Ku boba basenswe Yehova Leza ne Kinenwa kyandi, Bible:

Yesu wānenene amba: “Mukayuka bubine, bubine nabo bukemupa bwanapabo.” (Yoano 8:32) Vuluka moweivwanine powasokwele bubine bwa mu Bible musunsa mubajinji! Byakusangeje pa kuyuka’mba tubwanya kuyuka bubine, mu ino ntanda miyule bubela.—2 Temote 3:1.

Yehova usakanga tuyuke bubine. Kadi byotusenswe bantu, tusakanga kwibasapwila’bo. Inoko kwingidila Leza kulomba bivule. Tufwaninwe kulonga bukomo bwa kwiendeja bu bene Kidishitu mwanda tulēmekele bininge misoñanya ya Yehova. Yesu wālombwele muswelo wa mvubu mpata otubwanya kulombola Leza amba tumusenswe. Wānenene amba: “Shi mulame mbila yami, mukekala nyeke mu buswe bwami, monka mondamine mbila ya Tata ne kwikala nyeke mu buswe bwandi.”—Yoano 15:10.

Yesu usenswe Shandi bya binebine, kadi uloñanga bintu byonso bimunena Shandi kulonga. Shi twiule Yesu mu muswelo otwiendeja, Yehova uketusanswa kadi tukekala na nsangaji ya binebine. Monka mwānenene’kyo Yesu amba, “shi muyukile bino bintu, mwi ba nsangaji shi mulonga’byo.”—Yoano 13:17.

Tukulupile amba dino dibuku dikakukwasha wiendeje mungya bubine bwa mu Bible ne kwikala mulunda na Leza. Tulombela wendelele kutamija buswe bosenswe Leza ne kwikala nyeke “mu buswe bwa Leza . . . pa mwanda wa būmi bwa nyeke.”—Yude 21.