Bavule balañanga’mba Batumoni ba Yehova i dijina dya kipwilo kipya. Inoko, pano kepadi myaka 2 700 ne kupita, bengidi ba Leza umo kete wa bine bādi batelwa bu bandi “batumoni.” (Isaya 43:10-12) Kumeso kwa 1931 twadi tuyukene bu Befundi ba Bible. Mwanda waka twaselele dijina dya bu Batumoni ba Yehova?

Diyukanyanga Leza wetu. Kukwatañana na bilembwa bya ku makasa bya kala, dijina dya Leza, Yehova, ditanwa mu Bible misunsa tununu ne tununu. Mu malamuni mavule dino dijina i dipingakanibwe na bitenta, kimfwa Mfumwetu nansha Leza. Inoko, Leza wa bine wēsokwele kudi Mosesa pa dijina dyandi dya kasuku, Yehova, ne kunena’mba: “Dino’di dyo dyami dijina dya nyeke.” (Divilu 3:15) Mu uno muswelo, wāikele kwishiañanya na baleza bonso ba bubela. Twitembanga kusela kotuselele dijina dijila dya Leza.

Dilombolanga mwingilo wetu. Bantu ba kala bavule bene, kushilwila kudi Abele, muntu moloke, bāsapwile bukamoni bwa lwitabijo lwabo mudi Yehova. Mu bula bwa tutwa twa myaka, ba Noa, Abalahama, Sala, Mosesa, Davida, ne bakwabo nabo bēlungile ku kino “kibumbo kikatampe . . . kya batumoni.” (Bahebelu 11:4–12:1) Pamo’nka bwa muntu usapula bukamoni bwa kubingija muntu wampikwa mambo mu kidye, netu twi basumininwe kuyukanya bubine butala padi Leza.

Twiulanga Yesu. Bible umutela bu “kamoni mukōkele kadi wa bine.” (Kusokwelwa 3:14) Yesu mwine wānenene amba ‘wāyukenye dijina dya Leza’ ne ‘kusapula bukamoni bwa bubine’ butala padi Leza. (Yoano 17:26; 18:37) Nanshi, balondi ba binebine ba Kidishitu bafwaninwe kusela dijina dya Yehova ne kwidiyukanya. Batumoni ba Yehova beelelanga’ko kulonga kino.

• Mwanda waka Befundi ba Bible baselele dijina dya bu Batumoni ba Yehova?

• Le Yehova udi na batumoni pano pa ntanda tamba kitatyi’ka?

• Le Kamoni mukatakata wa Yehova i ani?