BANTU bakwabo bākashikete pa kyaba kitelwa bu Ulu, pa kupwa kwa Dilobe. Ulu wāikala ke kibundi kikatampe kya mobo mayampe shē. Inoko bantu ba mu kino kibundi bādi batōta baleza ba bubela. Kadi bālongele enka uno muswelo ne mu Babele mwine. Bantu ba mu Ulu ne mu Babele kebādipo pamo bwa Noa ne wandi mwana Shema, bāendelele na kwingidila Yehova.

Ku mfulo, myaka 350 kupwa kwa dilobe, Noa muntu wa kikōkeji wāfwa. Pāpityile myaka ibidi, uno muntu omwene pa kino kifwatulo nandi wābutulwa. Wādi umonwa na Leza bu muntu mwishile na bakwabo, umusangaja. Wādi utelwa dya bu Abalahama. Wādi ushikete na kisaka kyandi mu kino kibundi kya Ulu.

Difuku dimo Yehova wāsapwila Abalahama’mba: ‘Funduka mu Ulu ne mu babutule bobe, wende ku ntanda yonkakulombola.’ Lelo Abalahama wākōkele Leza ne kushiya byabupeta byonso byeñenya bya ntanda ya Ulu? Eyo, wākōkele. Kadi wāyukene bu Mulunda na Leza mwanda wādi ukōkele Leza nyeke.

Pāfundukile Abalahama mu Ulu, bamobamo ba mu kyandi kisaka bāendele nandi pamo. Shandi Tela nandi wāendele nandi. Ne Lota mwanā mwanabo nandi monka. Sala mukaja Abalahama nandi kāshelepo, wāenda nabo. Lwendo lwādi lulampe, ponka’po bāfika mu kibundi kitelwa bu Halane, mwāfwidile Tela. Kibundi kya Ulu kyādi ke kishale kulampe.

Mafuku pa kupita’po, Abalahama ne kisaka kyandi bākuta lwendo kutamba mu Halane ne kwenda mu ntanda itelwa bu Kenani. Kwine’kwa, Yehova kanena’mba: ‘Nkapānanga ntanda ino’i ku bobe bana.’ Abalahama wāshikata mu Kenani ne kulāla mu mapema.

Leza wāshilula kukwasha Abalahama, ebiya wāikala na luombe lukatampe lwa mikōko ne banyema bakwabo ne bengidi tutwa na tutwa. Inoko aye ne wandi mukaji Sala kebādipo na bana.

Abalahama pādi na myaka 99, Yehova wāmunena’mba: ‘Nakulaya’mba ukekalanga shandya mizo mivule ya bantu.’ Ino lelo uno mwanda wādi wa kulongeka muswelo’ka, byādi ba Abalahama ne Sala ke banunu bininge, kebakidipo na muswelo wa kubutula?