1. Lelo i bika bituletelanga nsangaji mivule?

 YEHOVA usakanga twikale na nsangaji. Tubanena namino mwanda nsangaji ibadilwa mu kipa kya mushipiditu wandi ujila. (Ngt. 5:22) Nsangaji ya kupāna byoitabukile ya kupebwa, twivwananga nsangaji kitatyi kyotwingila ne pa mfulo mwingilo wa busapudi ne kukwasha banabetu mu miswelo palapala.​—Bil. 20:35.

2-3. (a) Mungya Bene Ngalatea 6:4, le i bintu’ka bibidi biketukwasha twikale nyeke na nsangaji mu mwingilo wa Yehova? (b) Le i bika byotusa kwisambila’po mu kino kishinte?

² Mungya Bene Ngalatea 6:4, mutumibwa Polo i mutele bintu bibidi biketukwasha twikale nyeke na nsangaji. (Tanga.) Kibajinji, tufwaninwe kupa Yehova bintu bilumbuluke byotudi nabyo. Shi tumupa bintu bilumbuluke bininge byotudi nabyo, tukekala na nsangaji. (Mat. 22:36-38) Kya bubidi, ketufwaninwepo kwidingakanya na bakwetu. Nansha shi tubwanya kulonga kintu kampanda pa mwanda wa bukomo bwetu bwa ngitu, masomo otufundile, nansha bwino bwetu bwa kibutwila, tufwaninwe kufwija’ko Yehova. Ne kadi bidi, bintu byonso byotudi nabyo i bitambe kwadi. Pakwabo napo, shi bakwetu babwanyanga kusapula mu muswelo kampanda kwitupita, tufwaninwe kusangala pa kwingidija kobengidija bwino bwabo mwanda wa kutumbija Yehova, pa kyaba kya kwibwingidija mwanda wa bebamone biyampe nansha pa mwanda wa kamweno ka abo bene. Nanshi, tufwaninwe kuboila ñeni kobadi pa kyaba kya kwitāka nabo.

³ Mu kino kishinte, tusa kwisambila’mo pa byotubwanya kulonga shi tumona’mba ketukokejapo kulonga kintu kampanda mu mwingilo wetu. Kadi, tusa kumona muswelo otubwanya kwingidija kyabuntu kyo-kyonso kyotudi nakyo, ne ñeni yotubwanya kuboila ku bimfwa bya bakwetu.

4. Lelo i bintu’ka bibwanya kwitutyumuna mutyima? Leta kimfwa.

⁴ Bantu bamo motudi, kebakibwanyapo kulonga bintu byobadi basaka kulonga mu mwingilo wa Yehova pa mwanda wa bununu nansha misongo. Bino byo byatene ne Carol. Kyaba kimo wadi na dyese dya kwingila kokwa kusakilwa basapudi bavule. Mu kine kitatyi’kya waendeje bifundwa bya Bible 35, ne kukwasha bantu bavule bepāne ne kubatyijibwa. Carol walupwile bipa biyampe mu busapudi! Kupwa wabela kashikete kijabanda ku njibo. Carol unena’mba, “ndyukile amba pa mwanda wa misongo yami, nkibwanyapo kulonga bilonga bakwetu, inoko nemonanga bu nkikidipo mwine Kidishitu muyampe pamo bwa abo. Nkikibwanyapo kulonga byobya byonsaka kulonga, kadi kino kintyumunanga mutyima.” Carol usakanga kulonga bivule mu mwingilo wa Yehova. O mwanda ufwaninwe kufwijibwa’ko! Bine, tubwanya kukulupila’mba Leza wetu wa lusa, usangedile byonso byabwanya kulonga.

5. (a) Le i bika byotufwaninwe kuvuluka shi tubatyumukwa mutyima pa mwanda wa byobya byoketubwanyapo kulonga? (b) Monka motwebimwena pa bifwatulo, le uno tutu wingidijanga namani bukomo bwandi mu mwingilo wa Yehova?

