‘Mufwaninwe kwikala bafundiji.’ (Bah. 5:12) Langa’po bidi! Yehova​—Mufundiji muyampe kupita bonso mūlu ne pano panshi​—witunena tufundije bakwetu myanda yandi! Mwingilo o-onso wa kufundija bubine butala padi Yehova​—mu kisaka, mu kipwilo, nansha mu busapudi​—i dyese dikatampe, ino kadi i kiselwa kilēma. Le tukeubwanya namani?

Malondololo atanwa mu binenwa bya mutumibwa Polo byaālembēle Temote amba: “Wielele’ko nyeke kutanga ku meso a bantu, kwisāshila, ne kufundija.” Polo ubweja’ko amba: “Shi ulonge namino ukepandija abe mwine ne boba bakwivwana.” (1 Tm. 4:13, 16) Bine, udi na musapu upandija būmi wa kusapula. O mwanda i biyampe kulonga bukomo bwa kulumbulula butangi ne bufundiji bobe. Uno boloshile i mulupulwe mwanda wa kukukwasha ulonge namino. Tala bidi myanda mityetye’tu idi’mo.

Yehova i ‘Mufundiji Mukatakata.’ (Isa. 30:20) Nansha uno boloshile byasa kukukwasha ulumbulule bwino bobe bwa bu mutangi ne bu mufundiji, ino kokelwa nansha dimo amba Yehova ye Nsulo ya musapu wetu ne amba aye ye ukokanga bantu. (Yoa. 6:44) Nanshi, lomba kyaba kyonso mushipiditu ujila. Kokekaka kwingidija Kinenwa kya Leza. Kokela milangwe padi Yehova, ke pa abe mwinepo. Longa bukomo bwa kutamija buswe bwa kuswa Leza mu mityima ya bevwaniki bobe.

Unenwe kufundija musapu wa mvubu mpata kewasapwidilwe bantu kashā. Tudi na kikulupiji amba shi ukulupile mu “bukomo bupāna Leza,” nabya ukabwanya.​—1 Pe. 4:11.

Bafundiji pamo bwa abe,

Kitango Kyendeji kya Batumoni ba Yehova