KIFUNDWA 54
Yehova Wātūkijije Yona Mutyima
Bantu ba mu Nineva, kibundi kya bene Ashidia, bādi babi. Yehova wānenene mupolofeto Yona ende ku Nineva akebadyumune mwanda wa bashinte mwiendelejo wabo. Inoko Yona wānyemena ku mutamba mukwabo. Wākakanda kyombo kyādi kyenda ku Talashishi.
Kyombo pokyādi pa dijiba, kimpumpu kikatampe kyēbatana, kadi bengidi ba ku kyombo bāzakele bininge. Bālombēle ku baleza babo ne kwiipangula’mba: ‘Mwanda waka kino kibetutana?’ Ku mfulo, Yona wēbalombola’mba: ‘I ami walengeja kino kimpumpu. Nyemanga Yehova, mwanda kudi byawaunenene kulonga. Ngelei mu dijiba, kimpumpu kisa kutalala.’ Bengidi ba ku kyombo kebāitabijepo kwela Yona pa mema, ino Yona aye wēbaningila bamwele. Abo pa kumwela pa mema, kimpumpu kyātalala.
Yona wālangile amba usa kufwa. Wālombele kudi Yehova paādi wenda ushika mu nkulwe milampe ya dijiba. Penepo Yehova wātuma mushipa mukatampe. Uno mushipa wāmina Yona, inoko Yona kāfwilepo. Yona paādi munda mwa mushipa, wālombele amba: ‘Nakulaa’mba nkakukōkela nyeke.’ Yehova wālamine Yona mafuku asatu matuntulu munda mwa mushipa, kupwa wālengeja mushipa ukalashile Yona ku ntanda myūmu.
Yehova byaapandija Yona, le ko kunena’mba Yona kakyendapo ku Nineva? Aa. Yehova wānenene monka Yona ende’ko. Pano, Yona wākōkele. Yona wāendele’ko, wāsapwila bano bantu babi amba: ‘Mu mafuku 40, Nineva usa konakanibwa. Ponkapo kwālongeka mwanda umo utulumukwa—bene Nineva bāmuteja, bāshinta mwiendelejo wabo. Mulopwe wa Nineva wāsapwila bantu bandi amba: ‘Itai Leza, kadi mwisāsei. Kepabulwe padi ukaleka kwitonakanya.’ Yehova pa kumona’mba bantu abesāsa, nandi wāleka konakanya Nineva.
Yona wālobele mwanda kibundi kekyāonakanibwepo. Langa’po bidi: Yehova wātūkijije Yona mutyima ne kumufwila lusa, inoko Yona aye kāfwidilepo bantu ba Nineva lusa. Wāenda kukashikata panja pa kibundi, mu mutalela wa mulundu wa mungu, kātuntumene. Kupwa uno mulundu wāuma, Yona wāloba. Penepo Yehova wāmusapwila’mba: ‘Ubakwatyilwa uno mulundu lusa kupita’ko bekadi ba Nineva. Nebafwila lusa, o mwanda nebapandija.’ Le i bufundiji’ka budi’po? Bantu ba Nineva bādi balēme kupita mulundu o-onso.
“Yehova . . . wimutūkijije mutyima mwanda kasakilepo muntu nansha umo oneke, ino usaka bonso bafikile pa kwisāsa.”—2 Petelo 3:9
Tala'po Bidi ne Bino:
IULAI LWITABIJO LWABO
Wāboile Ñeni ku Bilubo Byandi
Ubulwe’po nobe kwivwana moyo wāivwene Yona pa kwitabija mwingilo? Mānga yandi itufundija ñeni mivule itala pa kitūkijetyima ne lusa lwa Yehova.
IULAI LWITABIJO LWABO
Wēfundile Kufwila Bakwabo Lusa
Lelo nsekununi ya Yona itukwasha namani twibandaule pampikwa budimbidimbi?
