KIFUNDWA 35
Mwa Kukwatyila Butyibi Buyampe
Batwe bonso twikalanga na butyibi bwa kukwata. Butyibi bumo bubwanya kwikala na lupusa potudi ne pa kipwano kyetu na Yehova. Kimfwa, tubwanya kukwata butyibi bwa kwa kukashikata, mwa kusokwela kalupeto kotusakilwa, ne bwa kusonga nansha kusongwa. Ino shi tubakwata butyibi buyampe, twikalanga na nsangaji mu būmi kadi tusangajanga Yehova.
1. Le ukengidija namani Bible akukwashe ukwate butyibi buyampe?
Kumeso kwa kukwata butyibi, lomba Yehova akukwashe, kadi bandaula byobya binena Bible pa mwanda’wa. (Tangai Nkindi 2:3-6.) Kyaba kimo, Yehova uletanga musoñanya mumweke patōka. Shi bidi nankyo, kukwata butyibi bwa kukōkela musoñanya’wa ko kwa kamweno kodi.
Pene’pa bikekala namani shi kepadipo musoñanya mumwekelele wa mu Bible ukulombola bya kulonga? Ne pano napo, Yehova ukakwendeja “mu dishinda dyofwaninwe kwenda.” (Isaya 48:17) Namani le? Kukokeja kumweka misoñanya ya kukuludika. Misoñanya ya mu Bible i bubine bwa kyalwilo bulombola patōka byobya bilanga Yehova ne mwawiivwanina pa mwanda kampanda. Divule tuyukanga mwiivwanina Leza pa mwanda kampanda, potutanga nsekununi kabidye ya mu Bible. Shi tubajingulula bisaka Yehova, papo tubwanya kukwata butyibi bumusangaja.
2. I myanda’ka yofwaninwe kubandaula kumeso kwa kukwata butyibi?
Bible unena’mba: “Mukosoke ulangulukilanga pa matabula onso.” (Nkindi 14:15) Kino kishintulula’mba kumeso kwa kukwata butyibi, tufwaninwe kwilamija’ko kitatyi kya kulangulukila pa butyibi bwetu. Pobandaula bya kutonga, wiipangule amba: ‘I misoñanya’ka ya mu Bible itala uno mwanda? I butongi’ka bukalengeja ngikale na ndoe ya mutyima? Le butongi bwami bukatenga namani būmi bwa bakwabo? Ne kya mvubu mpata, le bukasangaja Yehova?’—Kupituluka mu Bijila 32:29.
Yehova udi na lupusa lwa kwitusapwila kiyampe ne kibi. Shi tuyuke senene mbila ne misoñanya yandi kadi tusumininwe kwiilonda, nabya tukekala na mutyima wa mundamunda muyampe. Mutyima wa mundamunda i bukomo bwa munda bwitukwasha kujingulula kiyampe ne kibi. (Bene Loma 2:14, 15) Mutyima wa mundamunda mufundijibwe uketukwasha tukwate butyibi buyampe.
LANGULUKA BININGE
Tala misoñanya ya mu Bible ne mutyima wa mundamunda mobitukwashisha bininge mu kukwata butyibi.
3. Itabija Bible akuludike
Le misoñanya ya mu Bible ibwanya kukuludika namani pa kukwata butyibi? Talai VIDEO, ne kwisambila pa bipangujo bilonda’bya.
-
Le bwanapabo bwa kwitongela i bika?
-
Mwanda waka Yehova wetupēle bwanapabo bwa kwitongela?
-
Le i bika byaetupēle bitukwasha twingidije senene bwanapabo bwa kwitongela?
Pa kumona’ko kimfwa kimo kya musoñanya wa mu Bible, tangai Bene Efisesa 5:15, 16. Kupwa, mwisambilei pa muswelo omubwanya kwingidija “biyampe shē kitatyi kyenu” na . . .
-
kutanga Bible kitatyi ne kitatyi.
-
kukimba kwikala mulume, mukaji, mbutwile, nansha mwana muyampe.
-
kutanwa ku kupwila.
4. Fundija mutyima obe wa mundamunda mwa kukwatyila butyibi buyampe
Shi musoñanya wa mu Bisonekwa udi padi tō, butyibi papo i bupēla. Ino bikekala namani shi musoñanya keumwekelepo patōka? Talai VIDEO, ne kwisambila pa kipangujo kilonda’kya.
