Umbikalo wa bene Ashidia wākwete bulopwe bwa bisaka dikumi bwa Isalela. Pano, Senakediba mulopwe wa Ashidia, wādi kasake kukwata ne bulopwe bwa bisaka bibidi bwa Yuda. Wāanjile kukwata bibundi bya Yuda kimokimo. Inoko kibundi kyaādi wabila bininge kukwata i Yelusalema. Senakediba kādipo uyukile amba Yehova ye ukiñanga Yelusalema.

Hezekia, mulopwe wa Yuda, wāfutyile Senakediba lupeto luvule mwanda wa aleke kukwata kibundi kya Yelusalema. Nansha Senake- diba byaātambwile lupeto luvule, inoko wātumine kibumbo kyandi kya divita kikomo kikatambe Yelusalema. Bantu ba mu kibundi kya Yelusalema bāzakele mwanda bene Ashidia bādi bāya bafwena. Penepo, Hezekia wāsapwila bantu amba: ‘Kemwakikwatwai moyo. Shako bene Ashidia i bakomo, inoko Yehova usa kwitukomeja bininge kwibapita.’

Senakediba wātumine Labashake, mukendi wandi, ende ku Yelusalema akazawile bantu. Labashake wākemana panja pa kibundi kya Yelusalema kāela mabila amba: ‘Yehova kabwanyapo kwimukwasha. Kemwakyongolwai na Hezekia. I kutupu leza ubwanya kwimukinga kotudi.’

Hezekia wāipangwile Yehova kya kulonga. Yehova wāmulondo- lola’mba: ‘Kemwakizakalai mwanda wa byanena Labashake. Senakediba kasapo kukwata Yelusalema.’ Kupwa, Hezekia wātambula mikanda itamba kudi Senakediba. Ino mikanda yādi inena’mba: ‘Lekai’byo’tu. Yehova kabwanyapo kwimupandija kotudi.’ Penepo Hezekia wālombela’mba: ‘Nakwisāshila, Yehova, witupandije mwanda wa bantu bonso bayuke amba abe ye Leza umo kete wa bine.’ Yehova wālombola Hezekia amba: ‘Mulopwe wa Ashidia kasapo kutwela mu Yelusalema. Nsa kukinga kyami kibundi.’

Senakediba wāmwene bu pano kakwata Yelusalema. Inoko difuku dimo bufuku, Yehova wātuma mwikeulu umo mu nkambi ya basola panja pa kibundi. Uno mwikeulu wāipaile basola 185 000! Mulopwe  Senakediba wājimije basola bandi bakomokomo. Kākidipo na kya kulonga, wākajokela kwandi munekenibwe. Yehova wākingile Hezekia ne Yelusalema, monka mwaālaile’kyo. Shi nobe wādi mu Yelusalema, le wādi wa kukulupila mudi Yehova?