1. Mwanda waka Yesu wādingakenye balondi bandi na mikōko?

 YESU wādingakenye kipwano kyaādi upwene na balondi bandi, na kipwano kikalanga pa bukata bwa mukumbi ne mikōko yandi. (Yoano 10:14) Kuno kudingakanya i kwendele’mo. Mikōko iyukile mukumbi wayo, kadi ivwananga diwi dyandi. Munangi umo wemwenine uno mwanda. Unena’mba: “Twadi tusaka kukwata mikōko imo foto, ketwiite itufwene. Ino keyailepo kwitwitaba mwanda keyadipo iyukile mawi etu. Ino mukumbi umo nkasampe waiya, weita’tu na diwi dityetye, kala keimulonda.”

2-3. (a) Le balondi ba Yesu balombolanga namani amba bevwananga diwi dyandi? (b) Le i bika byotusa kwisambila’po mu kino kishinte ne mu kilonda’ko?

² Ino myanda yemwenine uno munangi ituvuluja binenwa byānenene Yesu pa mikōko yandi​—ke bandi bana ba bwanga kadi. Wānenene amba: “Ikevwananga diwi dyami.” (Yoa. 10:16) Ino pano Yesu udi mūlu. Penepa, i muswelo’ka otubwanya kumwivwana? Muswelo umo bidi otukalombola’mba twivwananga diwi dya Mfumwetu, i na kulonda bufundiji bwandi mu būmi bwetu.​—Mat. 7:24, 25.

³ Mu kino kishinte ne mu kilonda’ko, tusa kwisambila pa bufundiji bumobumo bwa Yesu. Enka na motusa kwikimwena, Yesu wētufundije bintu byotufwaninwe kulonga ne byoketufwaninwepo kulonga. Dibajinji bidi tusa kwisambila pa bintu bibidi byētupeleje mukumbi wetu mulumbuluke kulonga.

4. Mungya Luka 12:29, le i bika bibwanya ‘kwituseleja mutyima kūlu’?

⁴ Tanga Luka 12:29. Yesu wāsoñenye balondi bandi baleke “kusela mutyima kūlu” pa bisakibwa bya ku ngitu. Tuyukile amba madingi a Yesu i a tunangu kadi i mayampe nyeke. Tusakanga kwiengidija, inoko kyaba kimo tukomenwanga kwiengidija. Mwanda waka?

5. Le i bika bibwanya kulengeja bantu bamo basele mutyima kūlu pa bisakibwa byabo bya ku ngitu?

 ⁵ Bantu bamo babwanya kusela mutyima kūlu pa mwanda wa bisakibwa byabo bya ku ngitu, kimfwa bya kudya, bivwalwa, ne mwa kwikala. Padi bashikatanga mu matanda malanda. Babwanya kukomenwa kusokola lupeto lwa kuvuija bisakibwa bya bisaka byabo. Nansha kadi muntu usasaketanga kisaka ubwanya kufwa, ebiya kisaka kyakomenwa kusokola lupeto lwa kwikwatakanya nalo. Kipupo kya COVID-19 nakyo kibwanya kulengeja twaji twa bantu tupwe, ebiya bakomenwa misokwe. (Mus. 9:11) Le i muswelo’ka otubwanya kulonda madingi a Yesu a kuleka kusela mutyima kūlu shi tubatanwa na ano makambakano nansha makwabo?

6. Sekununa myanda yātene Petelo difuku dimo.

⁶ Difuku dimo, mutumibwa Petelo ne batumibwa bakwabo bādi mu bwato pa Dijiba dya Ngadilea mu kivula kikatampe, bāmona Yesu wenda ulandala pa mema. Petelo wāmunena’mba: “A Mfumwami, shi i abewa, ngite nami ngiye kodi nandala pa mema.” Yesu pa kumwita’mba “iya,” Petelo wātūka mu bwato “kalandala pa mema wenda dya kudi Yesu.” Tala byālondele’po. Petelo “pa kutala kimpumpu kya luvula’kya, moyo wamukwata. Kadi aye pa kushilula kushika, waela lwanji amba: ‘A Mfumwami, mpandije’po!’” Yesu wāolola  kuboko wāmupandija. Tuvulukei amba shi Petelo wāendelele kutala enka Yesu, wādi wa kubwanya kulandala pa mema matomboke. Ino Petelo byaātadile ku kivula wālēmenenwe na moyo, wāshilula kushika.​—Mat. 14:24-31.

