Bwanga bwa Kupwa Mboloji Lonso
Bantu midiyo ne midiyo bengidijanga misoñanya idi mu bishinte bishele kunyuma’bi, kadi i babwanye kutalula mboloji mu mityima yabo. Inoko na bubine, ketubwanyapo kupwa mboloji yonso batwe bene. Le penepa kekukidipo lukulupilo?
Buludiki Buyampe
Maludiki a bantu keabwenyepo kupwa mboloji mu bantu. Ino le ko kunena’mba i kutupu buludiki bubwanya kupwa mboloji?
Buludiki bubwanya kupwa mboloji bufwaninwe
1. Kukankamika bantu bashinte mulangilo wabo ne muswelo obamona bakwabo.
2. Kundapa bilonda bilengeja bantu bakomenwe kumona bakwabo biyampe.
3. Kwikala na bambikavu bayampe bamona’mba bana ba kibundi badi mu ludingo lumo.
4. Kukutyila bantu ba mizo yonso mu bumo.
Bible witukulupija’mba Leza ke mutūle’ko buno buludiki. Bwitwanga bu “Bulopwe bwa Leza.”—Luka 4:43.
Tulangulukilei pa byobya bisa kuleta buno buludiki.
1. Bufundiji buyampe kutabuka
“Bekadi ba pa ntanda befundanga boloke.”—ISAYA 26:9.
“Ndoe ikalupuka ku boloke bwa bine, kadi bipa bikalupuka ku boloke bwa bine i kwikala ku matwi talala ne mutyima-ntenke wa myaka na myaka.”—ISAYA 32:17.
Le ushintulula bika? Bulopwe bwa Leza bukafundija bantu byobya biyampe. Kitatyi kiyuka bantu kiyampe ne kibi, boloke ne bukondame, muswelo obamona bakwabo ushintanga. Bonso baketabija’mba kintu kiyampe kya kulonga i kusanswa bantu ba miswelo yonso.
2. Kupwa Bukondame
Leza “ukapampulanga impolo yonso mu meso abo, ne lufu kelukekala’kopo dikwabo, nansha madilo nansha miyoa nansha misanshi mine keikekala’kopo monka. Bintu bya kala bibapu kupita.”—KUSOKWELWA 21:4.
Le ushintulula bika? Bulopwe bwa Leza bukapwa misanshi yonso itamba ku bukondame. Boba badi basusulwa pa kala, kebakekalapo monka na bubinga bwa kwikadila na kīji.
3. Muludikilo Muyampe
“Kakatyibepo mambo mwendele byobya bimweka ku meso andi, nansha kudingila’tu mungya byobya bivwana matwi andi. Ukatyibila bapēlulwe mambo na boloke, kadi ukadingila na boloke pa mwanda wa betyepeje ba pano pa ntanda.”—ISAYA 11:3, 4.
Le ushintulula bika? Yesu Kidishitu, Mulopwe wa Bulopwe bwa Leza bwa mūlu, ukaludika ntanda biyampe kadi pampikwa mboloji. Yesu kamwenepo amba muzo kampanda i mutabuke muzo mukwabo, ne kadi ubwanya kuyuka shi bantu ba ntanda yonso bakōkele bijila byandi byoloke.
4. Bumo
Bulopwe bwa Leza bufundijanga bantu bekale “na ñeni imo yonka ne buswe bumo bonka, [bekele] mu bumo senene, na ñeni imo yonka.”—BENE FIDIPAI 2:2.
Le ushintulula bika? Bumo bwa bantu ba mu Bulopwe bwa Leza kebukekalapo bwa kajilwilo. Bakekala mu “bumo senene,” mwanda bakesanswa bya binebine abo bene na bene.
