Boba bakitamba mu kwisonga basakanga nsangaji yabo yobaivwene difuku dya butundaile yendelele nyeke. Ne i bya bine, ibwanya kwendelela. Bene Kidishitu besongele ke padi myaka ne balondele madingi a mu Bible mu busongi bwabo bayukile amba bibwanika.

1. Lelo Bible i mupe balume madingi’ka?

Yehova i mutonge mulume ekale mutwe wa kisaka. (Tangai Bene Efisesa 5:23.) Yehova usaka balume bakwate butyibi bumwena’mo kisaka. Bible udingila balume amba: “Sanswai nyeke bakaji benu.” (Bene Efisesa 5:25) Le kino kishintulula bika? Mulume wa buswe ulongelanga mukajandi bintu na kanye, mwikale i mu bantu nansha kufula. Umukiñanga ku kintu kibwanya kumusanshija kadi umuvuilanga bisakibwa byandi bya ku ngitu ne bya mu malango. (1 Temote 5:8) Ne kya mvubu mpata, utangidilanga mu kuvuija bisakibwa byandi bya ku mushipiditu. (Mateo 4:4) Kimfwa, ubwanya kulombela ne kutanga Bible pamo na mukajandi. Shi mulume wakwatakanya namino mukaji na buswe, ukalama ne kipwano kyandi na Yehova.​—Tangai 1 Petelo 3:7.

2. Le Bible i mupe bakaji madingi’ka?

Kinenwa kya Leza kidingila mukaji amba “ufwaninwe kulēmeka mulumyandi bikatampe.” (Bene Efisesa 5:33) Le ukebilonga namani? I na kulangulukila pa ngikadila miyampe ya mulumyandi ne pa bukomo bwalonga mwanda wa kumulela aye pamo ne bana. Ubwanya kadi ne kulombola bulēme na kukwatakanya butyibi bukwata wandi mulume, na kunena nandi biyampe ne na kumunenena māya nansha shi mulume i wampikwa kwitabija.

3. I muswelo’ka ubwanya ba mulume ne mukaji kukomeja busongi bwabo?

Bible unena pa ba mulume ne mukaji amba: “Abo babidi bakekala ngitu imo.” (Mateo 19:5) Kino kishintulula’mba bafwaninwe kulwa na kintu kyo-kyonso kibwanya kwibakalañanya. Bakalwa nakyo shi besapwila kyaba ne kyaba milangwe ne miivwanino yabo na kanye ne na buswe. Kutalula’mo Yehova kete, kebafwaninwepo kuleka muntu nansha kintu kikwabo kikale na mvubu mpata kupita mwinē pabo. Ne nakampata, bafwaninwe kudyumuka kutyina kutamija kipwano kyampikwa kufwaninwa na muntu ungi.

 LANGULUKA BININGE

4. A balume​—sanswai bakaji benu kadi mwibakwatakanyei

5. A bakaji​—sanswai balume benu kadi mwibalēmekei

Bible ukankamika mukaji kulēmeka mulumyandi, ekale wingidilanga Yehova nansha kamwingidilangapo. Tangai 1 Petelo 3:1, 2, ne kwisambila pa bino bipangujo:

• Shi udi na mulume wampikwa kwitabija, na bubine ukimbanga nandi ashilule kutōta Yehova. Molangila, muswelo muyampe i wepi​—le i wa kumusapwila myanda ya Leza kyaba ne kyaba’ni nansha i wa kumwekeja ngikadila miyampe ne bulēme kwadi? Mwanda waka ubanena nankyo?

Balume ne bakaji babwanya bonso kukwata butyibi buyampe. Inoko kyaba kimo mukaji ukokeja kupela kwitabija byanena mulumyandi. Shi bidi nankyo, ufwaninwe kulombola mulume milangwe yandi na butūkanye ne na bulēme, inoko kakilwa amba Yehova i mupe mulume kiselwa  kya kukwata butyibi bwa byobya bibwanya kumwena’mo kisaka kyandi. Nanshi mukaji ufwaninwe kulonga bukomo bwa kukwatakanya butyibi bwa mulumyandi. Shi webukwatakanya, ukalengeja mu kisaka mwikale nsangaji. Tangai 1 Petelo 3:3-5, ne kwisambila pa kino kipangujo:

• Le Yehova wiivwananga namani shi mukaji ulēmeka mulumyandi?

6. Mubwanya kunekenya makambakano a mu busongi bwenu

 MU KĪPI

Ba mulume ne mukaji babwanya kwikala na nsangaji shi besanswe abo bonso, belēmeke abo bonso, kadi balonde ne misoñanya ya mu Bible.

Pitulukai’mo

• I muswelo’ka ubwanya mulume kulengeja mu busongi bwabo mwikale nsangaji?

• I muswelo’ka ubwanya mukaji kulengeja mu busongi bwabo mwikale nsangaji?

• Shi wi musonge nansha musongwe, i musoñanya’ka wa mu Bible ubwanya kuningija busongi bwenu?