1. Mwanda waka tubwanya kunena’mba tudi mu kitatyi kya kasekuseku?

 TUDI mu kitatyi kya kasekuseku! Difuku ne difuku, twimwenanga kufikidila kwa bupolofeto bwa mu Bible. Kimfwa, tumonanga “mulopwe wa kungala” ne “mulopwe wa kunshi” belwa mwanda wa kutādila ntanda. (Dan. 11:​40, kunshi kwa dyani.) Tumonanga myanda miyampe ya Bulopwe bwa Leza isapulwa mu muswelo kewamwekele kashā, ne bantu midiyo ne midiyo batonga kwingidila Yehova. (Isa. 60:22; Mat. 24:14) Kadi tutambulanga byakudya bivule bya ku mushipiditu “pa kitatyi kifwaninwe.”—Mat. 24:​45-47.

2. Le i bika byotubwanya kukulupila, ino i bika byotufwaninwe kwitabija?

² Yehova wendelelanga kwitukwasha twivwanije biyampe binkumenkume bikatampe bisa kulongeka panopano kumeso’ku. (Nki. 4:18; Dan. 2:28) Tubwanya kukulupila’mba pakashilula kyamalwa kikatampe, tukayuka bintu byonso byotunenwe kuyuka pa kusaka’mba tūminine na kikōkeji ne kushala nyeke mu bumo mu kino kitatyi kya makambakano. Inoko, tufwaninwe kwitabija’mba kudi bintu bimo byoketuyukilepo pa bisa kulongeka kumeso’ku. Mu kino kishinte, tusa kubandaula’mo dibajinji kine kyotwajadikila byotwanenene pa binkumenkume bimo pa bino’bi. Kupwa, tusa kubandaula bintu bimo byotuyukile pa bisa kulongeka kumeso’ku ne mukalongela’po Tata wetu wa mūlu.

BYOKETUYUKILEPO

3. Le twanenene amba i kitatyi’ka kekikekalapo bantu na mukenga wa kulombola lwitabijo mudi Yehova, ne mwanda waka twafudile ku uno mulangwe?

³ Mafuku kunyuma twanenene amba shi’tu kyamalwa kikatampe  kibashilula, i kutupu muntu nansha umo wa kubulwa kwitabija ukamona mukenga wa kulombola lwitabijo lwandi mudi Yehova ne kupanda pa Amakedona. Twafudile ku uno mulangwe mwanda twaivwanije amba nsekununi ya Dilobe yādi na nshintulwilo ya bintu bikalongeka mu mafuku a kumeso. Kimfwa, twalangile amba monka kemwābwaninyepo muntu nansha umo kutwela mu safina pāpwile Yehova kushita kibelo, mo monka kemukabwaninyapo muntu nansha umo kulombola lwitabijo mudi Yehova ne kupanda pakashilula kyamalwa kikatampe.—Mat. 24:​37-39.

4. Le pano tumona’mba nsekununi ya Dilobe yādi na nshitulwilo yayo ya mu mafuku a kumeso? Shintulula.

⁴ Lelo tufwaninwe kumona nsekununi ya Dilobe bu kipindi kya bupolofeto bwa mu mafuku a kumeso? Ke amopo. Mwanda waka? Mwanda kekudipo bubinga bwa mu Bisonekwa bwitulengeja tunene nankyo. a Yesu wādingakenye “mafuku a Noa” na kwikala’po kwandi, inoko kālombwelepo amba Dilobe dyādi na nshintulwilo ya mu mafuku a kumeso, bine bilombola’mba muntu ne muntu nansha mwanda ne mwanda wālongekele pa Dilobe byādi bishintulula kintu kampanda kikalongeka mu mafuku a kumeso; kadi kānenenepo amba kushitwa kwa kibelo kya safina kwādi na nshintulwilo kampanda ya bupolofeto. Inoko, kino kekishintululapo amba ketubwanyapo kuboila ñeni ku nsekununi ya Noa ne Dilobe.

5. (a) Le i kilongwa’ka kyālongele Noa kumeso kwa Dilobe? (Bahebelu 11:7; 1 Petelo 3:20) (b) Le pa mwanda utala mwingilo wa busapudi, ngikadilo yetu idingakene namani na ya mu mafuku a Noa?

⁵ Noa paāivwene musapu wa Yehova wa  butyibi, wālombwele lwitabijo lwandi na kūbaka safina. (Tanga Bahebelu 11:7; 1 Petelo 3:20.) Ne bantu bevwana myanda miyampe ya Bulopwe bwa Leza, bafwaninwe nabo kulombola lwitabijo lwabo kupityila ku bilongwa. (Bil. 3:​17-20) Petelo wātelele Noa bu “musapudi wa boloke.” (2 Pe. 2:5) Inoko, monka motwamwenine’kyo mu kishinte kibadikile, ketuyukilepo shi Noa wābwenye kusapwila muntu yense pano pa ntanda kumeso kwa Dilobe kufika. Dyalelo twingilanga mwingilo wa kusapula ntanda yonso, kadi tuloñanga bukomo bwa kusapwila bantu bakwabo na bupyasakane. Inoko nansha shi tubalonga bukomo namani, ketubwanyapo kusapwila muntu yense myanda miyampe kumeso kwa mfulo kufika. Mwanda waka?