⁵ Shi kyaba kimo utyumukwanga mutyima pa mwanda wa byobya byokubwanyapo kulonga, wiipangule amba, ‘lelo i bika binsakila Yehova kulonga?’ Yehova ukusakilanga ulonge byobya byobwanya—mungya ngikadilo yodi’mo. Tulangulukilei bidi pa uno mwanda: Kaka umo wa myaka 80 ne kupita watyumukwa mutyima mwanda kakibwanyapo kusapula bininge na mwaadi usapwila paadi na myaka 40 ne kupita. Kalanga’mba, nansha byalonga bukomo bwandi bonso, kakokejapo kusangaja Yehova. Le i bya bine? Tulangulukei’po bidi. Shi uno kaka wadi wingidila Leza mungya bukomo bwandi paadi na myaka 40, ne pano ukimwingidila mungya bukomo bwandi padi na myaka 80, nanshi kalekelepo kumwingidila mungya bukomo bwandi. Shi tubashilula kulanga’mba ketukilongapo bivule mu mwingilo wa Yehova, tufwaninwe kuvuluka’mba Yehova mwine ye uyukile bintu bya kulonga pa kumusangaja. Shi twielela’ko, Yehova uketunena’mba: “Ubalonga biyampe”​—Dingakanya na Mateo 25:20-23.

6. Le i ñeni’ka yotubwanya kuboila ku kimfwa kya Maria?

⁶ Biketupēlela kwikala na nsangaji shi tuta mutyima ku byobya byotubwanya kulonga pa kyaba kya kuta’o ku byobya byoketubwanyapo kulonga. Tulangulukilei bidi pa kimfwa kya kaka umo witwa bu Maria, udi na misongo imulengeja akomenwe kusapula bininge. Dibajinji, ñeni yamuvutakene kamone bu kakidipo na mvubu. Ebiya Maria walangulukila pa kaka wadi ulēle enka mu kitanda kya misongo, ne kukwata butyibi bwa kumukwasha. Maria unena’mba, “netūdile’ko mpangiko ya kusapula nandi ku telefone ne na mikanda. Kitatyi kyonso kyonadi nsapula nandi pamo, nadi njoka ku njibo musangale pa kuyuka’mba nabwanya kukwasha kaka.” Netu tubwanya kwikala na nsangaji mivule shi tuta mutyima ku byobya byotubwanya kulonga, pa kyaba kya kuta’o ku byobya byoketubwanyapo kulonga. Ino le bikekala namani shi tubwanya kulonga bivule, ne kadi twingilanga biyampe mwingilo kampanda wa Yehova?

7. Lelo mutumibwa Petelo wāpele bene Kidishitu madingi’ka mayampe?

⁷ Mu mukanda wandi mubajinji wa ku bukomo bwa mushipiditu, mutumibwa Petelo wāsoñenye banababo bengidije byabuntu ne bwino bo-bonso bobādi nabo mwanda wa kukankamika banababo mu lwitabijo. Petelo wālembele amba: “Mungya mutambwidile muntu ne muntu kyabuntu, ingidijai’kyo mwanda wa kwiingidila banwe bene na bene byomudi batulama  balumbuluke ba kanye ka ku buntu bitupu ka Leza.” (1 Pe. 4:10) Ketufwaninwepo kwikaka kwingidija byabuntu byetu ne pa mfulo mwanda wa kutyina bakwetu baketwivwanina mukao nansha kutyumukwa mutyima. Shi twikake, nabya ketukapepo Yehova bilumbuluke kyotudi nabyo.

