666—Ke Lushintyipo’tu Kete

“Nansha umo muntu ukamona kupota, nansha kupotolola, poso’nka aye udi ne kiyūkeno, kya dijina dya kinyema, nansha kubalwa kwa dijina dyandi. Pano po pa ñeni pēne pano’pa. Ino yewa wakwivwanija manwa abale kubalwa kwa kinyema’kya; ke-kintu i kubalwa kwa muntu; kadi kubalwa kwandi i tutwa tusamba ne makumi asamba ne bisamba.”—Kusokwelwa 13:17, 18.

KEKUDIPO myanda mivule ya mu Bible isangajanga ne kuseleja bantu mityima kūlu pamo bwa bupolofeto bwa kiyukeno kifyame, nansha dijina dya “kinyema”—kibalwa 666. Ku matelevijo ne pa Entelenete, pamo ne mu masinema, mu mabuku, ne mu mapepala, kiyukeno kya kinyema i mwanda ufwatakanibwa mu miswelo keibadika.

Bamo balanga amba 666 i kiyukeno kya antekidishitu utelelwe mu Bible. Bakwabo nabo banena amba i kiyukeno kyobakatūla bantu na kwibaningila, pamo bwa ntapo nansha kashe ka mudilo ka bilembwa biyukanya muntu bu mwingidi wa kinyema. Ino bangi nabo bafwatakanya amba 666 i kiyukeno kya bapapa bene Katolika. Batananga kino kibalwa na kupingakenya bibalwa pa byobya bya masomo a bene Loma adi mu kitenta kya papa, kya bu Vicarius Filii Dei (Mpingakani wa Mwanā Leza), penepa basambakanya’byo ne kutana batana 666. Ne kadi kudi balanga amba kino kibalwa kikokeja kadi kupikulwa mungya dijina dya Kilateni dya Mulopwe Mbikavu Diocletien ne mungya bwalamuni bwa Kihebelu bwa dijina dya Nero Kesala. *

Ino nshintulwilo ya kulangidija ne kufwatakanya i mishile kulampe kwine na byobya binena Bible pangala pa kiyukeno kya kinyema, monka motusa kwikimwena mu kishinte kilonda’ko. Bible usokola amba boba badi na kino kiyukeno bakaponenwa na bukalabale bwa Leza pasa kufudija ino ngikadilo ya bintu. (Kusokwelwa 14:9-11; 19:20) O mwanda kwivwanija buluji bwa 666 i kusokola bivule, ke enkapo kushintulula lushintyi lukutakane kete, mhm. Na bya dyese, Yehova Leza, kimfwa kisokwele kya buswe ne Nsulo ya mwinya wa ku mushipiditu, kashilepo bengidi bandi mu fukutu pa uno mwanda wa mvubu mpata.—2 Temote 3:16; 1 Yoano 1:5; 4:8.

[Kunshi kwa dyani]