Solo wādi mwine Loma mubutwilwe mu kibundi kya Tasusa. Wādi Mufadiseo umo uyukile senene Bijila bya Bayuda, kadi wādi ushikilwe bene Kidishitu. Wādi ubulula bene Kidishitu bana-balume ne bana-bakaji mu mobo abo, ne kukebeleja mu kifungo. Kadi kibumbo kimo kikalabale pokyāipaile mwanā bwanga umo na kumwasa mabwe, Solo wādi wimene ponka utala.

Inoko, Solo kākadikilepo’tu’nka pa kukuta bene Kidishitu ba mu Yelusalema kete. Wālombele kitobo mukatampe amupe lupusa lwa kwenda ku kibundi kya Damakasa mwanda wa akakwate’ko bene Kidishitu. Solo pa kufika kubwipi na kibundi kya Damakasa, mu kitulumukila, kiké kya mudilo kyāmumunika aye yense, wāpona panshi. Wāivwana diwi dimunena’mba: ‘Solo, mwanda waka umpangapanga?’ Solo wāipangula’mba: ‘Le wi ani?’ Bāmulondolola’mba: ‘I ami Yesu. Enda ku Damakasa, usa kuyuka bya abe kulonga.’ Ponka na ponka, Solo wāikala mpofu, kadi pa kusaka’mba akafike mu kibundi, byādi kebilombe’nka kumukwata ku kuboko.

Mu Damakasa, mwādi mwine Kidishitu umo wa kikōkeji witwa bu Ananaisa. Yesu wāmusapwidile mu kimonwa’mba: ‘Enda ukakimbe Solo ku njibo ya Yudasa, mu kipito kitwa bu Kyoloke.’ Ananaisa wānena’mba: ‘A Mfumwami, ndyukile myanda yonso ya yao muntu! Welanga bobe bana ba bwanga mu buloko!’ Ino Yesu wāmunena’mba: ‘Enda’ko. Natonge Solo, mwanda wa asapule myanda miyampe ku mizo mivule.’

Ebiya Ananaisa wātana Solo, wāmunena’mba: ‘Solo mwanetu, Yesu wauntume mwanda wa nkupūtule meso.’ Ponka na ponka, Solo wāanza kumona monka. Wāfunda myanda ya Yesu, kadi wāikala mulondi wandi. Solo pa kupwa kubatyijibwa, wāanza kusapula mu mashinankonka pamo  na banababo bene Kidishitu. Langa’po bidi mobyāsanshile Bayuda pa kumona Solo ufundija myanda ya Yesu! Bānenene amba: ‘Mwene uno muntu’u ye enka yewa wadi ususula bana ba bwanga ba Yesu?’

Solo wāsapwidile bantu mu Damakasa mu bula bwa myaka isatu. Bayuda bādi bashikilwe Solo, bākwata mulangwe wa kumwipaya. Inoko banababo pa kuyuka uno mwanda, bāmukwasha na kumunyemeja. Bāmwikija mu kisaku, bāmutūkijija pa kipunzu kya lubumbu lwa kibundi.

Solo pawāendele ku Yelusalema, wāsakile kukemona na banababo bādi mu Yelusalema. Inoko bādi bamutyina. Kupwa, mwanā bwanga umo wa mutyima muyampe witwa bu Banabasa, wākafikija Solo kudi batumibwa ne kwibevwanija’mba, na bubine uno Solo ke mushinte shintē. Solo wāshilwile kusapula myanda miyampe na bupyasakane pamo na kipwilo kya mu Yelusalema. Uno Solo, ye wāyukene mwenda mafuku bu Polo.