1. Le Yesu wāsapwidile bandi bana ba bwanga bika pa mwanda utala kitatyi kya mfulo, ne i kidyumu’ka kyāebapele?

 MAFUKU matyetye kumeso kwa Yesu kufwa, bandi bana ba bwanga baná bāmwipangwile amba: “I kiyukeno’ka kiketuyukija kitatyi . . . kya mvuyo ya ngikadilo ya bintu?” (Mat. 24:3) Mobimwekela, bana ba banga bādi bepangula i bika bikebakwasha bayuke kitatyi kikonakanibwa Yelusalema ne tempelo. Yesu pa kwibalondolola, kēsambīlepo enka pa konakanibwa kwa Yelusalema ne tempelo, ino wēsambīle ne pa “mvuyo ya ngikadilo ya bintu” mine yotudi’mo dyalelo. Yesu wānenene pa mwanda utala kitatyi kya mfulo amba: “Pa mwanda wa dyodya difuku ne nsá mine, i kutupu nansha umo wibiyukile, nansha bamwikeulu mūlu nansha Mwana, poso’nka Tata.” Kupwa wādingila bandi bana ba bwanga bonso ‘baleke kulāla,’ ino ‘bakeshe’nka kukesha.’—Mako 13:32-37.

2. Mwanda waka bene Kidishitu ba mu myaka katwa kabajinji bādi banenwe kukesha’nka kukesha?

² Bene Kidishitu Bayuda ba mu myaka katwa kabajinji bādi banenwe kukesha’nka kukesha; kadi kulonga namino kwādi kwa kupandija būmi bwabo. Yesu wāsapwidile balondi bandi bintu byobādi ba kumona, bikebakwasha bayuke kitatyi kikonakanibwa Yelusalema ne tempelo. Wānenene amba: “Shi mubamone Yelusalema wajokolokwa na bibumbo bya mavita, nabya yukai amba kusalwa kwandi kubafwena.” Mu kine kitatyi’kya, bādi banenwe kukōkela kidyumu kya Yesu ne kushilula “kunyemena ku ngulu.” (Luka 21:20, 21) Boba bātele mutyima ku kino kidyumu, bāpandile pobāonakenye Yelusalema kudi bene Loma.

3. Le i bika byotusa kwisambila’po mu kino kishinte?

 ³ Dyalelo tudi mu kitatyi kya mfulo kya ino ngikadilo ya bintu mibi. O mwanda netu tufwaninwe kulama ñeni yetu ne kukesha’nka kukesha. Mu kino kishinte, tusa kwisambila’mo pa muswelo otubwanya kwikala na bujalale potutala na katentekeji binkumenkume bya ino ntanda, pa muswelo otubwanya kudyumuka batwe bene, ne pa muswelo otubwanya kwingidija senene kitatyi kyetushadila’ko.

4. Mwanda waka tufwaninwe kukimba kumona binkumenkume bilongeka pano mu ino ntanda mobifikidijija bupolofeto bwa mu Bible?

⁴ Tudi na bubinga buyampe bwa kukimba kumona binkumenkume bilongeka pano mu ino ntanda mobifikidijija bupolofeto bwa mu Bible. Kimfwa, Yesu wātelele bintu biketukwasha tuyuke amba mfulo ya ino ngikadilo ya bintu ya Satana ibafwena. (Mat. 24:3-14) Mutumibwa Petelo wētukankamikile tute mutyima ku kufikidila kwa bupolofeto mwanda wa tushale bakomo mu lwitabijo. (2 Pe. 1:19-21) Mukanda wa mfulo wa mu Bible ushilula na binenwa bya amba: “Kusokwelwa kwa Yesu Kidishitu, kwamupele Leza, mwanda wa kulombola bapika bandi bintu bifwaninwe kulongeka panopano.” (Kus. 1:1) O mwanda tutele mutyima bininge ku binkumenkume bilongeka pano mu ino ntanda ne ku kuyuka muswelo obibwanya kufikidija bupolofeto bwa mu Bible. Kadi tubwanya kwikala na kipyupyu kya kwisambila pa bino binkumenkume na bantu bakwabo.

5. Le i bika byotufwaninwe kwepuka, ino i bika byotufwaninwe kulonga? (Tala ne bifwatulo.)

⁵ Inoko kitatyi kyotwisambila pa bupolofeto bwa mu Bible, tufwaninwe kwepuka kutweja’mo bintu bya kufwatakanya. Mwanda waka? I mwanda ketukasakepo nansha dimo kunena bintu bibwanya kona bumo bwetu mu kipwilo. Kimfwa, tubwanya kwivwana bendeji ba ino ntanda besambila pa muswelo obabwanya kupwija kubulwa kumvwañana kampanda, ne kuleta ndoe ne mutyima-ntenke. Pa kyaba kya kwanza kunena’mba uno muneneno ufikidija bupolofeto budi mu 1 Bene Tesalonika 5:3, tunenwe kulonda mwivwanino wa panopano uletelwe. Shi mīsambo yetu īmanina pa byobya binenene bulongolodi bwa Yehova, nabya tukwashanga kipwilo kishale mu bumo “mu mulangilo umo onka.”—1 Ko. 1:10; 4:6.

