KIFUNDWA 17
Lelo Yesu Udi Namani?
Kitatyi kyotwifunda bintu byānenene Yesu ne byaālongele pano pa ntanda, tusokolanga ngikadila itufwenya kwadi ne kudi Shandi, Yehova. Le i ngikadila’ka imo isangaja yadi nayo? Ne le i muswelo’ka otubwanya kwiula Yesu mu būmi bine?
1. I mu miswelo’ka mwiifwene Yesu na Shandi?
Yesu paādi mūlu, wādi utala Shandi ne kwifundila kwadi mu bula bwa myaka midiyala ne midiyala. O mwanda mwine wiivwananga, ulañanga, ne kulonga bintu pamo bwa Shandi. (Tangai Yoano 5:19.) Na bubine, Yesu i mumwekeje mu muswelo mubwaninine bumuntu bwa Shandi, enka nenki wanena ne kunena’mba: “Yewa ense umona ami wamone ne Tata mwine.” (Yoano 14:9) Poenda wifunda bumuntu bwa Yesu, ukayuka Yehova biyampe. Kimfwa, lusa lwālombwele Yesu ku bantu lulombola muswelo ukumona Yehova.
2. Le Yesu wālombwele namani amba usenswe Yehova?
Yesu wānenene amba: “Mwanda wa ino ntanda iyuke amba nsenswe Tata, noñanga monka munsoñaninye Tata kulonga.” (Yoano 14:31) Yesu paādi pano pa ntanda, wālombwele buswe bukatampe bwasenswe Shandi, na kumukōkela enka ne pobyādi bikomo. Kadi Yesu wādi usenswe kwisamba na Shandi, ne kukwasha bantu bapwane na Shandi.—Yoano 14:23.
3. Le Yesu wālombwele namani amba usenswe bantu?
Bible unena’mba Yesu ‘usenswe bikatampe bantu.’ (Nkindi 8:31, kunshi kwa dyani) Wālombwele buno buswe na kukankamika ne kukwasha bantu pampikwa kwisakila. Wālongele bingelengele mwanda wa kulombola bukomo bwandi, ino i ne mwanda wa kulombola lusa lwandi. (Mako 1:40-42) Wādi wikele biyampe na bantu kadi kwampikwa mboloji. Binenwa byandi byādi bisenga kadi bipāna lukulupilo ku bantu ba mityima myoloke bādi bamuteja. Yesu wāitabije kususuka ne kufwa mwanda wa buswe bwasenswe bantu bonso. Kadi usenswe nakampata boba bonso balonda bufundiji bwandi.—Tangai Yoano 15:13, 14.
LANGULUKA BININGE
Wifunde bivule bya mwādi mwikadile Yesu. Kadi tala ne muswelo obwanya kwiula buswe ne buntu bwandi.
4. Yesu usenswe Shandi
Kimfwa kya Yesu kitufundija muswelo otubwanya kusanswa Leza. Tangai Luka 6:12 ne Yoano 15:10; 17:26. Pa kupwa kutanga kisonekwa ne kisonekwa, mwisambilei pa kino kipangujo:
-
I muswelo’ka otukalombola’mba tusenswe Yehova, na kwiula Yesu?
Yesu wādi usenswe Shandi udi mūlu kadi wādi wisamba nandi kyaba ne kyaba mu milombelo
5. Yesu wivwaninanga lusa boba basakilwa bukwashi
Yesu wādi ubadikija bisakibwa bya bakwabo kumeso kwa byandi. Nansha ke paādi mukōke, wāingidije kitatyi ne bukomo bwandi mwanda wa kukwasha bakwabo. Tangai Mako 6:30-44, ne kwisambila pa bino bipangujo:
-
Mu ino nsekununi, i bika byālongele Yesu bilombola’mba utele bakwabo mutyima?—Tala vese 31, 34, 41, ne 42.
-
I kika kyādi kitonona Yesu akwashe bantu?—Tala vese 34.
-
Yesu byaāmwekeje bumuntu bwa Yehova, le bino bikufundija bika padi Yehova?
-
I mu miswelo’ka imo motubwanya kwiula Yesu na kuta bantu mutyima?
6. Yesu udi na buntu
Yesu wālombwele buntu nansha byakādipo na bintu bivule bya ku ngitu, kadi i mwitukankamike netu twikale na buntu. Tangai Bilongwa 20:35, ne kwisambila pa kino kipangujo:
-
Mungya Yesu, i muswelo’ka otubwanya kwikala na nsangaji?
Talai VIDEO, ne kwisambila pa kino kipangujo:
-
I mu miswelo’ka motubwanya kupāna nansha shi ketudipo na bintu bivule ku ngitu?
Le wadi uyukile?
Bible witufundija tulombele kudi Yehova kupityila mu dijina dya Yesu. (Tangai Yoano 16:23, 24.) Potulombela uno muswelo, tulombolanga’mba tufwijanga’ko pa byobya byālongele Yesu mwanda wa kwitukwasha twikale balunda na Yehova.
BANTU BAMO BANENANGA’MBA: “Leza katelepo mutyima ku masusu etu.”
-
Yesu byawāmwekeje bumuntu bwa Shandi, le bilongwa byandi bilombolanga namani amba Yehova witutele mutyima?
MU KĪPI
Yesu usenswe Yehova, kadi usenswe ne bantu. Yesu byaifwene Shandi, nanshi shi umuyuke bininge, nabya ubayuka ne Yehova.
Pitulukai’mo
-
I muswelo’ka otubwanya kusanswa Yehova na mumusanshilwe Yesu?
-
I muswelo’ka otubwanya kusanswa bantu na mwibasanshilwe Yesu?
-
I ngikadila’ka ya Yesu yakusangaja bininge?
KIMBA
Tala ngikadila imoimo ya Yesu yotubwanya kwiula.
“Pa Kwiula Yesu, Ikala . . .” (Yesu—Dishinda, Bubine, ne Būmi, paje 317)
Tala mwingilo mulēme udi na Yesu mu milombelo yetu.
“Mwanda Waka Tulombele mu Dijina dya Yesu?” (Kiteba kya Mulami, 1 Kweji 2, 2008)
Le Bible kemunene’po kintu kampanda pa mumwekelo wa Yesu?
Le muswelo wādi wikele Yesu na bana-bakaji witufundija bika?
“Leza Ukwete Bana-Bakaji na Bulēme ne Bulēmantu” (Kiteba kya Mulami, 1 Kweji 10, 2012)
Tala'po Bidi ne Bino:
BIPANGUJO BIPANGULWANGA DIVULE
Le Kifundwa kya Bible Kīfundanga Batumoni ba Yehova na Bantu I Bika?
Mu mpangiko ya kwifunda Bible ku bitupu na Batumoni ba Yehova, ubwanya kwingidija’mo bwalamuni bo-bonso bwa Bible. Ita kisaka kyobe kyonso nansha balunda nobe batanwe’po.