8. Mungya 1 Bene Kodinda 4:6, 7, mwanda waka ketufwaninwepo kwianinya kyabuntu kyotudi nakyo?

⁸ Tufwaninwe kwingidija byabuntu byetu ne pa mfulo, inoko tufwaninwe kuta mutyima kutyina twakeaninya’byo. (Tanga 1 Bene Kodinda 4:6, 7.) Kimfwa, padi upēlelwanga kushilula bifundwa bya Bible ku njibo. Kufwaninwepo kwikaka kwingidija kino kyabuntu! Inoko kwingidija kyabuntu i kwishile na kwianinya’kyo. Fwatakanya’po bidi shi wemwenine mwanda muyampe usangaja mu busapudi, washilula ne kifundwa kya Bible. Ukekala na kipyupyu kya kusapwila’mo bantu ba mu kyenu kisumpi. Ino abe pa kwitana na bantu ba mu kyenu kisumpi, ubatana kaka mukwabo nandi wibalombola mwawapēnanga dipepala. Aye wapānanga’tu dipepala; ino abe washilwile kifundwa kya Bible. Le ukalonga’po namani? Uyukile amba bantu ba mu kyenu kisumpi bakakankamikwa na mwanda owemwenine, ino ubwanya padi kukwata butyibi bwa kukungila’ko kitatyi kifwaninwe kya kwibalombola’o, kutyina wakatyepeja nsangaji ya kaka wapāna dipepala. Kino i kintu kiyampe kya kulonga. Ino nansha bikale namani, kokaleka kushilula bifundwa bya Bible. Udi na kyabuntu—ingidija’kyo!

9. Le tufwaninwe kwingidija byabuntu byetu namani?

⁹ Tuvulukei amba, bwino bonso bwa kipangila botubwanya kwikala nabo bubadilwa mu byabuntu bitupele Leza. Tufwaninwe kwingidija bino byabuntu mwanda wa kukankamika kipwilo, ke pa mwandapo wa kwimwekeja bu bayampe. (Fid. 2:3) Shi twingidija bukomo bwetu ne bwino bwetu mwanda wa kulonga kiswa-mutyima kya Leza, tukekala na bubinga bwa kusangela—ke pa mwandapo tuloñanga bivule kutabuka bakwetu nansha mwanda wa kwimwekeja’mba twi bebapite, ino i mwanda twingidijanga byabuntu byetu mwanda wa kutendela Yehova.

10. Mwanda waka ke biyampepo kwidingakanya na bakwetu?

¹⁰ Shi muntu katadijepo, ubwanya kuponena mu dikinga dya kudingakanya bukomo bwandi na bukōkekōke bwa bakwabo. Kimfwa, padi tutu wikalanga unena mīsambo biyampe. I mukomo mu uno mwanda. Inoko mu mutyima wandi ubwanya padi kufutulula tutu mukwabo kanenangapo mīsambo biyampe. Aye padi tutu’wa  nandi udi na kizaji, ufundijanga bandi bana biyampe, kadi i mupyasakane mu busapudi. Bine, tufwijanga’ko bininge pa kwikala na batutu ne bakaka badi na bwino buvule, bengidija byabuntu byabo mwanda wa kwingidila Yehova ne kukwasha bakwabo!

11. Mwanda waka tufwaninwe kulonga bukomo bwa kulonda kimfwa kya Yesu?

¹¹ Nansha byoketufwaninwepo kwidingakanya na bakwetu, inoko tubwanya kuboila ñeni mivule ku bimfwa bya bantu ba kikōkeji. Kimfwa kiyampe kya kuboila’ko ñeni i kimfwa kya Yesu. Nansha byaādi mubwaninine, tubwanya kuboila ñeni ku ngikadila yandi milumbuluke ne ku bintu biyampe byaālongele. (1 Pe. 2:21) Shi tulonge bukomo bwa kwiula kimfwa kyandi mungya bukomo bwetu, tukekala bengidi bayampe ba Yehova kadi tukalupula bipa biyampe mu busapudi.

12-13. Le i ñeni’ka yotubwanya kuboila kudi Mulopwe Davida?

