Lwitabijo Lwabine—Lelo Lukibwanika?

“Lwitabijo i kikulupiji kyumi, kikomo, kitūdile muntu mu buntu bwa Leza, kisumininwe bininge kadi kyabinebine kifikijanga mwitabije ku kutūla būmi bwandi mu kyaka misunsa kanunu pa mwanda wa akyo.”​—MARTIN LUTHER, 1522.

“Mu bintu kisengele byonso, tudi kala bantu bene ntanda mudi lwitabijo ne bilongwa bya bwine Kidishitu ke bipwe kala kutukila.”​—LUDOVIC KENNEDY, 1999.

MIMWENO imonwa lwitabijo ibwanya kwishila bikatampe. Pa kala, lwitabijo mudi Leza lwadi na bantu bavule. Dyalelo, mu ino ntanda miyule mushipiditu wa kwalakana ne masusu, lwitabijo lwabine mudi Leza ne mu Bible lwenda lujimina lubilolubilo.

Lwitabijo Lwabine

Ku bantu bavule, “lwitabijo” i kwikala’tu na lukulupilo lwa bwine Leza, nansha’tu kulonda mutōtelo kampanda. Ino alo “lwitabijo,” mungya mulombwela Bible, i kukulupila byabinebine​—kikulupiji kikunkane, kyampikwa kutelententa, kitūdile muntu mudi Leza ne mu milao yandi. I ngikadilo iyukanya mwanā-bwanga wa Yesu Kidishitu.

Kyaba kimo, Yesu Kidishitu wānene amba i biyampe kulombela ne “kupungilapo mpika.” Wāipangula ne kipangujo kya kuyuka shi lwitabijo lwabine lukekala’ko mu ano etu mafuku. Amba: “Mwanā muntu pa kwiya lelo ukatāna [luno] lwitabijo panopantanda’ni?” Mwanda waka wāipangwile kino kipangujo?​—Luka 18:1, 8.

Kujimija Lwitabijo

Kudi bintu bivule bibwanya kujimijija bantu lwitabijo lwabo. Mu bino bintu mubadilwa mutyima kupepa ne byamalwa bya bukile bukya. Kifwa Polofesele Michael Goulder, wādi mumpele pa palwase ya Manchester, mu Angeletele, mu kitatyi kyāfwile batei ba mu ekipe yādi Mīkutyile Umbumo ya futubolo ya mu Manchester mu kimpengele kya kutema kwa amviyo wa bene Alemanye mu 1958. Mu bintu byādi bilombolwa ku televijo ya BBC, muneni wa misapu Joan Bakewell wāshintulwile amba Goulder “watenekwa bininge pa kumona bukatampe bwa njia idi na bantu.” Enka namino, wafula “ku kujimija lwitabijo lwandi mudi Leza wikuja mu myanda ya bantu.” Ponka’po Goulder wālupwila patōka lukulupilo lwandi amba “Bible ke . . . kinenwapo kya Leza kekibepa,” ino amba i “kinenwa  kya bantu kibepa, nansha shi tubishima twa ku bukomo bwa mushipiditu wa Leza twikale’mo, kadi twikala’tu tubala-tunga, kamo pano kamo popa.”

Dimodimo lwitabijo lubwanya kujimankana. Kino kyo kyāfikile Ludovic Kennedy, mulembi kadi mwisambi wa ku ladiyo. Unena amba tamba ku bwanuke, kwandi “kutatana ne kwalakana [pa mwanda utala Leza] kwadi ku[mw]iya ku mutyima kyaba ne kyaba, ne kubulwa lwitabijo kwa[nd]i nako enka nabya kwenda kutama.” Mwaadi umwena, kekudipo muntu wadi ubwanya kumupa malondololo atondwa ku bipangujo byandi. Lufu lwafwile shandi pa dijiba kyadi kimpumpu kikatampe kyapitwile lwitabijo lwandi lwadi kala luzoze bininge. Milombelo yalombelwe kudi Leza amba “witulame ku byaka bya pa dijiba ne ku bukalabale bwa wa lwana” keyalondolwelwepo, mwanda masua a mema adi’mo shandi afyontakanibwe ne konakanibwa na masua a bulwi a bene Alemanye mu Divita dya II dya Ntanda.​—All in the Mind—A Farewell to God.

Myanda ya uno muswelo ke myenipo. Mutumibwa Polo unena’mba: ‘Lwitabijo ke kintupo kya bantu bonso.’ (2 Tesalonika 3:2) Lelo nobe ulanga’po namani? Le lwitabijo lwabine mudi Leza ne mu Kinenwa kyandi lukibwanika kwikala nalo mu ino ntanda mwenda muvudila’ko bantu basenswe kwalakana? Bandaula binena kishinte kilonda’ko pa uno mwanda.