6-7. Mwanda waka tubafule ku kunena’mba ketukabwanyapo kusapwila muntu yense pano pa ntanda myanda miyampe kumeso kwa mfulo kufika? Shintulula.

⁶ Tubandaulei’ko byānenene Yesu pa mwingilo wetu wa busapudi. Wālaile amba myanda miyampe “ikasapulwa pa ntanda yonso ikelwe na bantu mwanda wa bukamoni ku mizo yonso.” (Mat. 24:14) Buno bupolofeto bufikidilanga bininge mu ano etu mafuku. Musapu wa Bulopwe usapulwanga mu ndimi 1000 ne kupita, kadi bantu bavule pano pa ntanda i bafikilwe na uno musapu kupityila ku site ya jw.org.

⁷ Inoko kadi, Yesu wālombwele bandi bana ba bwanga amba “kemukapupo kujokoloka bibundi byonso,” nansha kusapwila muntu yense kumeso kwa aye kwiya. (Mat. 10:23; 25:​31-33) Bino binenwa bya Yesu bisa kufikidila ne mu ano etu mafuku. Bantu midiyo ne midiyo badi mu bifuko mukankajibwe mwingilo wetu wa busapudi. Kadi bana tutwa na tutwa babutulwanga munite ne munite. Tuloñanga bukomo bwa kusapula myanda miyampe ku bantu ba mu “mizo yonso ne bisaka ne ndimi ne bantu.” (Kus. 14:6) Inoko bubine i amba, ketukabwanyapo kusapwila muntu yense pano pa ntanda myanda miyampe kumeso kwa mfulo kufika.

8. Le i kipangujo’ka kyotubwanya kwiipangula pa butyibi bwa Yehova bwa mu mafuku a kumeso? (Tala ne bifwatulo.)

⁸ Kino kibalupula kipangujo: Le bikekala namani ku boba kebaikelepo na mukenga wa kwivwana myanda miyampe kumeso kwa kyamalwa kikatampe kushilula? Le Yehova ne wandi Mwana watongele mwanda wa kutyibila bantu mambo, ukebatyibila’o namani? (Yoa. 5:​19, 22, 27; Bil. 17:31) Kisonekwa kīmanine’po kino kishinte kinena’mba Yehova “kasakilepo muntu nansha umo oneke.” Inoko, usaka “bonso bafikile pa kwisāsa.” (2 Pe. 3:9; 1 Tm. 2:4) Ko kunena’mba, tufwaninwe kwitabija’mba Yehova ketulombwele muswelo wakatyibila mambo boba kebaikelepo na mukenga wa kwivwana myanda miyampe. Na bubine, kanenwepo kwitulombola bintu byonso byalongele nansha byakalonga.

9. Le i bika bitulombwele Yehova mu Bible?

⁹ Yehova i mwitulombole mu Kinenwa kyandi bintu bimo byakalonga. Kimfwa, Bible witusapwila’mba Yehova ukasangula bantu “bakondame” kebaikelepo na mukenga wa kwifunda myanda miyampe ne kushinta mwiendelejo wabo. (Bil. 24:15; Luka 23:​42, 43) Kino kibalupula bipangujo bikwabo bya mvubu.

10. Le i bipangujo’ka bikwabo byotubwanya kwiipangula?

¹⁰ Le bonso bakafwa pa kyamalwa kikatampe, bakonakanibwa lonso pampikwa lukulupilo lwa lusangukilo? Bisonekwa bilombola patōka’mba balwana na Yehova ne boba bakonakanibwa na bibumbo byandi bya divita pa Amakedona, kebakasangulwapo. (2 Ts. 1:​6-10) Ino le tunene namani pa bantu bakwabo,  kimfwa bamo babwanya kufwa pa kyamalwa kikatampe pa mwanda wa misongo, bununu, ku akishida nansha kwipaibwa na bantu bakwabo? (Mus. 9:11; Zek. 14:13) Le bantu bamo mu bano’ba babwanya kubadilwa mu “bakondame” bakasangulwa mu ntanda mipya? Ketuyukilepo.

BYOTUYUKILE

11. Le i pa bubinga’ka pakatyibilwa bantu mambo pa Amakedona?

¹¹ Tuyukile bintu bivule pa binkumenkume bya kumeso. Kimfwa, tuyukile amba pa Amakedona bantu bakatyibilwa mambo pa muswelo obadi bekele na banababo na Kidishitu. (Mat. 25:40) Boba bakatyibilwa mambo bu mikōko i boba bakwatakenye banababo na Kidishitu. Kadi tuyukile amba banababo na Kidishitu bamo bakekala pano pa ntanda pa kupwa kwa kyamalwa kikatampe kushilula, kadi bakaselelwa mūlu kumeso’tu kwa Amakedona kushilula. Kitatyi kyonso kikekala banababo na Kidishitu pano pa ntanda, bantu ba mutyima muyampe bakekala na mukenga wa kwibakwatakanya abo ne mwingilo obengila. (Mat. 25:​31, 32; Kus. 12:17) Le bino byonso bishintulula bika?