¹² Mu Kinenwa kya Leza, mudi bimfwa bivule bya bana-balume ne bana-bakaji ba kikōkeji botufwaninwe kwiula nansha byobādi bampikwa kubwaninina. (Bah. 6:12) Tulangulukilei bidi padi Mulopwe Davida, wāityilwe na Yehova amba i “muntu wa mwendele mutyima wami” nansha’mba i “muntu udi enka mo nsakila,” mungya bwalamuni bukwabo bwa Bible. (Bil. 13:22) Inoko, Davida kādipo mubwaninine. Wālongele ne bubi bukatampe. Ino nansha nankyo, aye i kimfwa kiyampe kotudi. Mwanda waka? Mwanda kitatyi kyobāmulemunwine, kāsakilepo kwibingija. Ino wāitabije madingi masumininwe obāmudingile ne kwialakanya bya binebine pa byaālongele. O mwanda Yehova wāmulekēle.​—Ñim. 51:3, 4, 10-12.

¹³ Tubwanya kuboila ñeni kudi Davida na kwiipangula’mba: ‘Le noñanga namani shi abandingila? Le ngitabijanga bilubo byami bukidibukidi, nansha nkimbanga kwibingija? Le nkijengapo kutopeka bakwetu pa bilubo byami? Le noñanga bukomo bwa kuleka kujokela mu bilubo byami?’ Ubwanya kwiipangula bino bipangujo potanga myanda ya bana-balume ne bana-bakaji ba kikōkeji badi mu Bible. Le bēkondele na makambakano na owikonda nao? Le bālombwele ngikadila’ka miyampe? Mu mwanda ne mwanda wiipangule amba: ‘Le i muswelo’ka ombwanya kwikala pamo bwa uno mwingidi wa lulamato wa Yehova?’

14. Le i muswelo’ka obwanya kuboila ñeni kudi banabenu mu lwitabijo?

¹⁴ Tubwanya ne kuboila ñeni kudi banabetu mu lwitabijo, bankasampe nansha banunu. Kimfwa, le ubwanya kuvuluka muntu umo  wa mu kyenu kipwilo ūminine na kikōkeji makambakano—padi a kuningilwa na bakwabo, kulwibwa na bantu ba mu kisaka nansha a misongo? Lelo ubamone ngikadila miyampe idi na uno muntu yobwanya kwiula? Shi ulangulukile pa kimfwa kyandi kiyampe ukamona miswelo miyampe ya kūminina makambakano obe. Bine, tufwijanga’ko pa kwikala na bino bimfwa bimwekelele bya bantu ba lwitabijo ba kwiula—bubinga bwine bwa kusangela!​—Bah. 13:7; Yak. 1:2, 3.

15. Le mutumibwa Polo wāletele madingi’ka abwanya kwitukwasha twendelele kusangela mwingilo otwingidila Yehova?

¹⁵ Pa kuleta ndoe ne bumo mu kipwilo, muntu ne muntu ufwaninwe kulonga bukomo. Twisambilei bidi pa bene Kidishitu ba mu myaka katwa kabajinji. Bādi na byabuntu ne mingilo mishileshile. (1 Ko. 12:4, 7-11) Ino kino kekyēbalengejepo betāke nansha kwiketaketa. Polo wāsoñenye umo ne umo alonge bifwaninwe kulongwa mwanda wa “kutamija umbidi wa Kidishitu.” Polo wālembēle bene Efisesa’mba: “Shi kipindi ne kipindi kingila biyampe, kikwashanga ku kutanta kwa umbidi powitamija ao mwine mu buswe.” (Ef. 4:1-3, 11, 12, 16) Boba balonga uno muswelo baletanga ndoe ne bumo—ngikadila mine yotumona mu bipwilo byetu dyalelo.

16. Le tufwaninwe kusumininwa kulonga bika? (Bahebelu 6:10)

¹⁶ Sumininwa kuleka kwidingakanya na bakwenu. Ino boila ñeni kudi Yesu, kadi longa bukomo bwa kwiula ngikadila yandi. Boila ñeni ku bimfwa bya mu Bible ne bimfwa bya lwitabijo bya banabetu ba mu ano etu mafuku. Poendelela kulonga bukomo, kulupila’mba Yehova ‘ke mukondamepo wa kwilwa mingilo yobe.’ (Tanga Bahebelu 6:10.) Endelela kusangela mwingilo oingidila Yehova, koku uyukile amba aye usangedile bukomo bolonga na mutyima onso bwa kumusangaja.