Sangela Dikōkeji Ne Lulekelo Lwa Yehova

“Abe, Mfumwami, wi muyampe, ne mutyima wa lubilo wa kulekela (myanda), kadi wi wa lusa lwa ntanda ne ntanda ku boba nabya bonso bēta abe.”​—MIT. 86:5.

LE UKOKEJA KUSHINTULULA?

Le i mu miswelo’ka motubwanya kwiula dikōkeji dya Yehova?

Le tubwanya kwiula lulekelo lwa Yehova namani?

Mwanda waka usakanga kwendelela kutamija kusangela kosangedile ngikadilo ya Yehova?

1, 2. (a) Mwanda waka tusangelanga balunda ba dikōkeji ne ba lulekelo? (b) Le i bipangujo’ka byotusa kubandaula?

 LELO ubwanya kushintulula mulunda wa bine namani? Kaka umo mwine Kidishitu witwa bu Ashley unene amba, “kondi, mulunda wa bine i yewa ukutele mutyima ne ukulekela shi ubaluba.” Batwe bonso tusangelanga balunda ba dikōkeji ne ba lulekelo. Betukwashanga twimone bu tudi na mutyima-ntenke ne baswedibwe.​—Nk. 17:17.

² Yehova ye Mulunda netu umo kete udi na dikōkeji ne lulekelo. Bidi pamo na mwānenene kaimba wa mitōto amba: “Abe, Mfumwami, wi muyampe, ne mutyima wa lubilo wa kulekela (myanda), kadi wi wa lusa lwa ntanda ne ntanda [nansha buswe bwa dikōkeji] ku boba nabya bonso bēta abe.” (Mit. 86:5) Le kwikala wa dikōkeji ne wa lulekelo kushintulula bika? Le Yehova ulombolanga ino ngikadilo milumbuluke namani? Ne i muswelo’ka otubwanya kwiula kimfwa kyandi? Malondololo aketukwasha tutamije buswe botuswele Yehova Mulunda netu muyampe. Kadi aketukwasha tukomeje bulunda botusambile na bakwetu.​—1 Yoa. 4:7, 8.

YEHOVA UDI NA DIKŌKEJI

3. Le kwikala wa dikōkeji kushintulula bika?

³ Dikōkeji i ngikadilo isangaja, mubadilwa mulangwe wa kwipāna, kikōkeji ne lulamato lwampikwa kujina. Muntu wa dikōkeji kashintangapo. Ino, i muntu ulamatanga bininge ku muntu (nansha ku kintu) na buswe, ne kulamatyidila muntu (nansha kintu) enka ne mu ngikadilo mikomo. Bine, Yehova ye ‘Mwine wa dikōkeji’ kutabuka bantu bonso.​—Kus. 16:5.

4, 5. (a) Le Yehova ulombolanga dikōkeji namani? (b) Le i muswelo’ka otubwanya kumona bukomo kupityila ku kulangulukila pa bilongwa bya dikōkeji bya Leza?

⁴ Le Yehova ulombolanga dikōkeji namani? Kelangapo batōtyi bandi ba dikōkeji. Mulopwe Davida  umo wa mu bano batōtyi wālombwele bukamoni bwa amba, Yehova udi na dikōkeji. (Tanga 2 Samwele 22:26.) Davida paātenwe na matompo, Yehova wāmuludikile, wamukinga ne kumunyongolola na dikōkeji. (2 Sam. 22:1) Davida wādi uyukile amba dikōkeji dya Yehova ditabukile binenwa byonkabyonka. Mwanda waka Yehova wālongēle Davida bintu na dikōkeji? Mwanda Davida wādi “wa lusa.” Yehova usenswe dikōkeji dya batōtyi bandi kadi wilombolanga nandi bu wa dikōkeji kobadi.​—Nk. 2:6-8.

⁵ Tubwanya kumona bukomo kupityila ku kulangulukila pa bilongwa bya dikōkeji bya Yehova. Tutu umo wa kikōkeji witwa bu Reed unena amba, “kutanga myanda ya mwādi mwikadile Yehova na Davida mu bitatyi bya byamalwa, kunkwashanga bininge. Nansha ke kitatyi kyādi kinyema Davida, kutwela ne kutamba mu mita, Yehova wādi nyeke umukankamika. Kino kikankamikanga’po kashā! Kadi kimvulujanga amba, nansha ngikale mu ngikadilo’ka, nansha imweka bu mibi namani, Yehova ukekala nami shi ñendelele nyeke na ku mukōkela.” Na bubine, nobe wiivwananga uno muswelo.​—Loma 8:38, 39.