-
Mu ino video, i matabula’ka akwata kaka a kufundija mutyima wandi wa mundamunda mwa kukwatyila butyibi busangaja Yehova?
Mwanda waka ketufwaninwepo kwipangula bakwabo betulombole butyibi bwa kukwata? Tangai Bahebelu 5:14, ne kwisambila pa bino bipangujo:
-
Nansha shi kwipangula bakwabo butyibi botufwaninwe kukwata kumweka bu ko kupēla, i bika byotufwaninwe kwijingulwila batwe bene?
-
Le i bintu’ka byodi nabyo bikakukwasha ufundije mutyima wa mundamunda ne kukwata butyibi buyampe?
Mutyima wetu wa mundamunda witukwashanga tuyuke kwa kwenda mu būmi, pamo’nka na mwitukwashijanga kalata
5. Lēmeka mityima ya mundamunda ya bakwabo
Bantu beshileshile babwanya kukwata butyibi bwishileshile. Pene’pa tukalombola namani amba twi balēmeke mityima ya mundamunda ya bakwetu? Tubandaulei’ko ino myanda ibidi:
Mwanda 1: Kaka kampanda usenswe kwipenta ku milomo ne mu mpala wavilukila mu kipwilo kikwabo mudi bakaka kebebidile’byopo.
Tangai Bene Loma 15:1 ne 1 Bene Kodinda 10:23, 24, ne kwisambila pa bino bipangujo:
-
Le i butyibi’ka bubwanya uno kaka kukwata na kulonda ano mavese? Le ukalonga namani shi mudi na muntu wa mutyima wa mundamunda umupeleja kulonga byobya bitabije obe mutyima wa mundamunda?
Mwanda 2: Tutu umo uyukile amba Bible kapelejepo kutoma mālwa pa ntomeno, inoko watonge’tu kuleka kwiatoma. Kupwa, waitwe ku fetyi kampanda ne kumona’ko banabetu bakwabo batoma mālwa.
Tangai Musapudi 7:16 ne Bene Loma 14:1, 10, ne kwisambila pa bino bipangujo:
-
Le i butyibi’ka bubwanya uno tutu kukwata na kulonda ano mavese? Le ukalonga namani pomona muntu mukwabo ulonga kintu kampanda kikupeleja mutyima obe wa mundamunda kulonga?
Matabula akutwala ku butyibi buyampe?
1. Lomba Yehova akukwashe uyuke kya kutonga.—Yakoba 1:5.
2. Longa bukimbi mu Bible ne mu mabuku esambila pa Bible mwanda wa usokole’mo misoñanya itala myanda’ya. Ubwanya ne kwipangula bene Kidishitu batame ku mushipiditu.
3. Tala butongi bobe mobukatengela mutyima obe wa mundamunda ne wa bakwabo.
BANTU BAMO BANENANGA’MBA: “Longa kyonso kyosaka. Le kukidi ne muntu utanga mutyima ku bilanga bakwabo?”
-
Mwanda waka i biyampe kuta mutyima ku mwiivwanino wa Leza ne wa bakwabo?
MU KĪPI
Tubwanya kukwata butyibi buyampe shi tubapu kujingulula mwiivwanina Leza pa mwanda kampanda ne pa kupwa kubandaula shi bilongwa byetu bikakwasha bantu bakwabo nansha kwibasanshija.
Pitulukai’mo
-
Le ukakwata namani butyibi busangaja Yehova?
-
I muswelo’ka obwanya kufundija mutyima obe wa mundamunda?
-
Le ukalēmeka namani mityima ya mundamunda ya bakwabo?
KIMBA
Le ukakwata namani butyibi buningija kipwano kyobe na Leza?
“Kwata Butyibi Bulēmekeja Leza” (Kiteba kya Mulami, 1 Kweji 4, 2011)
Wifundile’ko miswelo mikwabo ya mwitupēlanga Yehova madingi.
Tala bintu byakweshe muntu umo akwate butyibi bukomo.
Wifunde uyuke mwa kusangeja Yehova mu myanda mwampikwa bulombodi bumwekelele.
“Lelo Usakilwa Bible Akuludike Nyeke?” (Kiteba kya Mulami, 1 Kweji 12, 2003)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
