Lelo utañanga manimelo a Kiteba kya Mulami a panopano? Eyo, tala bidi shi ubwanya kulondolola bino bipangujo:

Pa kukwasha bana bendelele ku mushipiditu, mwanda waka bambutwile bavilukidile mu ntanda-bene bafwaninwe kuta mutyima ku mwanda utala ludimi?

Bana babwanya kwifunda ludimi lwa komuvilukidile ku masomo nansha ku bakwabo. Shi bana besamba ndimi mivule, kino kikalumbulula mulangilo wabo kadi kikebakwasha bevwanije senene mumweno wa bakwabo. Bambutwile bafwaninwe kutonga kipwilo kya ludimi lukevwana’mo bana senene bubine ne kwendelela ku mushipiditu, ekale i kipwilo kya ludimi lwisambwa kobavilukidile nansha ke kya lwabo ludimi. Bambutwile bene Kidishitu batangidijanga bisakibwa bya babo bana kumeso kwa byabo.—w17.05, p. 9-11.

Yesu pa kwipangula Petelo amba: “Le unsenswe kutabuka bino’bi?” le “bino’bi” bifunkila pa bika? (Yoano 21:15)

Bimweka’mba Yesu wādi wisambila pa mulwi wa mwita ne pa mwingilo wa Petelo wa buluwe. Yesu pa kufwa, Petelo wājokēle ku mwingilo wandi wa buluwe. Bene Kidishitu bafwaninwe kubandaula kifuko kyobatūdile’po kabo kaji ka ku ngitu.​—w17.05, p. 22-23.

Mwanda waka Abalahama wānenene Sala wandi mukaji etele bu mwanabo? (Ngalwilo 12:10-13)

Na bubine, Sala wādi nkasandya Abalahama. Shi Sala wētelele amba i wandi mukaji, nabya Abalahama wādi ubwanya kwipaibwa ne kukankalwa kubutula lutundu lwāmulaile Leza.​—wp17.3, p. 14-15.

Lelo i manwa’ka āingidije Elias Hutter mwanda wa kukwasha boba bādi basaka kwifunda Kihebelu?

Wādi usaka kukwasha befundi bajingulule nsulo ya bishima bya Kihebelu bidi mu Bible ne bipindi bya ku ngalwilo kwa kishima (préfixes) ne bipindi bya ku mfulo kwakyo (suffixes). Pa kufikila pa kino, wātampile nsulo ya bishima mu masomo matyite ino ku kipindi kibajinji kya kishima ne kya ku mfulo kwakyo, watūdile’ko nondelo ya bishima. Bible wa Les Saintes Écritures. Traduction du monde nouveau (avec notes et références) nandi wingidije ano manwa mayampe ku bilembwa bya kunshi kwa dyani.​—wp17.4, p. 11-12.

I myanda’ka ibwanya kukwasha mwine Kidishitu ekale na mumweno muyampe pa kwikala na buta mwanda wa kwikinga ku bankuma-bibi?

Imo bidi i ino: Būmi bwa bantu i bujila ku meso a Leza. Yesu paālombwele balondi bandi kusela bipete bufuku bukya ke lufu lwandi, kānenenepo amba i bya kwikinga nabyo. (Luka 22:36, 38) Bantu ba Leza bafulanga “bipete byabo ke nkasu, ne mikobe yabo ke bipete bitonte.” Būmi budi na mvubu kupita bintu bya ku ngitu. Bene Kidishitu balēmekanga mutyima wa mundamunda wa bakwabo, ne kuleta kimfwa kiyampe ku bakwabo. (2 Kodinda 4:2)​—w17.07, p. 31-32.

Mwanda waka nsekununi ya Mateo itala būmi bwa pa bwanuke bwa Yesu i mishile na ya Luka?

Nsekununi ya Mateo i misambile bininge pa myanda itala Yosefa, byaālongele paāyukile amba Madia waimita ne mwaādyumwininwe na mwikeulu mu kilotwa anyemene mu Edipito ne kujoka mwenda mafuku. Nsekununi ya Luka ayo isambila bininge padi Madia; kimfwa, paākapempwile mwanabo Edisabeta ne byaālongele pāshele Yesu mu tempelo.​—w17.08, p. 32.

Lelo Bible udi’ko nyeke mu myanda’ka imoimo?

Mu bula bwa kitatyi, muneneno ne bishima bingidijibwe mu Bible bishintanga. Kwishinta kwa imbikalo mu ino ntanda kwāshintyile ne ndimi yādi īsambwa na bantu. Kwadi kukankajibwa kwa bwalamuni bwa Bible mu ndimi isambwa na bantu bavule.​—w17.09, p. 19-21.

Lelo udi na mwikeulu mulami?

Nansha dimo. Yesu wēsambīle pa bamwikeulu ba bana ba bwanga’mba babandilanga nyeke mpala ya Leza. (Mateo 18:10) Yesu wādi usaka kunena’mba bamwikeulu batele bandi bana ba bwanga mutyima, ino kādipo usaka kunena’mba bamwikeulu bakiñanga wandi mwanā bwanga umo ne umo mu kingelengele.​—wp17.5, p. 5.

Le buswe bwa mvubu mikatampe i bwa muswelo’ka?

I buswe bwimanine pa misoñanya myoloke, ko kunena’mba a·gaʹpe buno bo buswe bwa mvubu mikatampe. Mu buno buswe mubadilwa kisanso ne kusangela bakwabo. Inoko bumwekejanga misoñanya ya peulu, bulombolwanga na bilongwa byampikwa kwisakila mwanda wa kamweno ka bantu bakwabo.​—w17.10, p. 7.