6. Le 2 Petelo 3:11-13 witufundija bika?

⁶ Tanga 2 Petelo 3:11-13. Mutumibwa Petelo witukwasha twikale nyeke na bujalale potubandaula bupolofeto bwa mu Bible. Witusoñanya “kulama nyeke mu ñeni kitatyi kya kwikala’po kwa difuku dya Yehova.” Mwanda waka? Ke pa mwandapo wa kusaka kuyuka “difuku ne nsá” dikaleta Yehova Amakedona, ino i mwanda tusakanga kwingidija kitatyi kyetushadila’ko mu kulonga “bilongwa bijila bya mwikadilo ne mingilo ya bwine Leza.” (Mat. 24:36; Luka 12:40) Ko kunena’mba, tusakanga kwikala nyeke na mwiendelejo moloke ne kulonga bukomo amba byonso byotulonga mu mwingilo wa Yehova, tulonge’byo pa mwanda wa buswe bukatampe botumusenswe. Pa kulama uno mumweno, tufwaninwe kudyumuka batwe bene.

7. Le tulombolanga namani amba twi badyumuke batwe bene? (Luka 21:34)

⁷ Yesu kāsoñenyepo bandi bana ba bwanga bate mutyima enka ku binkumenkume bya ino ntanda, ino wēbasoñenye ne kwita’o abo bene. Kino i kimweke patōka mu kidyumu kidi mu Luka 21:34. (Tanga.) Yesu unena’mo amba: “Dyumukai banwe bene.” Muntu  mudyumuke aye mwine utanga mutyima ku byaka byo-byonso bibwanya kona kipwano kyandi na Yehova, ne kulonga’po kintu mwanda wa kwibyepuka. Kulonga namino, kumukwashanga elame mu buswe bwa Leza.—Nki. 22:3; Yude 20, 21.

8. Le i bika byobālombwele bene Kidishitu kudi mutumibwa Polo?

⁸ Mutumibwa Polo wālombwele bene Kidishitu badyumuke abo bene. Kimfwa, wāsapwidile bene Kidishitu ba mu Efisesa amba: “Tadijai’nka kutadija bya binebine amba muswelo omunanga ke pamopo bwa bampikwa tunangu, aa, ino i pamo bwa ba tunangu.” (Ef. 5:15, 16) Satana uloñanga kyaba kyonso bukomo bwa konakanya kipwano kyetu na Yehova, o mwanda Bible witudingila tujingulule “nyeke kiswa-mutyima kya Yehova i kyepi,” mwanda wa tukomene manwa onso a Satana.—Ef. 5:17.

9. Le tujingululanga namani byobya bitusakila Yehova kulonga?

⁹ Bible katelelepo byaka byonso bibwanya kona kipwano kyetu na Yehova. Tufwaninwe kyaba kyonso kukwata butyibi pa myanda keisambīlwe’po patōka mu Bisonekwa. O mwanda pa kukwata butyibi buyampe, tunenwe kujingulula nansha kuyuka “kiswa-mutyima kya Yehova.” Tubwanya kujingulula byobya byaetusakila kulonga na kwifunda kyaba kyonso Kinenwa kya Leza ne kulangulukila’po. Shi twivwanije senene byobya bitusakila Yehova kulonga ne kwikala na “ñeni ya Kidishitu,” po pene tukananga “pamo bwa ba tunangu,” nansha shi kekudipo bijila bya patōkelela bitulombola bya kulonga. (1 Ko. 2:14-16) Byaka bimo bidi patōka; ino bikwabo nabyo i bifyame.

10. Le i byaka’ka bimo byotufwaninwe kwepuka?

¹⁰ Mu byaka byotufwaninwe kwepuka, mubadilwa kwiselembeja, mutomeno-mpata, mudilo-mpata, binenwa bibi, bya kwipwija nabyo mukose bya lūma, porno, ne bikwabo biifwene nabyo. (Ñim. 101:3) Dyabola walwana netu, ukimbanga kyaba kyonso mikenga ya kona kipwano kyetu na Yehova. (1 Pe. 5:8) Shi ketutadijepo, Satana ubwanya kukuna mu ñeni yetu ne mu mutyima wetu nkunwa ya kwabila, budimbidimbi, makomwa-meso, mushikwa, kwizunzula, ne kīji. (Ngt. 5:19-21) Ku ngalwilo, ino milangwe ibwanya kumweka bu keidipo na kyaka. Inoko shi ketulongelepo bukomo bwa kwiitalula kiponka na ponka, ibwanya kwendelela kutama pamo bwa mutyi wa bulembe ne kuleta musala.—Yak. 1:14, 15.

