Njibo yonso ya Bulopwe ya Batumoni ba Yehova iselele dijina dijila dya Leza. O mwanda tumwene amba kukundula’yo ikale imweka biyampe ne kwiilongolola i dyese kotudi, kadi i kintu kya mvubu mu butōtyi bwetu bujila. Bonso bakokeja kwingila’ko.

Kundula Njibo ya Bulopwe shi kupwila kubapu. Shi kupwila kubapu, batutu ne bakaka bakundulanga na nsangaji Njibo ya Bulopwe bukidibukidi ne kushiya bintu mu ndudi. Musunsa umo mu yenga, bakundula’yo bininge. Mukulumpe umo nansha mwingidi wa mingilo wimaninanga uno mwingilo, na kulonda divule pa papye bintu bya kulonga. Mungya bisakibwa, kwikalanga bantu bepāna mwanda wa kukomba, kukolopa, ne kupampula luvumbi, kuningija bishikatwa, kukundula ne kwela lawa ya kwipaya bishi ku misalani, kukenda madidisha, kulongolola ku kyala, kukomba pa lubanza, ne kulongolola lupango. Musunsa umo ku mwaka, kudi difuku dya bukundwe bwa kamfula-nkonko. Shi twiya na bana ku mingilo ya uno muswelo, twibafundijanga kulēmeka kifuko kyetu kya kutōtela’po.—Musapudi 5:1.

Lunga kuboko ku kulongolola byonekele’ko. Mwaka ne mwaka, Njibo ya Bulopwe ibandaulwanga kamo ne kamo munda ne panja. Buno bubandaudi bukwashanga tulongolole njibo kitatyi ne kitatyi mwanda wa ikale senene kutyina kujimija lupeto bitupu. (2 Bilongwa 24:13; 34:10) Njibo ya Bulopwe mikundulwe ne milamibwe senene i kifuko kiyampe kutōtela’po Leza wetu. Kitatyi kyotulunga kuboko ku ino mingilo, tulombolanga’mba tusenswe Yehova kadi tumwene na mvubu kifuko kyetu kya kumutōtela’po. (Ñimbo ya Mitōto 122:1) Ne kino kilengejanga bantu mu kibundi batendele.—2 Kodinda 6:3.

• Mwanda waka ketufwaninwepo kusūla kifuko kyetu kya kutōtela’po?

• Le i mpangiko’ka ikwatwanga mwa kulamina Njibo yetu ya Bulopwe ikale itōka?