7. Le i ñeni’ka yotubwanya kuboila ku kimfwa kya Petelo?

⁷ Kudi ñeni yotubwanya kuboila ku kimfwa kya Petelo. Petelo paātūkile mu bwato waanza kulandala pa dijiba, kādipo ulanga’mba kudi kintu kisa kumulabika anze kushika. Wādi na kitungo kya kulandala pa mema enka ne byafika kudi Mfumwandi. Ino wākomenwe kufikila pa kino kitungo. Shako, batwe ketubwanyapo kulandala pa mema, inoko lwitabijo lwetu nalo lutompibwanga. Shi netu tukomenwe kutala kudi Yehova ne ku milao yandi, lwitabijo lwetu nalo lukazoza. Nanshi, nansha shi tubafikilwa na kivula kya kyelekejo kya muswelo’ka mu bwetu būmi, tukulupilei nyeke Yehova ne kwitabija‘mba udi na bukomo bwa kwitukwasha. I muswelo’ka otubwanya kulonga kino?

8. Le i bika bibwanya kwitukwasha tuleke kusela mutyima kūlu bininge pa bisakibwa byetu bya ku ngitu?

⁸ Tukamwena’mo shi tukulupile mudi Yehova pa kyaba kya kusela mutyima kūlu. Tuvulukei amba Yehova, Tata wetu wa buswe i mulae amba ukavuija bisakibwa byetu bya ku ngitu shi tutangidije kumeso bintu bya ku mushipiditu. (Mat. 6:32, 33) Aye ufikidijanga nyeke uno mulao. (Kup. 8:4, 15, 16; Ñim. 37:25) Shi Yehova uvuijanga bisakibwa bya toni ne bya maluba, nanshi bine, ketudipo kya kuselela mutyima kūlu pa bya kudya ne bya kuvwala! (Mat. 6:26-30; Fid. 4:6, 7) Monka muvuijijanga bambutwile bisakibwa bya ku ngitu bya babo bana mwanda bebasenswe, ne Tata wetu wa mūlu nandi uvuijanga bisakibwa bya ku ngitu bya bantu bandi mwanda wibasenswe. Bine, tukulupilei amba Yehova uketukwatakanya!

9. Le mwanda watene ba mulume ne mukaji bamo witufundija bika?

⁹ Tulangulukilei bidi pa bimfwa bilombola muswelo uvuijanga Yehova bisakibwa byetu bya ku ngitu. Ba mulume ne mukaji bamo badi mu mwingilo wa kitatyi kyonso, badi bendanga na motoka wabo mukulu lwendo lwa nsá umo kukasela bakaka badi bashikata mu kifuko kya balefije mwanda wa kwenda nabo ku kupwila. Tutu washintulwile amba: “Difuku dimo pa kupwa kupwila twaityile bano bakaka tukadye nabo byakudya, ino twajingulula’mba ketwadipo na byakudya bya kwibapa.” Le bano ba mulume ne mukaji badi ba kulonga namani? Tutu wabwejeje’ko amba: “Batwe pa kufika ku njibo, twatana betutūdile pa mulango bivwe bibidi bikatampe biyule bya kudya. Ketwayukilepo mwine wetutūdīle’byo. Yehova wavuije bisakibwa byetu.” Kitatyi pa kupita’po, motoka wa bano ba mulume ne mukaji wafwa. Wadi wibakwasha mu busapudi; ino kebadipo na lupeto lwa kulongolweja’o. Abo pa kukeutūla kwa wa kwiulongolola mwanda wa bayuke usa kulomba inga, muntu umo waiya webepangula’mba: “Le uno motoka i wa ani?” Tutu walondolola’mba i wandi, abaiya kwiulongolola. Uno muntu wamulondolola’mba: “Ke mwandapo. Wami mukaji ukimba motoka wa uno muswelo kadi enka wa uno musombelo. Le musaka nemupote’o inga?” Tutu wamupotoloja uno motoka ku lupeto lubwanya kupota motoka mukwabo. Uno tutu wanenene ku mfulo amba: “Twasangele bininge dine difuku’dya. Twayukile amba uno mwanda kewalongekelepo’tu bitupu. Ino i Yehova wetukweshe.”

