwanda wa ōlole bintu byadi byoneke ne kutonga bakulumpe mu kibundi ne kibundi, monka monakulombwedile.” (Tet. 1:5) Bimweka bu Temote, wādi unanga bininge na mutumibwa Polo, nandi wāpelwe luno lupusa. (1 Tm. 5:22) Kibamweka patōkelela’mba kuno kutongwa kwādi kulongwa na batadi bendakana, ke na batumibwapo nansha bana-balume batame ba mu Yelusalema, mhm.

O mwanda na kwimanina pa uno mwanda wa mu Bible, Kitango Kyendeji kya Batumoni ba Yehova kyashintyile muswelo wa kutonga bakulumpe ne bengidi ba mingilo. Tamba mu difuku 1 Kweji 9, 2014, kutongwa kukalongwa namino: mutadi ne mutadi wa kipindi ukabandaula na katentekeji kuyukanibwa kwa ba mu kyandi kipindi. Papempula kipwilo, ukasaka kutala boba bayukanibwe, kwingila nabo bininge mu busapudi ponso pobibwanika. Shi wapu kwisamba na kitango kya bakulumpe ba pa kipwilo, mutadi wa kipindi ye ukekala na kiselwa kya kutonga bakulumpe ne bengidi ba mingilo mu bipwilo bya mu kyandi kipindi. Mu uno muswelo, ino mpangiko ibeifwana na ya mu myaka katwa kabajinji.

Le i ani uvuija ino mingilo palapala? Enka mobikadilanga nyeke, “umpika mukōkele ne mudyumuke” ye mwinē kiselwa kya kudisha bengidi ba mu njibo. (Mat. 24:45-47) Mu kino kiselwa, mudi ne kusakasaka mu Bisonekwa, na bukwashi bwa mushipiditu ujila, mwanda wa kuleta bwendeji bufwaninwe bwa mwa kulondela misoñanya ya mu Bible itala pa muswelo ufwaninwe kulongololwa kipwilo ntanda yonso. Umpika mukōkele nandi utoñanga batadi bonso ba kipindi ne ba mu Komite wa Musambo. Bilo ya musambo nayo iletanga bukwashi bwa mwa kulondela buno bwendeji. Kitango ne kitango kya bakulumpe kidi na mwingilo mukatampe wa kubandaula na katentekeji bisakibwa bya mu Bisonekwa bitala batutu bobayukanya mwanda wa kutongwa mu kipwilo kya Leza. Mutadi ne mutadi wa kipwilo udi na mwingilo mukomo wa kubandaula na katentekeji kadi ne milombelo ponka kuyukanibwa kulongelwe na bakulumpe ne kutonga bana-balume babwenye bisakibwa.

Shi twimvwanije senene muswelo ulongwa butongi, tukafwija’ko bininge pa mwingilo wingila mushipiditu ujila mu uno mwanda. Kadi tukakulupila ne kulēmeka bininge boba batongelwe mu kipwilo kya bwine Kidishitu.—Bah. 13:7, 17.

Kusokwelwa 11:3 wisambila pa batumoni babidi banena bupolofeto mu mafuku 1260. Nsekununi ibweja’ko amba kinyema kya ntanda “kikebatamba divita kyebanekenya ne kwibepaya.” Ino kupwa kwa “mafuku asatu ne kipindi,” bano batumoni babidi bafwaninwe kupebwa monka būmi, kintu kikatulumuna bonso bebabandila.—Kus. 11:7, 11.

Lelo bano batumoni babidi i bāni? Ino nsekununi itukwasha twibayuke. Kibajinji, nsekununi itulombola’mba “bano i belekejibwe na mityi ibidi ya impafu ne bitūlwa-binanu bibidi.” (Kus. 11:4) Kino kituvuluja bitūlwa-binanu ne mityi ibidi ya impafu inenenwe mu bupolofeto bwa Zekadia. Ino mityi ya impafu i kyelekejo kya “[bashingwe] māni babidi,” ko kunena’mba i, Mbikavu Zelububele ne Yoshua Kitobo Mukatampe, “bemene pabwipi na Mfumwetu wa panopanshi ponsololo.” (Zek. 4:1-3, 14) Kya bubidi, nsekununi itulombola’mba bano batumoni babidi baloñanga biyukeno bidi pamo bwa bya ba Mosesa ne Ediya.—Dingakanya Kusokwelwa 11:5, 6 na Umbadilo 16:1-7, 28-35 ne 1 Balopwe 17:1; 18:41-45.

Le kuno kudingakanya kwiifwene paka? Mwanda ne mwanda ufunkila pa bashingwe māni ba Leza batangidile mingilo mu kitatyi kya matompo. Mu kufikidila kwa Kusokwelwa shapita 11, banabetu bashingwe māni badi batangidile mingilo mu kitatyi kyashimikilwe Bulopwe bwa Leza momwa mūlu mu 1914 badi basapula “bavwele masāka” mu bula bwa myaka isatu ne kipindi.

Ku mfulo kwa busapudi bwabo koku bavwele masāka, bano bashingwe māni baipailwe mu kyelekejo pobaelelwe mu kifungo kakitatyi katyetye shi twikadingakanye na kipindi kya mafuku asatu ne kipindi a kyelekejo. Balwana na bantu ba Leza bamwene amba uno mwingilo ubafu, ne kulengeja balwana basepelele.—Kus. 11:8-10.

Inoko’nka mwanenene bupolofeto, ku mfulo kwa ano mafuku asatu ne kipindi, bano batumoni babidi bajokejibwe ku būmi. Bano bashingwe māni bakutulwilwe mu kifungo, ino kadi boba balamine kikōkeji kyabo batambwile madyese a pa bula kudi Leza kupityila kudi Yesu Kidishitu, Mfumwabo. Mu 1919 bādi babadilwa mu boba batongelwe kwingila bu “umpika mukōkele ne mudyumuke” mwanda wa kupa bantu ba Leza bidibwa bya ku mushipiditu mu kitatyi kya mafuku a ku mfulo.—Mat. 24:45-47; Kus. 11:11, 12.

Kintu kisangaja, Kusokwelwa 11:1, 2 ukwatañanya bino binkumenkume na kitatyi kya kutompekejibwa nansha kupimwa kwa tempelo ya ku mushipiditu. Malaki shapita 3 utela kupempulwa kudi na kuno kwa tempelo ya ku mushipiditu, yalondelwe na kitatyi kya kusubulwa. (Mal. 3:1-4) Lelo kuno kupempulwa ne kusubulwa byalongele mafuku anga? Byashilwile mu 1914 kufika ku ngalwilo kwa 1919. Mu buno bula bwa kitatyi mubadilwa mafuku 1260 (myeji 42) ne mafuku asatu ne kipindi a kyelekejo atelelwe mu Kusokwelwa shapita 11.

Bine tudi na nsangaji ya kufwija’ko Yehova pa mwingilo watūdile’ko wa kutōkeja ku mushipiditu ne kusubula bantu ba pa bula, mwanda wa mingilo milumbuluke! (Tet. 2:14)Kadi, tusangedile kimfwa kitushidile bashingwe māni ba kikōkeji badi batangidile mwingilo mu kitatyi kya matompo’kya ne kwingila bu batumoni babidi ba kyelekejo. *