11. Le i kyaka’ka kifyame kyotufwaninwe kwepuka, ne mwanda waka?

¹¹ Kyaka kimo kifyame i balunda babi. Langulukila bidi pa uno mwanda. Mwingilanga ku kaji na muntu umo ke Kamonipo. Byosaka uno muntu amone biyampe Batumoni ba Yehova, o mwanda udi na kanye kadi wikele nandi biyampe. Padi kyaba kimo waitabije enka ne kudīla nandi pamo byakudya bya mu midi. Ino bukidi bonka, ke bya kyaba ne kyaba. Kadi kyaba kimo uno muntu ushintanga mīsambo, kaesambila pa bintu bya busekese. Ku ngalwilo ubalonga bukomo bwa kusūla byanena. Ino mu kupita kwa kitatyi, mīsambo’ya keikikukambakanyapo, nobe koela’po diwi. Ebiya difuku dimo, muntu’wa wakwite mukatome mālwa pa kupwa kwa kaji, nobe ubaitabija. Ku mfulo, ubashilula kulanga bwa uno muntu omwingilanga nandi. Lelo na pano nenki, ukidi kulampe na kushilula kulonga bintu pamo bwa aye? Na bubine, twikalanga na kanye kadi tulēmekele bantu bonso, inoko tufwaninwe kuvuluka’mba bantu botutonga kupityija nabo kitatyi, bekalanga na lupusa kukatampe potudi. (1 Ko. 15:33) Shi tudyumuke batwe bene, monka mwētusoñaninye’byo Yesu, nabya  tukepuka kupwana na bantu kebalondapo misoñanya ya Yehova. (2 Ko. 6:15) Tukamona kyaka ne kwikinyema.

12. Le i bika byādi binenwe kulonga bana ba bwanga ba Yesu pobādi belaije konakanibwa kwa Yelusalema?

¹² Bana ba bwanga ba Yesu kebādipo bafwaninwe kushikata bitupu pobādi belaije konakanibwa kwa Yelusalema. Yesu wēbapēle mwingilo wa kwingila. Wēbasoñenye basapule myanda miyampe “mu Yelusalema, mu Yudea ne mu Samadia monso, ne kulakula kwine kwa ntanda.” (Bil. 1:6-8) Bine uno wādi i mwingilo mukatampe wāpelwe balondi ba Yesu! Bāingidije senene kitatyi kyabo, na kulonga byonso byobabwanya mwanda wa kusapwila bantu bakwabo.

13. Mwanda waka tunenwe kwingidija senene kitatyi kyetu? (Bene Kolose 4:5)

¹³ Tanga Bene Kolose 4:5. Pa kudyumuka batwe bene, tunenwe kubandaula muswelo otwingidija kitatyi kyetu. “Myanda yampikwa kulaya” ibwanya kufikila muntu yense motudi. (Mus. 9:11) Tubwanya kufwa enka na mu kukopa kwa diso.

14-15. Le i muswelo’ka otubwanya kwingidija senene kitatyi kyetu? (Bahebelu 6:11, 12) (Tala ne kifwatulo.)

¹⁴ Tubwanya kwingidija senene kitatyi kyetu na kulonga kiswa-mutyima kya Yehova, ne kuningija  kipwano kyotupwene nandi. (Yoa. 14:21) Tunenwe ‘kuninga, kujina mpika, ne kuvudilwa mafuku onso bya kulonga mu mwingilo wa Mfumwetu.’ (1 Ko. 15:58) Ebiya shi mfulo ibafika—ekale i mfulo ya būmi bwetu nansha mfulo ya ino ngikadilo ya bintu mibi—ketukealakanyapo nansha dimo.—Mat. 24:13; Loma 14:8.

¹⁵ Dyalelo, Yesu wendelelanga kuludika bandi bana ba bwanga pobasapula Bulopwe bwa Leza ntanda yonso. Yesu ufikidijanga mulao wandi. Witufundijanga mwa kusapwila ne kwitupa bingidilwa byotusakilwa pa kusapula myanda miyampe, kupityila ku bulongolodi bwa Yehova. (Mat. 28:18-20) Netu tuvuijanga mwingilo wetu na kwingila bininge mu mwingilo wa kusapula ne kufundija bantu, ne na kukesha’nka kukesha potutengēle Yehova afudije ino ngikadilo ya bintu. Tukwatyijanga lukulupilo lwetu “kufika ne ku mfulo,” na kulonda madingi adi mu Bahebelu 6:11, 12.—Tanga.

16. Le tubasumininwa kulonga bika?

¹⁶ Yehova i mutunge difuku ne nsá mine yakafudija ino ngikadilo ya bintu ya Satana. Pakafika dino difuku, Yehova ukafikidija bupolofeto bonso budi mu Kinenwa kyandi. Kyaba kimo dyalelo tubwanya kumona’mba mfulo ya ino ngikadilo ya bintu ibaije. Inoko, difuku dya Yehova ‘kedikejepo.’ (Hab. 2:3) Nanshi tusumininwei nyeke ‘kutala kudi Yehova,’ ne kulombola “mutyima wa kukungila Leza wa lupandilo [lwetu].”—Mika 7:7.