10. Le Ñimbo ya Mitōto 37:5, itukankamika namani tuleke kusela mutyima kūlu pa bisakibwa byetu bya ku ngitu?

¹⁰ Shi tuteja mukumbi mulumbuluke ne kuleka kusela mutyima kūlu bininge pa bisakibwa  byetu bya ku ngitu, nabya tukulupilei amba Yehova ukavuija bisakibwa byetu. (Tanga Ñimbo ya Mitōto 37:5; 1 Pe. 5:7) Tulangulukilei bidi pa makambakano atelelwe mu  musango wa 5. Mu kino kitatyi Yehova ubwanya kwingidija mutwe wa kisaka, nansha mukulu wa kaji pa kwitukwasha tuvuije bisakibwa byetu bya difuku ne difuku. Shi mutwe wa kisaka kakibwanyapo kuvuija bisakibwa nansha kadi shi tubajimija kaji, Yehova ukavuija bisakibwa byetu mu muswelo mukwabo. Tukulupilei’tu amba ukebivuija. Pano, twisambilei pa kintu kikwabo kya kuleka kulonga kitusoñenye mukumbi mulumbuluke.

11. Mungya Mateo 7:1, 2, le Yesu wētulombwele tuleka kulonga bika ne mwanda waka bibwanya kwikala bikomo?

¹¹ Tanga Mateo 7:1, 2. Yesu wādi uyukile’mba bantu bampikwa kubwaninina bādi bamuteja, bavudile kuta mutyima ku bilubo bya bakwabo. O mwanda wānenene amba: “Lekai kutyibila ba mambo.” Padi tuloñanga bukomo bwa kuleka kutyibila banabetu mu lwitabijo mambo. Inoko batwe bonso twi ba kubulwa kubwaninina. Ino shi kyaba kimo tubajingulula’mba tufutululanga bakwetu, le i bika byotufwaninwe kulonga? Twivwanei Yesu ne kulonga bukomo bwa kuleka kutyibila bakwetu mambo.

12-13. Le kulangulukila pa muswelo obādi bamwene Mulopwe Davida kudi Yehova, kubwanya kwitukwasha namani tuleke kutyibila bakwetu mambo?

¹² Kulangulukila pa kimfwa kya Yehova kubwanya kwitukwasha. Aye utanga mutyima ku biyampe bidi mu bantu. Kino i kimwekele mu muswelo waādi wikele na Mulopwe Davida, muntu wālongele bilubo bikatampe. Kimfwa, wālongele makoji na Bafesheba, kadi wāipaija ne wandi mulume. (2 Sa. 11:2-4, 14, 15, 24) Davida pakulonga namino, kēsanshijepo enka aye mwine, ino wāsanshije ne kyandi kisaka ne bandi bakaji bakwabo. (2 Sa. 12:10, 11) Kadi musunsa mukwabo Davida wākomenwe kukulupila mudi Yehova paāsoñenye babale kibumbo kya bulwi kya bene Isalela pampikwa kusoñanibwa. Padi mitatulo ne kukulupila mu buvule bwa basola bandi, byo byāmulengeje alonge namino. Le byāfudile namani? Kintu kya bene Isalela 70 000 bāfwa ku kipupo kya misongo!​—2 Sa. 24:1-4, 10-15.

¹³ Shi mu kine kitatyi’kya wādi mu Isalela, le wādi wa kumona Davida namani? Le wādi wa kumumona bu muntu kafwaninwepo kufwilwa lusa na Yehova? Yehova kāmumwenepo uno muswelo. Aye wātele mutyima ku kikōkeji kya tamba kala kyādi na Davida ne ku kwisāsa kwāesāshile bya binebine. Ebiya, Yehova wālekela Davida buno bubi bukatampe. Yehova wādi uyukile’mba Davida wādi umusenswe bya binebine, kadi wādi usaka kulonga byoloke. Le ubulwepo kufwija’ko Leza pa kukimba kwakimba biyampe bidi motudi?​—1 Ba. 9:4; 1 Bi. 29:10, 17.

14. Le i bika bikakwasha bene Kidishitu baleke kutyibila bakwabo mambo?

¹⁴ Shi Yehova ketusakilangapo twikale babwaninine, nanshi netu ketufwaninwepo kusakila bakwetu bekale babwaninine, kadi tufwaninwe kutala ngikadila miyampe yobadi nayo. Divule dine, bipēlanga kumona kubulwa kubwaninina kwa bakwetu ne kwikala na kafutululo. Inoko muntu mutame ku mushipiditu, ubwanya kumona kuno kubulwa kubwaninina ino walonga bukomo bwa kwikala biyampe na bakwabo. Dyama dyampikwa kukundula dibwanya padi kwikala na butyafu, inoko muntu wa tunangu kakatepo mutyima ku butyafu bwadyo, ino ukata’o ku mvubu yodikekala nayo shi dibapu kukundulwa  ne kusungululwa. Pamo bwa ba Yehova ne Yesu, netu ketufwaninwepo kuta mutyima ku mumwekelo wa panja wa bantu, ino tutei’o ku ngikadila miyampe yobadi nayo.