6. Le Yehova ulombolanga dikōkeji dyandi mu miswelo’ka, ne batōtyi bandi bamwenanga’mo bika?

⁶ Le i mu miswelo’ka mikwabo mulombolanga Yehova dikōkeji? Ufikidijanga nyeke misoñanya yandi. Witukulupija’mba “ino ne ku bununu bobe ami ne aye enka.” (Is. 46:4) Ukwatanga nyeke butyibi bwimanine pa misoñanya yandi yampikwa kushinta ya kuyuka biyampe ne bibi. (Mal. 3:6) Kadi, Yehova ulombolanga dikōkeji na kufikidija nyeke mulao wandi. (Is. 55:11) Mu uno muswelo, batōtyi bonso ba Yehova bamwenanga mu dikōkeji dyandi. Namani? Kitatyi kyotulonga bukomo bwa kulamata ku misoñanya ya Yehova, tubwanya kukulupila amba ukafikidija mulao wandi wa kwitwesela.​—Is. 48:17, 18.

TWIULEI DIKŌKEJI DYA YEHOVA

7. Le i muswelo’ka umo otubwanya kwiula dikōkeji dya Leza?

 ⁷ Le i muswelo’ka otubwanya kwiula dikōkeji dya Yehova? Muswelo umo bidi, i na kukwasha boba badi mu ngikadilo mikomo. (Nk. 3:27) Kimfwa, le uyukile mwanetu mu lwitabijo mutyumukwe mutyima, padi pa mwanda wa misongo, kulwibwa na kisaka nansha bilubo byandi? Le ubulwe’po kunena uno muntu “binenwa bya kukankamika ne bya busengi”? (Zek. 1:13, Dibuku Dijila) * Shi ulonge namino, ukelombola bu wa dikōkeji kadi mulunda wa bine, muntu “ulamata bininge kupita mwenenu wa munda.”​—Nk. 18:24.

8. Le i muswelo’ka otubwanya kwiula dikōkeji dya Yehova, kimfwa mu busongi?

⁸ Kadi tubwanya kwiula dikōkeji dya Yehova na kulamatyidila boba botusenswe. Kimfwa, shi tudi na mwinē petu, tuyukile amba tufwaninwe kwikala nyeke na kikōkeji kudi mwinē petu. (Nk. 5:15-18) Nanshi ketufwaninwepo kwenda’nka ne mu kashinda katwala ku makoji. (Mat. 5:28) Kadi, tulombolanga dikōkeji ku banabetu mu lwitabijo na kwijiba ku lubabo lubi ne lunsamfwakanwa, kuleka kwisamba bino binenwa bibi enka ne kuleka kwibimvwana kwine.​—Nk. 12:18.

9, 10. (a) Le tusakanga nakampata kwikala nyeke na dikōkeji kudi ani? (b) Mwanda waka kukōkela misoñanya ya Leza kekupēlangapo nyeke?

⁹ Na kampata, tusakanga kwikala nyeke na dikōkeji kudi Yehova. Le tukekala nadyo namani? I na kulonga bukomo bwa kumona bintu na mwaebimwena​—kusanswe byasenswe ne kushikwa byashikilwe​—ne kwiendeja mungya abyo. (Tanga Mitōto 97:10.) Shi tukwatañanya milangwe ne mwiimvwanino wetu na milangwe ne mwiimvwanino  wa Yehova, tukakōkela ku misoñanya yandi.​—Mit. 119:104.

¹⁰ Shako, kebipēlangapo nyeke kukōkela misoñanya ya Yehova. Tufwaninwe kulwa pa kwikala nyeke ba dikōkeji. Kimfwa, bene Kidishitu bamo bankunga bakimbanga wa kwisonga nandi, ino kebatene mwinē pabo mufwaninwe mu batōtyi ba Yehova. (1 Kod. 7:39) Kaka umo kunga ubwanya kumona amba, bengidi nandi bampikwa kwitabija baloñanga bukomo bwa kumufikija ku bobakimba kwisonga nabo. Kaka ubwanya kulwa na milangwe ya kwikala bunka. Inoko, ufwaninwe nyeke kulonga bukomo bwa kulama bululame bwandi kudi Yehova. Le ketusangedilepo bino bimfwa bilumbuluke bya dikōkeji? Na bubine, Yehova ukesela boba bonso bamukōkele nyeke nansha byobalwa na bikoleja.​—Bah. 11:6.

YEHOVA UDI NA LULEKELO

11. Lelo kwikala na lulekelo kushintulula bika?

¹¹ Mutyima wa lulekelo ubadilwa mu ngikadilo ikunka mutyima ya Yehova. Le kwikala wa lulekelo kushintulula bika? I kufwila muntu witulubile lusa shi kudi bubinga bwinebwine bwa kulongela namino. Kino kekishintululapo amba muntu wa lulekelo ukatala kilubo kilomonyeka nansha kuputa’po meso. Ino, utoñanga kuleka kulama kiji. Bisonekwa bitufundija amba Yehova udi na “mutyima wa lubilo wa kulekela” boba besāsa bya binebine.​—Mit. 86:5.

