KIFUNDWA 22
Byofwaninwe Kulonga pa Kusapula Myanda Miyampe
Poenda wifunda myanda ya mu Bible, padi ubwanya kunena’mba, ‘Muntu ense ufwaninwe kuyuka bino’bi!’ I bine, muntu ense ufwaninwe kuyuka bubine bwa mu Bible! Inoko, padi ukevwana moyo wa kusapwila’mo bantu bakwabo byobya byofundile. Leka nanshi twisambile pa muswelo obwanya kunekenya uno moyo amba ushilule kusapula na nsangaji myanda miyampe ya mu Bible.
1. Le ukasapula namani ku bantu boyukile myanda yofundile?
Bana ba bwanga ba Yesu bānenene amba: “Ketubwanyapo kuleka kwisamba bintu byotwamwene ne byotwaivwene.” (Bilongwa 4:20) Bādi bakwete bubine na mutyika, enka nenki kebakimbe kusapwila’bo bantu bavule bene. Lelo nobe usakanga kulonga namino? Shi i amo, kimba mikenga yobwanya kusapwila ba kisaka ne balunda na bulēme myanda yowifundile.—Tangai Bene Kolose 4:6.
Miswelo imo ya mwa kushilwila
-
Pa kwisamba na muntu wa mu kisaka, shilula mwanda kampanda wa mu Bible na kunena’mba: “Uno yenga, nafundile mwanda umo usangaja.”
-
Lombola mulunda nobe ubela nansha uzumbija mutyima kisonekwa kikankamika.
-
Mwinē pobe wakwipangula mwapityīle yenga obe, mulombole byobya byowafundile mu kifundwa kyobe kya Bible nansha ku kupwila kwa pa kipwilo.
-
Lombola balunda nobe site yetu ya jw.org.
-
Bakwabo wibete mushikate nabo kitatyi kyobakufundija Bible ne kwibalombola muswelo obabwanya nabo kulomba’kyo pa jw.org.
2. Mwanda waka kusapula pamo na kipwilo i kitungo kiyampe kwitungila?
Bana ba bwanga ba Yesu kebāimaninepo’tu enka pa kusapula myanda miyampe ku bantu bobādi bayukile. Yesu wēbatumine “babidi babidi bamutangidile mu kibundi ne kibundi ne mu kifuko ne kifuko mwaadi wa kwenda” kukasapula. (Luka 10:1) Uno mwingilo muteakanibwe senene wa busapudi wāpēle bantu bavule mukenga wa kwivwana myanda miyampe. Kadi kusapula kwāletēle bana ba bwanga nsangaji mikatampe. (Luka 10:17) Lelo nobe ubulwe kwitungila kitungo kya kusapula pamo na kipwilo?
LANGULUKA BININGE
Kimba muswelo wa kunekenya moyo amba wimwene nsangaji itamba mu kusapula myanda miyampe.
3. Yehova usa kwikala nobe
Bantu bamo basakanga kusapula, padi bevwananga moyo pa muswelo obasa kwibatulumuka ne bisa kulonga’po bantu.
-
Lelo nobe wivwene moyo wa kusapula byobya byofundile? Shi i amo, mwanda waka? Kadi shi kwivwene’opo, mwanda waka?
Talai VIDEO, ne kwisambila pa kipangujo kilonda’kya.
-
Le bano Batumoni bankasampe banekenye namani moyo wabo?
Tangai Isaya 41:10, ne kwisambila pa kino kipangujo:
-
Shi ubaivwana moyo wa kusapula, lelo milombelo ikakukwasha namani?
Le wadi uyukile?
Batumoni ba Yehova bavule badi balanga bidi amba kebabwanyapo kusapwila bantu bakwabo myanda miyampe. Tala kimfwa Sergey, wadi wimona bu muntu wampikwa kufwaninwa kadi wadi ukomenwa kwisamba na bantu. Ponka’po washilula kwifunda Bible. Unena’mba: “Nansha byonadi na moyo, nashilwile kusapwila bantu myanda yonadi nefunda. Kadi natulumukile, mwanda kusapwila bantu myanda ya mu Bible kwaningije kikulupiji kyami. Kadi kwashimatyije mu mutyima wami myanda yonadi nefunda.”
