Bipangujo bya Batangi

Le bene Isalela bādi bepaya bantapani na kwibayeyeka ku mityi?

▪ Mizo mivule mu bitatyi bya kala yādi ipaya bantapani bamo na kwibayeyeka ku mutyi nansha ku kikomo kya mutyi. Bene Loma bādi bakuta nansha kupopa uno muntu ku kintu kya kumwipaila’ko, kwine kwaādi wa kwikala mūmi mu mafuku mavule ususuka na misanshi, kyumwa, nzala ne na bivula ne mvula. Bene Loma bādi bamwene kuyeyekwa bu mfuto ya bumvu yādi ipebwa bantapani ba ludingo lwa panshi bininge.

Le tunena bika pa muzo wa Isalela wa kala? Le bene Isalela bādi bepaya bantapani na kwibayeyeka ku mityi? Mukanda wa Bijila wa Mosesa wānenene amba: “Kabidi shi muntu apye mambo afwaninwe lufu kadi bamuyeyeke ku mutyi; ngitu yandi keikekalapo ku mutyi bufuku bonso ne byo bukya, mhm, nanshi kumujika ukamujika dyonka dyadyo difuku.” (Kup. 21:22, 23) Nanshi, mu kitatyi kya Bisonekwa bya Kihebelu, muntu wādi ufwaninwe kufwa wādi dibajinji wipaibwa kupwa wayeyekwa ku kipingo nansha ku mutyi.

Levi 20:2 wisambila pa uno mwanda amba: “Ense muntu wa ku bāna ba Isalela, nansha wa ku beni bekalanga mafuku mu Isalela, wakatompapo fyu kupana ku lukunwa lwandi, nansha lumo, kudi Moloka, nabya yao muntu kufwa afikijibwe ku lufu binebine; bene ba ntanda’yo bakamwasa mabwe.” Boba “ba bikudi bya kaya-mulongo, nansha bamajende” nabo bādi bepaibwa. Namani? Na ‘kwibasa mabwe.’—Levi 20:27.

Tutanga mu Kupituluka 22:23, 24 amba: “Shi kadi kudi nsongwakaji ukidi nkungakaji musongwe na mulume, penepa mwana-mulume umutana mu kibundi alāle nandi; nankyo mukebalupwija bonso babidi ku kibelo kya kibundi’kya, kabidi mukebasa mabwe bafwa; mwanda nsongwakaji’wa kadidilepo, byadi mu kibundi; kadi ne mwana-mulume mwine, mwanda wafwija mukaja mwikadi nandi bumvu, enka nabya ukafundula bubi umbukata mobe.” Ku bene Isalela, kwaswa mabwe ādi manwa mabajinji a kwipaya nao bantu balambikilwe mambo a butapani bwa malwa. *

Kupituluka 21:23 unena’mba, “aye muyeyekwe i mufingwe wa Leza.” Kumwekeja ku bantu bonso ngitu ya muntu mubi, “mufingwe wa Leza” kwādi bine na lupusa pa bene Isalela. Na bubine, kuyeyeka ngitu ya uno muntu mufwe ku kipingo nansha ku mutyi kwādi bu kidyumu ku bantu bakwabo.

[Kunshi kwa dyani]

[Bushintuludi pa paje 13]

Bine, mu kitatyi kya Bisonekwa bya Kihebelu, muntu wādi ufwaninwe kufwa wādi dibajinji wipaibwa kupwa wayeyekwa ku kipingo nansha ku mutyi