Kwisakila kubwanya kuleta mboloji. Muntu wisakila umonanga’nka bulēme bwandi. Wimonanga bu mutabuke bakwabo, ne kumona bantu kebadipo bwa aye bu ba munshi. Muntu ense ubwanya kupya mu dino dikinga. Dibuku dimo The Encyclopædia Britannica dinena’mba: “Bantu ba bibidiji bivule bamwene amba būmi bwabo, byakudya byabo, bivwalwa, bibidiji, nkulupilo, ngikadila ne bikwabokwabo, i bitabuke bya bantu bakwabo.” Le i muswelo’ka otubwanya kuleka uno mulangilo mubi?

“Na kwityepeja, monai bakwenu amba i bemupite bukatampe.”​—BENE FIDIPAI 2:3.

Le ushintulula bika? Pa kuleka kwitemba bipitepite, tufwaninwe kwikala betyepeje. Kwityepeja kwitulengejanga tumone amba bakwetu i betupite mu bintu kampanda bya mu būmi. I kutupu bantu kampanda badi na ngikadila ne bwino bonso buyampe.

Tulangulukilei pa kimfwa kya Stefan. Watamīne mu ntanda ya Kikoministe, ino walekele milangwe ya mboloji pa bantu kebadipo mu  matanda a Kikoministe. Unena’mba: “Nkulupile amba kumona bakwetu bu bampite kudi na mvubu pa kuleka mboloji. Nkyadipo ndyukile kintu. Mbwanya kuboila ñeni kudi muntu ye-yense.”

Longa bukomo bwa kwimona biyampe ne kwitabija’mba nobe uloñanga bilubo. Yuka’mba bakwenu badi na bukomo bwa kulonga bintu byokubwanyapo kulonga. Kokalanga’mba bantu bonso ba mutamba kampanda badi na tuto tumo.

Pa kyaba kya kufula ku kunenena bantu ba ku mwine mutamba’wa bibi, wiipangule amba:

• ‘Le ngikadila mine yonshikilwe idi na muntu i mibi bine, nansha i kwishila’tu?’

• ‘Le uno muntu nandi ubwanya kumboya bilubo?’

• ‘Le uno muntu i mumpite mu bika?’

Shi ulondolole bino bipangujo pampikwa budimbidimbi, ukaleka kwikala na mboloji ne kumona bintu byobwanya kusangela mu muntu.