Twifundanga Myanda ya Leza Kupityila ku Bapolofeto Bandi
Pa kala, Leza wāpele bapolofeto bandi misapu ya mvubu ya kusapwila bantu. Le ino misapu itulombola muswelo wa kweselwa na Leza? En-en. Tutalei ñeni yotubwanya kuboila ku bapolofeto basatu ba kikōkeji.
ABALAHAMA
Leza kadipo na mboloji kadi usakanga kwesela bantu bonso.
Leza wālaile mupolofeto Abalahama amba, “bisaka byonso bya pano pa nshi bikeselwanga binebine kupityila kudi abe.”—Ngalwilo 12:3.
Le i ñeni’ka yotuboila’ko? Leza witusenswe bininge kadi usakanga kwesela bisaka byonso—bana-balume, bana-bakaji ne bana bamukōkele.
MOSESA
Leza i wa lusa kadi weselanga boba balonga bukomo bwa kumuyuka.
Mwinē Bukomo Bonso wāpele mupolofeto Mosesa bukomo bwa kulonga bingelengele bikatampe. Kadi, Mosesa wālombēle amba: “Ndyukije mashinda obe, amba nkuyuke abe kadi untōkelwe mutyima nyeke.” (Divilu 33:13) Leza wālondolwele milombelo ya Mosesa, wāmupa buyuki buvule ne kumukwasha ayuke mashinda andi ne ngikadila yandi. Kimfwa, Mosesa wāyukile amba Umpangi i “Leza wa lusa ne kanye.”—Divilu 34:6, 7.
Le i ñeni’ka yotuboila’ko? Leza usakanga kwitwesela batwe bonso—bana-balume, bana-bakaji, ne bana—shi tulonga bukomo bwa kumuyuka biyampe. I mwitulombole mu Bisonekwa Bijila muswelo wa kumutōta ne amba usakanga kwitwesela ne kwitwitabija.
YESU
Yesu wābelwile na lusa misongo ya miswelo yonso
Tubwanya kweselwa na Leza madyese a nyeke shi twifunde myanda ya Yesu, bintu byaālongele ne byaāfundije.
Mu Kinenwa kya Leza mudi myanda mivule ya būmi bwa Yesu ne bufundiji bwandi. Leza wāpele Yesu bukomo bwa kulonga bingelengele bivule, kimfwa kubelula bampofu, ba bitwi ne babilema. Kadi wāsangwile ne bafwe. Mu uno muswelo, Yesu wālombwele amba Leza ukesela bantu bonso mu mafuku a kumeso. Wālombwele muswelo otubwanya kweselwa ano madyese paānenene amba: “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.”—Yoano 17:3.
Yesu wādi muntu wa lusa, wa kanye kadi muyampe. Bana-balume ne bana-bakaji, bankasampe ne batame, bāungwidile kwadi paēbetyile amba: “[Boilai] ñeni kondi, mwanda ngidi na ngikadila italala ne mutyima wa kwityepeja, kadi mukamona kutūja.” (Mateo 11:29) Kwishila na bantu ba mu kyandi kitatyi bādi basusula bana-bakaji, Yesu aye wādi wikele biyampe na bana-bakaji kadi mwibalēmeke.
Le i ñeni’ka yotuboila’ko? Yesu wālombwele amba usenswe bantu bininge, kadi washile kimfwa kiyampe kya motufwaninwe kwikadila batwe bene na bene.
YESU KE LEZAPO
Bisonekwa Bijila bifundija’mba “na bubine kotudi batwe kudi Leza umo kete,” ne amba Yesu Kidishitu wādi mukendi mwityepeje wa Leza. (1 Bene Kodinda 8:6) Yesu wālombwele patōkelela’mba, Leza i mumutabuke bukatampe, ne amba i Leza wāmutumine pano pa ntanda.—Yoano 11:41, 42; 14:28. *
^ mus. 17 Shi usaka kuyukila’ko myanda mivule ya Yesu Kidishitu, tala kipindi kya 8 ne 9 kya boloshile La vraie foi : le chemin qui mène au bonheur kidi pa Entelenete pa www.jw.org.
Tala'po Bidi ne Bino:
BIPANGUJO BYA MU BIBLE BILONDOLWELWE
Le Yesu I Leza Mwinē Bukomo Bonso?
Le Yesu wānenene bika pa mwanda utala kifuko kyandi kumeso a Leza?
