Bipangujo bya Batangi

Lelo kwikala na “bumi mu aye mwine” kushintulula namani?

Bible unena amba Yesu Kidishitu udi na “bumi mu aye mwine” ne amba balondi bandi nabo badi na ‘būmi mu abo bene.’ (Yoano 5:26, BB; 6:53, NW) Ino bino bisonekwa byonso bibidi kebidipo na buluji bumo.

“Enka mwikadile Tata na bumi mu aye mwine,” ye Yesu unena, “mo monka mwapelele ne Mwana kwikala na bumi mu aye mwine.” Yesu, kumeso kwa kunena bino binenwa bitulumukwa, wānene bidi amba: “I binebine byo nemunena’mba: Yewa wakwivwana wami mwanda kumwitabija yewa wantumine, nankyo udi ne būmi bwa kulādila nyeke . . . Mwaka ukāyako’wa, ne pano pene ubapu kufika, ukēvwanapo ne bafu diwi dya yewa Mwana Leza, ino abo bakēvwana nankyo bakamona būmi.” Pano Yesu wādi wisambila pa bukomo bukatakata bumupele Shandi—bukomo bwa kupa bantu mwimanino mulumbuluke ku meso a Leza. Kadi Yesu ubwanya kusangula boba balēle mu tulo twa lufu ne kwibapa monka būmi. Nanshi kwikala kwikele Yesu na “bumi mu aye mwine” kushintulula amba i mupebwe buno bukomo. Mwana udi ‘na kyabuntu kya būmi mudi aye mwine,’ monka mwikadile nakyo Shandi. (Yoano 5:24-26) Le balondi bandi nabo?

Mwaka umo kupita’po, Yesu wālombwele bemvwaniki bandi amba: “I binebine byo nemunena’mba: Wivwane shi kemudilepo ku mubidi wa Mwanā muntu, ne kutoma mashi andi mpika, nankyo kemudipo ne būmi munda mwenu [“kemudipo na būmi mu banwe bene,” NW], ehe. Aye wakudya ku mubidi wami, watoma ne ku mashi ami, nabya udi ne muya wa nyeke, nami nkamusangulanga ku difuku dya mfulo.” (Yoano 6:53, 54) Pano Yesu udingakanya kwikala na “būmi mu banwe bene” na kwikala na “būmi bwa nyeke.” Mineneno idi na mubundilo umo onka wa ndudi ya ludimi pamo bwa kwikala ‘na būmi mu banwe bene’ utanwa ne mu bifuko bikwabo mu Bisonekwa bya Kingidiki. Tulete bifwa bibidi, “ikalai na mwepo mwenu munda” ne “batambwila monka abo bene ne mpalo.” (Mako 9:50, BB; Loma 1:27, NW) Mu bino bifwa, kunena namino kekushintululapo amba badi na bukomo bwa kupa bakwabo mwepo obadi nao nansha bwa kupala muntu kampanda mpalo. Ino bifunkila pa butuntulu ne bukunkane bwa munda mwa muntu. O mwanda muneneno “būmi mu banwe bene” wingidijibwe mu Yoano 6:53 ushintulula’tu kutwela mu bukunkane bwa būmi.

Yesu pa kunena amba balondi bandi badi na būmi mu abo bene, wātelele mubidi ne mashi andi. Mwenda mafuku, pa kushilula Bidibwa bya Kyolwa bya Mfumwetu, wātela monka mubidi wandi ne mashi andi na kulombola balondi bandi ba kutwela mu kipwano kipya amba dyai ne kutoma ku byelekejo, ko kunena’mba mukate wampikwa kiyujo ne vinyu. Lelo kino kishintulula amba bene Kidishitu bashingwe māni na Yehova Leza bo bonka kete batwela mu buno bukunkane bwa būmi? Mhm. Ino myanda ibidi yālongekele pala pala mu mwaka umo. Boba bāivwene binenwa bya Yesu bisonekelwe mu Yoano 6:53, 54 kebādipo bayukile kivulukilo kya mwaka ne mwaka kya byelekejo bya umbidi ne mashi a Kidishitu.

Kukwatañana na Yoano shapita wa 6, Yesu wādingakenye bidi mubidi wandi na mana, amba: “Bakulutuba benu byo badile oa mana muntanda mutuputupu kufwa bafwa. Uno nanshi o mukate  mwine utūkile mūlu, amba muntu adyeko nabya kakafupo, mhm. Ami ne mukate wa būmi, utūkile mūlu, wivwane muntu adyeko ku uno mukate uno nankyo ukēkalanga ne būmi nyeke ne nyeke.” Umbidi wa Yesu pamo ne mashi andi, byādi bitabuke kulampe mana. Namani? Mwanda umbidi wandi wāpenwe pangala pa ‘būmi bwa ino ntanda,’ wāpāna muswelo wa kwikala na būmi bwa nyeke. * O mwanda kunena kunenwe mu Yoano 6:53 amba mudi na “būmi mu banwe bene” kutala pa boba bonso batambula būmi bwa nyeke​—mūlu ne pano panshi pene.​—Yoano 6:48-51.

Lelo i kitatyi’ka kitambula balondi ba Kidishitu būmi mu abo bene, nansha kutwela mu bukunkane bwa būmi? Ku bampyana ba Bulopwe bashingwe māni, kino kilongekanga pobasangulwa kwenda momwa mūlu bu bipangwa kebifu bya ngitu ya ku mushipiditu. (1 Kodinda 15:52, 53; 1 Yoano 3:2) “Mikōko mikwabo” ya Yesu nayo ikatwela mu bukunkane bwa būmi ku mfulo kwa Umbikalo wandi wa Myaka Kanunu. Mwanda po pokatompwa, kumonwa bu ba kikōkeji, ne kutelwa bu boloke bafwaninwe kupebwa būmi bwa nyeke mu Paladisa pano pa ntanda.​—Yoano 10:16; Kusokwelwa 20:5, 7-10.

[Kunshi kwa dyani]

[Bifwatulo pa paje 9]

Bene Kidishitu bonso babine babwanya kwikala na ‘būmi mu abo bene’