Tutu Mupya mu Kitango Kyendeji

Mu dya busatu lubanga, mafuku 5 Kweji 9, 2012, kwaelelwe musapu mu kisaka kya Betele ya mu États-Unis ne ya mu Kanada amba, kudi tutu mupya wabwejibwa mu Kitango Kyendeji kya Batumoni ba Yehova. Mu difuku 1 Kweji 9, 2012, Mark Sanderson washilwile kwingila mu kino Kitango.

Tutu Sanderson wālelelwe mu San Diego, Kaliforni, États-Unis, na bambutwile bene Kidishitu ne kubatyijibwa mu mafuku 9 Kweji 2, 1975. Wāshilwile kwingila bu pania mu Saskatchewan, Kanada, mu difuku 1 Kweji 9, 1983. Mu Kweji 12, 1990, watambula dipolome ku kalasa ka busamba-bubidi ka Masomo a Bufundiji bwa Mingilo (etwa dyalelo bu Masomo a Bible a Bankungulume) mu États-Unis. Tutu Sanderson wātuminwe kukengila bu pania wa pa bula pa kisanga kya Newfoundland mu Kanada, mu Kweji 4, 1991. Pa kupwa kwingila bu mpingakani wa mutadi wa kipindi, waitwa kwikala mu kisaka kya Betele ya mu Kanada mu Kweji 2, 1997. Mu Kweji 11, 2000, watundulwilwa ku musambo wa mu États-Unis, kwine kwaaingile mu Mwingilo Utala Myanda ya Lupitalo ne mu Mwingilo Utala Myanda ya Busapudi.

Mu Kweji 9, 2008, Tutu Sanderson wakafundile Masomo a Ba mu Komite wa Musambo, kupwa watongwa bu tutu wa mu Komite ya Musambo ya mu Filipine. Mu Kweji 9, 2010, bamunena akajokele mu États-Unis, mwine mwaaingile bu mukwashi wa Komite wa Mingilo wa Kitango Kyendeji.