12. (a) Le Yehova ulombolanga lulekelo namani? (b) Lelo ‘kujimankanya’ bubi bwa muntu kushintulula bika?

¹² Le Yehova ulombolanga lulekelo namani? Shi Yehova walekela, ulekelanga “byamwiko’tu”; ulekelanga lonso kadi nyeke. (Is. 55:7) Le tubayuka namani amba Yehova ulekelanga lonso? Tala kikulupiji kyotutana mu Bilongwa 3:19. (Tanga.) Mutumibwa Petelo wāsoñenye bemvwaniki bandi amba ‘alamukai pa mutyima, muvundamuke.’ Shi kipya-mambo wesāsa bya binebine, wialakanyanga bininge pa mwiendelejo wandi mubi. Kadi usumininwanga kuleka kujokela mu bubi bwandi. (2 Kod. 7:10, 11) Ino,  kwisāsa kwa bine kutononanga nonga-bibi ‘avundamuke’ ne kuleka mwiendelejo wandi mubi ne kulondalonda mwiendelejo usangaja Leza. Le byādi bya kwikala namani shi bemvwaniki ba Petelo balombwele kwisāsa kwa binebine? Petelo wānene’mba, bubi bwabo bwādi bwa ‘kujimankanibwa.’ Kino kishima kitamba ku kishima kya Kingidiki kishintulula amba “kupampula, kubula.” Nanshi shi Yehova walekela, ubulanga bulē bubi bwetu. Ulekelanga lonso.​—Bah. 10:22; 1 Yoa. 1:7.

13. Le binenwa bya amba “bubi bwabo ami nkikavuluka’bopo nyeke, ne nyeke nansha patyetye” bitukulupija bika?

¹³ Le tubayuka namani amba Yehova ulekelanga lonso? Langulukila pa bupolofeto bwa Yelemia butala pa kipwano kipya, kyāsambilwe na bene Kidishitu bashingwe māni, kine kilengejanga kulekelwa kwa bine kwa boba betabije mu kikūlwa. (Tanga Yelemia 31:34.) Yehova unena amba: “Nkalekēla bukondame bwabo, ne bubi bwabo ami nkikavuluka’bopo nyeke, ne nyeke nansha patyetye.” Nanshi Yehova witukulupija amba shi walekela, kaketulongapo kintu mwenda mafuku pa mwanda wa bubi’bwa. Kavulukangapo mu ñeni bubi bwetu mwanda wa kwitutopeka nansha kwitupa mfuto monka. Kadi, Yehova ulekelanga buno bubi ne kwibwela kunyuma​—nyeke.​—Loma 4:7, 8.

14. Le tubwanya kusengibwa namani na kulangulukila pa lulekelo lwa Yehova? Leta kimfwa.

¹⁴ Tubwanya kusengibwa na kulangulukila pa lulekelo lwa Yehova. Tubandaulei bidi kimfwa kimo. Kaka umo witwa dya bu Elaine wāpangilwe pano ke padi myaka mivule. Wājokejibwe myaka mivule pa kupita’po. Elaine unena amba, “nansha byonadi nena ne kusapwila bakwetu amba, nkulupile amba nalekelwa na Yehova, nadi neivwana bu ngidi kulampe nandi, inoko bakwetu bekele nandi pabwipi ne kumumona bu muntu udi’ko binebine.” Ino, Elaine wasengelwe kupityila ku kutanga ne ku kulangulukila pa binenwa bimo bya kyelekejo bingidije Bible pa kwisambila pa lulekelo lwa Yehova. Elaine ubweja’ko’mba, “nemwenine buswe ne kanye ka Yehova mu muswelo onadi nkyebimwene kashā.” Watononwenwe nakampata na ino milangwe ya amba: “Shi Yehova witulekelanga bubi bwetu, ketufwaninwepo kulanga amba tukashala na kiko kya buno bubi mu bula bwa būmi bwetu.” * Elaine unena amba: “Najingulwile amba nkyadipo nkulupile amba Yehova ubwanya nkundekela ne pa mfulo kadi nadi nanga amba nkasela kino kiselwa kilēma mu bula bwa būmi bwami. Ndyukile amba bikalomba kitatyi, ino nashilula kumona amba mbwanya bine kufwena Yehova ne amba nātūdilwe kiselwa kilēma kyonadi nakyo.” Bine, twingidilanga Leza wa buswe ne lulekelo!​—Mit. 103:9.

