Yehova wālaile amba: ‘Kudila, misanshi, misongo nansha lufu kebikekala’kopo monka. Nkapampula impolo yonso mu meso abo. Bintu bibi byonso bya kala tukelwa’byo.’

Yehova wātūdile ba Adama ne Eva mu budimi bwa Edena mwanda wa kwikala’mo mu ndoe ne nsangaji. Bādi bafwaninwe kutōta Shabo wa mūlu ne kuyuja ntanda na babo bana. Ba Adama ne Eva bātombokēle Yehova, inoko mpango yandi keyāshintyilepo nansha dimo. Mu kino kitabo, tubamone’mo amba bintu byonso bilaile Leza bifikidilanga. Bulopwe bwandi bukaleta madyese a kutendelwa pano pa ntanda, monka mwaālaile’kyo Abalahama.

Panopano ponka, Satana, bandemona bandi, ne bantu babi bonso basa konakanibwa. Muntu ense ukashala mūmi ukatōta Yehova. Ketukabelapo nansha kufwa kwine. Inoko, tukalanguka na bukomo buvule difuku ne difuku kadi basangale pa kwikala bōmi. Ntanda  ikekala ke paladisa. Muntu ne muntu ukekala na byakudya biyampe ne njibo miyampe. Bantu bakekala na mutyima muyampe, kekukekalapo butapani nansha bya lūma. Banyama ba ntanda kebaketutyinapo, kadi netu ketukebatyinapo.

Yehova pakashilula kusangula bantu, tukasangala bininge. Tukalubula bantu ba pa kala, kimfwa Abele, Noa, Abalahama, Sala, Mosesa, Luta, Eseta, ne Davida. Tukengidilanga nabo pamo pa kwalamuna ntanda ke paladisa. Kukekala nyeke mingilo mivule isangaja ya kwingila.

Yehova usaka nobe ukekale mu paladisa. Ukamuyuka mu miswelo yokulangilapo. Nanshi, tufwenei bininge kudi Yehova difuku ne difuku, tamba’nka pano ne nyeke ne nyekeke!