Ne kutatana mpika, bufundiji bwa kyalwilo bwa mu Bible bowabandaula ye buno bubaningija mutyima obe wa kusanswa Yehova. Buno buswe bulomba kutamija nyeke. (1 Petelo 2:2) Lukulupilo lobe lwa kumona būmi bwa nyeke lulondanga muswelo oendelela kufwena kudi Leza na kwifunda Kinenwa kyandi.​—Tanga Yoano 17:3; Yude 21.

Kitatyi kyoenda uvudija buyuki bwa Leza, ne lwitabijo lobe nalo lwendanga luninga. Lwitabijo lukakukwasha usangaje Leza. (Bahebelu 11:1, 6) Lukakutonona wisāse ne kushinta būmi bobe.​—Tanga Bilongwa 3:19.

Mungya buluji, ukasaka kusapwila bakwabo byobya byowifundile​—batwe bonso tusangelanga kusapwila bantu musapu muyampe. Poendelela na kwifunda Bible, ukayuka muswelo wa kwingidija Bible pa kusapwila bantu byobya byoitabije ne myanda miyampe.​—Tanga Loma 10:13-15.

Bantu bavule bashilulanga na kusapwila balunda ne babutule myanda miyampe. Ikala na bunwa. Pa kyaba kya kwibalombola’mba kipwilo kyabo i kya bubela, abe wibasapwile bilaile Leza. Vuluka’mba bantu bakatengwa bininge na ngikadila yobe miyampe kupita’ko na byonena.​—Tanga 2 Temote 2:24, 25.

Kwifunda Kinenwa kya Leza kukakukwasha utamije kipwano kyobe na Leza. Bityebitye, ukekala na kipwano kya pa bula na Yehova. Ukekala wandi ne kutwela mu kisaka kyandi.​—Tanga 2 Kodinda 6:18.

Ubwanya kwendelela ku mushipiditu na kwifunda nyeke Kinenwa kya Leza. (Bahebelu 5:13, 14) Lomba Kamoni umo wa Yehova efunde nobe Bible kupityila ku dibuku Lelo I Bika Bitufundija Bible? Poenda wifunda Kinenwa kya Leza, ne būmi bobe nabo bukenda bulumbulukila’ko.​—Tanga Ñimbo ya Mitōto 1:1-3; 73:27, 28.

Myanda miyampe itambanga kudi Yehova, Leza wa nsangaji. Ukokeja kufwena kudi Leza na kufwena bantu bandi. (Bahebelu 10:24, 25) Shi wendelele kulonga bukomo bwa kusangaja Yehova, nabya usa kwenda ufwena ku būmi bwinebwine​—ke būmi bwa nyeke kadi. Bine, kufwena kudi Leza kyo kintu kilumbuluke mpata kyofwaninwe kulonga.​—Tanga 1 Temote 1:11; 6:19.