TWIULEI LULEKELO LWA YEHOVA

15. Le tubwanya kwiula lulekelo lwa Yehova namani?

¹⁵ Tubwanya kwiula lulekelo lwa Yehova na kwilekela batwe bene na bene kitatyi kyonso kidi’ko bubinga bwa kwilekela. (Tanga Luka 17:3, 4.) Vuluka’mba, shi Leza walekela uvulaminwanga bubi bwetu ko kunena amba, kakitulandula’bopo monka. Kitatyi kyotulekela bakwetu, netu tubwanya kuvulaminwa na kwela mwanda kunyuma ne kuleka kuvuluka’o mwenda mafuku.

16. (a) Le kwikala na lulekelo kushintulula amba tufwaninwe kutala bilubo kilomonyeka ne kuleka bakwetu betuvwale? Shintulula. (b) Le tufwaninwe kulonga bika pa kusaka kulekelwa na Leza?

 ¹⁶ Kwikala na lulekelo kekushintululapo kutala bilubo kilomonyeka nansha kuleka bakwetu betuvwale. Mhm. Kushintulula amba tubatonge kuleka kulama kiji. Nanshi pa kulekelwa na Leza, tufwaninwe kwiula lulekelo lwa Yehova  mu muswelo otwikele na bakwetu. (Mat. 6:14, 15) Ne kadi, lusa lutononanga Yehova avuluke amba twi “luvumbi.” (Mit. 103:14) Le penepa, lusa lubulwe’po kwitutonona tutyumwine mu manwi kutupatupa kwa bakwetu ne kwibalekela na mutyima umo?​—Ef. 4:32; Kol. 3:13.

17. Le i bika bibwanya kwitukwasha shi mwanetu mu lwitabijo wetusanshija?

 ¹⁷ Na bubine, kebipēlangapo kulekela muntu. Mobimwekela, enka ne bene Kidishitu bamo bashingwe māni bākomenwe kupwija kubulwa kumvwañana. (Fid. 4:2) Le i bika bibwanya kwitukwasha shi mwanetu mu lwitabijo wetusanshija? Langulukila padi Yoba. Yoba wāivwene mutyima kusansa pāikele “balunda” nandi​—Edifaza, Biledade ne Zofala​—kumutopekatopeka bya bitupu. (Yoba 10:1; 19:2) Ku mfulo, Yehova wādingile bano bantu bāsapwile bya bubela. Leza webasoñanya bende kudi Yoba ebelele kitapwa pangala pa bubi bwabo. (Yoba 42:7-9) Ino kadi Yehova wāsoñenye Yoba alonge’po kintu kampanda. Kintu’ka? Yehova wānene Yoba alombele pangala pa bano bantu bāmutopekele. Yoba wālongela monka mwāmunenene Yehova, ne Yehova nandi wāmwesela pangala pa mushipiditu wandi wa lulekelo. (Tanga Yoba 42:10, 12, 16, 17.) Le i ñeni’ka yotuboila’ko? I ino: Milombelo yampikwa budimbidimbi yotulombela muntu witulubile ikokeja kwitukwasha tuleke kulama kiji.

TWENDELELEI KUSANGELA NE PA MFULO NGIKADILO YA YEHOVA

18, 19. Le i muswelo’ka otubwanya kwendelela kutamija kusangela kotusangedile bumuntu bwa Yehova bukunka mutyima?

¹⁸ Bine, tubatūkijibwa’po kashā mutyima pa kubandaula ngikadilo palapala ya Yehova. Twamwene amba i Leza ulumbwa, wampikwa mboloji, wa buntu, wa bujalale, wa dikōkeji ne wa lulekelo. Na bubine, tubakolokota’tu kūlu. Tubwanya kwikala na bya kwifunda bivule myaka yonso nyeke. (Mus. 3:11) Twitabije mutumibwa Polo wāsonekele amba: “E! E! E! E! munshi bulamo bwa bupeta bwa ñeni ne kuyūkidija kwa Leza”​—pampikwa kutela buswe ne ngikadilo isamba yotwabandawile.​—Loma 11:33.

¹⁹ Nanshi, twendelelei batwe bonso kutamija kusangela kotusangedile bumuntu bwa Yehova bukunka mutyima. Tubwanya kulonga kino na kuyuka biyampe ngikadilo yandi, kulangulukila’po ne kwiula’yo mu būmi bwetu. (Ef. 5:1) Shi tulonge namino, tuketabija pampikwa kutatana kaimba wa mitōto wāimbile amba: “I kinengelele ami kufwena kudi Leza.”​—Mit. 73:28.

[Kunshi kwa dyani]

[Bipangujo bya Kifundwa]