12-13. Le bantu bamo babwanya kukalonga’po namani pobakamona konakanibwa kwa “Babiloni Mukatampe”? (Tala ne bifwatulo.)

¹² Nansha shi kyamalwa kikatampe ke kishilule, bantu bamo babwanya kumona konakanibwa kwa “Babiloni Mukatampe” ne kuvuluka’mba Batumoni ba Yehova badi betusapwila uno mwanda mu bula bwa myaka mivule. Le bamo bakamona kino kinkumenkume bakashinta mumweno wabo?—Kus. 17:5; Ezk. 33:33.

¹³ Shi bamo bakashinte, bikeifwana na byālongekele mu Edipito mu mafuku a Mosesa. Vuluka’mba “kibumbo kikatampe kya bantu basobakane” kyēlungile na bene Isalela pobātambile mu Edipito. Bamo ye bano bāshilwile kulombola lwitabijo pobāmwene kufikidila kwa bidyumu bya Mosesa bitala Mpupo Dikumi. (Div. 12:38) Shi kino kibakalongeka pa kupwa konakanibwa kwa Babiloni Mukatampe, le tukatyumukwa mutyima amba bantu  abelunga netu kitatyi’tu kityetye kumeso kwa mfulo kufika? Aa! Tusakanga kumwekeja bumuntu bwa Tata wetu wa mūlu, “Leza wa lusa ne kanye, wija pa kukwatwa bulobo kadi muyule buswe bwa ndamatyidile ne bubine.” b—Div. 34:6.

14-15. Lelo būmi bwa nyeke bwa kumeso bwa muntu bulondakananga na kitatyi kyafwa nansha kifuko kwashikete? Shintulula. (Ñimbo ya Mitōto 33:​4, 5)

¹⁴ Kyaba kimo batutu ne bakaka babwanya kunena pangala pa muntu wa mu kisaka kengidilapo Yehova amba, “I biyampe shi mubutule wami wafu kumeso kwa kyamalwa kikatampe kushilula mwanda namino kukekala lukulupilo lwa aye kusangulwa.” Ye bano na bubinga buyampe bobanenenanga namino. Inoko būmi bwa kumeso bwa muntu kebulondakanangapo na kitatyi kyafwile. Yehova i Mutyibi mubwaninine, ukwatanga butyibi buyampe kadi boloke. (Tanga Ñimbo ya Mitōto 33:​4, 5.) Tubwanya kukulupila’mba “Mutyibi wa ntanda yonso” ukalonga byoloke.—Ngo. 18:25.

¹⁵ Kadi i byendele’mo kumona’mba būmi bwa kumeso bwa muntu kebulondakanangapo na kifuko kwashikete. Yehova kabwanyapo nansha dimo kutyibila mambo bantu midiyo ne midiyo bu “bambuji” mwanda’po’tu bashikatanga mu matanda mokebaikele kashā na mukenga wa kuteja myanda miyampe ya Bulopwe. (Mat. 25:46) Mutyibi moloke wa ntanda yonso utele bano bantu mutyima bininge kutabuka motwibatedile’o. Ketuyukilepo mukalongela  Yehova bintu pa kyamalwa kikatampe. Padi bantu bamo mu bano’ba bakekala na mukenga wa kwifunda myanda miyampe ne kwikala ku mutamba wa Yehova pākapandula dijina dyandi ku mizo yonso.—Ezk. 38:16.

16. Le i bika byotwayuka padi Yehova? (Tala ne kifwatulo.)

¹⁶ Kupityila ku bwifundi bwetu bwa Bible, tubayuka’mba būmi bwa bantu i bulēme bininge ku meso a Yehova. Wāpene būmi bwa wandi Mwana mwanda wa bantu bonso bekale na mukenga wa kwikala’ko nyeke. (Yoa. 3:16) Batwe bonso twi bemwene kisanso kikatampe kya Yehova. (Isa. 49:15) Uyukile umo ne umo motudi pa dijina dyandi. Wituyukile biyampe, ke-pantu nansha shi tubafu ubwanya kwitusangula mwanda uvulukile kanda ne kanda ketutala ne bivulujo byetu byonso! (Mat. 10:​29-31) Na bubine, tudi na bubinga buyampe bwa kukulupidila’mba, Tata wetu wa mūlu wa buswe ukatyibila muntu ne muntu mambo na bujalale, mu muswelo mubwaninine, wa boloke ne wa lusa.—Yak. 2:13.

17. Le i bika byotukesambila’po mu kishinte kilonda’ko?

¹⁷ Bino bitōkeji bibalengeja mwingilo wetu wa busapudi wikadile’ko wa kampeja-bukidi. Mwanda waka tubanena namino? Ne i bika bitutononanga twendelele kusapula myanda miyampe na bupyasakane? Tukatana malondololo a bino bipangujo mu kishinte kilonda’ko.