4. Lama bulēmantu
Pa kusapula myanda miyampe, kokabandaula’nka bine bya kunena, ino tala ne muswelo wa kwibinena. Tangai 2 Temote 2:24 ne 1 Petelo 3:15, ne kwisambila pa bino bipangujo:
-
I muswelo’ka obwanya kulonda madingi adi mu ano mavese posapwila bakwabo myanda ya mu Bible?
-
Bantu bamo ba mu kisaka ne balunda babwanya kupela byonena. Le ukalonga’po namani? I bika byokufwaninwepo kulonga?
-
Mwanda waka i biyampe’ko kwingidija bipangujo na bunwa pa kyaba kya kwibasapwila na bukomo bya kulonga?
5. Kusapwila bantu myanda miyampe kuletanga nsangaji
Yehova wāpēle Yesu mwingilo wa kusapula myanda miyampe. Le Yesu wādi umona namani uno mwingilo? Tangai Yoano 4:34, ne kwisambila pa bino bipangujo:
-
Kudya bidibwa kukwashanga twikale biyampe mu būmi kadi kwituletelanga nsangaji. Mwanda waka Yesu wādingakenye kulonga kiswa-mutyima kya Leza—kubadila’mo ne kusapula myanda miyampe—na kudya bidibwa?
-
Molangila, i nsangaji ya muswelo’ka ibwanya kulupuka mu kusapula myanda miyampe?
Manwa
-
Potanwa ku kupwila kwa mu bukata bwa yenga, wifunde’ko manwa a mwa kushilwila mīsambo.
-
Kokelwa kwilembeja bu mwanā masomo ku kupwila kwa mu bukata bwa yenga. Bipindi bipebwa bana ba masomo bibwanya kukukwasha witeakanye senene mwa kusapwila bantu bakwabo byobya byowifunda.
-
Ingidija bipindi bimo bya mu bino bifundwa binena’mba “Bantu Bamo Banenanga’mba” ne “Muntu Ubwanya Kwipangula’mba” mwanda wa wiibidije kuyuka muswelo obwanya kulondolola ku bipangujo ne bijika bivudile kumweka.
MUNTU UBWANYA KWIPANGULA’MBA: “Ela mapya?”
-
Le ubwanya namani kuboya uno mukenga mwanda wa kusapwila muntu byobya byowifundile mu Bible?
MU KĪPI
Kusapwila bantu myanda miyampe kuletanga nsangaji, kadi kushilula kusapula ke kukomopo padi na molangila.
Pitulukai’mo
-
Mwanda waka i biyampe kusapwila bantu myanda miyampe?
-
Le ubwanya kwiisapula namani ne bulēme ponka?
-
I muswelo’ka obwanya kunekenya moyo pa kusapula?
KIMBA
Tala miswelo iná ipēla yobwanya kusapula na kwingidija kalata ka bupempudi ka jw.org.
Musapwilo wa Kulondela’po wa Mwa Kupānina Kalata ka Bupempudi ka JW.ORG (1:43)
Wifunde muno ngikadila iná ikakukwasha usapule myanda miyampe.
“Le Wi Mwiteakanye Kwikala Kiluwe kya Bantu?” (Kiteba kya Mulami, Kweji 9, 2020)
Tala kimfwa kimo kya mu Bible mokibwaninya kukupa bukankamane bwa kusapula myanda miyampe, nansha shi wi mwanuke.
Tala mwa kwisambila na babutule myanda ya mu Bible, boba kebefundile myanda ya Yehova.
“Tenga Mutyima wa Babutule Bampikwa Kwitabija” (Kiteba kya Mulami, 15 Kweji 3, 2014)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