15. Le kuta mutyima ku ngikadilo idi’mo bantu, kubwanya kwitukwasha namani tuleke kwibatyibila mambo bukidibukidi?

¹⁵ Kutentekela pa kuta mutyima ku ngikadila miyampe ya bakwetu, le i bika bikwabo bibwanya kwitukwasha tuleke kwibatyibila mambo bukidibukidi? Longa bukomo bwa kuyuka mwikadile bwabo būmi. Tulangulukilei bidi pa kino kimfwa. Difuku dimo ku tempelo, Yesu wāmwene mukaji wa kishala umo mufudile wela tubityele tubidi twa mvubu mityetye mu kilambwilo. Kāipangwilepo amba: “Mwanda waka kelele’mopo bivule?” Pa kyaba kya kuta mutyima ku buvule bwa lupeto lwāletele uno mukaji wa kishala, Yesu wātele mutyima ku kine kyāmulengeje alete’lo ne ku ngikadilo yaādi’mo, ebiya wāmutendela pa bukomo bwaālongele.​—Luka 21:1-4.

16. Le kimfwa kya Veronica kikufundija bika?

¹⁶ Kimfwa kya kaka Veronica kibwanya kwitukwasha tumone amba kuta mutyima ku ngikadilo idi’mo bakwetu kudi na kamweno. Wadi mu kipwilo kimo na kaka wadi ulelele wandi mwana mwana-mulume kasuku. Veronica unena’mba: “Nadi nebamona’mba kebeelelepo mu mingilo ya ku mushipiditu. Pa kino, nadi nebamona bibi. Ino nasapula na  uno kaka. Ebiya waunombola makambakano awadi wikonda nao na uno wandi mwana mujinwe ñeni. Wadi wielela’ko kuvuija bisakibwa byabo bya ku ngitu ne bya ku mushipiditu. Kitatyi kimo, byadi bimulomba kukapwila na kipwilo kikwabo mwanda wa misongo ya wandi mwana.” Veronica wafudile ku kunena’mba: “Nkyadipo ndyukile’mba o makambakano aekonda nao. Pano, nsenswe uno kaka bininge kadi mulēmekele pa bukomo bwalonga mwanda wa kwingidila Yehova.”

17. Le kisonekwa kya Yakoba 2:8 kitusoñanya tulonge bika, ne tubwanya kwibilonga namani?

¹⁷ Le tufwaninwe kulonga bika shi tubamone amba, kudi mwanetu mu lwitabijo otumona bibi? Tufwaninwe kuvuluka’mba tunenwe kusanswa banabetu. (Tanga Yakoba 2:8.) Kadi tufwaninwe kulomba Yehova bininge, tumuzenze etukwashe tuleke kumutyibila mambo. Ne kadi tubwanya kulonga bintu mungya milombelo yetu na kwisamba na mwanetu otumona bibi’wa. Kulonga namino kuketukwasha tumuyuke. Tubwanya kumunena tukasapule nandi nansha kumwita āye tudye nandi byakudya. Shi tubayuka uno mwanetu biyampe, tukabwanya kulonda kimfwa kya ba Yehova ne Yesu, na kuta mutyima ku ngikadila yandi miyampe. Shi tulonga namino, tukalombola’mba twivwananga musoñanya wa mukumbi mulumbuluke, wa kulela kutyibila ba mambo.

18. Le i muswelo’ka otubwanya kulombola’mba twivwananga diwi dya mukumbi mulumbuluke?

¹⁸ Monka mwivwaninanga mikōko diwi dya mukumbi wayo, balondi ba Yesu nabo bevwananga diwi dyandi. Shi tulonge bukomo bwa kuleka kusela mutyima kūlu pa bisakibwa bya ku ngitu ne bwa kuleka kutyibila bakwetu mambo, ba Yehova ne Yesu baketwesela pa bukomo botulonga. Nanshi batwe bonso “kaluombe katyetye” ne “mikōko mikwabo,” twendelelei kwivwana ne kukōkela diwi dya mukumbi mulumbuluke. (Luka 12:32; Yoa. 10:11, 14, 16) Mu kishinte kilonda’ko, tusa kwisambila pa bintu bibidi byobāsoñenye balondi ba Yesu kulonga kudi Yesu mwine.