Mu bipwilo byonso mudi ne bantu ba mityima myoloke. Myanda miyampe ilombola’mba Leza wibamwene kadi wibatele mutyima. Ino yō, kudi myanda mibi ilongelwa mu dijina dya kipwilo. (2 Kodinda 4:3, 4; 11:13-15) Lapolo ya panopano inena’mba, bipwilo bimo i bikuje mu butumbula, butapani, mavita, ne kujilula bana na busekese. Bine, kino kifityijanga mutyima wa batōtyi ba bine ba Leza!​—Tanga Mateo 24:3-5, 11, 12.

Kipwilo kya bine kitumbijanga Leza, ino kya bubela akyo kimufityija mutyima. Kifundijanga milangwe keidipo mu Bible, kubadila’mo ne mfundijo ya bubela itala padi Leza ne pa bantu bafwile. Ino Yehova usakanga bantu bayuke myanda ya bine imutala.​—Tanga Ezekyele 18:4; 1 Temote 2:3-5.

Na bya dyese, Leza kongolwangapo na bipwilo bītela bitupu amba bimusenswe, koku kadi bisenswe ntanda ya Satana. (Yakoba 4:4) Kinenwa kya Leza kitela bipwilo byonso bya bubela bu “Babiloni Mukatampe.” Babiloni kyādi kibundi kya kala, kine kyāshilwile’mo mutōtelo wa bubela pa kupwa kwa Dilobe dya mu mafuku a Noa. Panopano ponka Leza usa konakanya bipwilo byonso byongola bantu ne kwibasusula.​—Tanga Kusokwelwa 17:1, 2, 5, 16, 17; 18:8.

Kudi kadi myanda mikwabo miyampe. Yehova kedilwepo bantu ba mityima myoloke badi mu bipwilo bya bubela ntanda yonso. Ukongakanyanga bano bantu na kwibafundija bubine.​—Tanga Mika 4:2, 5.

Yehova ulamanga bantu basenswe bubine ne bintu biyampe. Wibadyumuna bavundamine bipwilo bya bubela. Bantu basenswe Leza badi na mutyima wa kushinta mwanda wa kumusangaja.​—Tanga Kusokwelwa 18:4.

Mu myaka katwa kabajinji, bantu ba mityima myoloke pobāivwene myanda miyampe itamba kudi batumibwa, bāitabije’yo na nsangaji. Bēfundile muswelo mupya wa kwikala mu būmi wēbalombwele Yehova, būmi bwa nsangaji mpata, budi na kitungo ne bupāna lukulupilo. Bano bantu i kimfwa kiyampe kulonda, mwanda bāitabije myanda miyampe na kutūla Yehova pa kifuko kibajinji mu būmi bwabo.​—Tanga 1 Tesalonika 1:8, 9; 2:13.

Boba bonso bavundamina bipwilo bya bubela, Yehova wibatundailanga mu kisaka kyandi kya batōtyi. Shi witabe ku lwito lukwita Yehova na nsangaji, ukekala mulunda nandi, uketabijibwa mu kisaka kya batōtyi bandi besenswe, ne kukamona būmi bwa nyeke.​—Tanga Mako 10:29, 30; 2 Kodinda 6:17, 18.

Konakanibwa kusa konakanibwa bipwilo bya bubela i mwanda muyampe. Kukakūla ntanda mu kasusu. Bantu kebakongolwapo monka na bipwilo bya bubela nansha kukalañanibwa. Muntu ne muntu ukekala mu butōtyi bumo kete bwa Leza wa bine.​—Tanga Kusokwelwa 18:20, 21; 21:3, 4.