BAMBUTWILE bonso baloñanga mwanda umo mukatampe ukolela bantu kwivwanija. Bambutwile bonso babidi batyañanga kipindi kimo kimo kya ku ngitu yabo ke kintu kimo. Kine kyobatyangila pamo’kya kitaminanga munda mwa mama ke muntu mūmi mutuntulu. Nanshi ke kya kutulumukapo shi bantu beta kubutulwa kwa mwana bu “kingelengele kya lubutulo.”

Na bubine, kubutula bana i ngalwilo’tu ya kiselwa kya bambutwile. Dibajinji, bana ba bantu bekalanga bidi balelwa mu byonso, ino pobenda batama, basakilwanga kadi kutebwa mutyima ku bikwabo, ke’nkapo ku bisakibwa bya ku ngitu kete. Basakilwanga kwibakwasha mwa kutamina’bo mu ñeni, mu malango, mu mwikadilo, ne ku mushipiditu.

Pa kufikila pa butuntulu bonso, bana basakanga nakampata buswe bwa bambutwile. Nansha shi binenwa bya buswe bidi na mvubu, ino kulombola buswe mu bilongwa i kutabuke ne binenwa bine. Bine, bana basakanga kumona kimfwa kiyampe kya bambutwile. Basakanga kuludikwa mu mwikadila, ko kunena’mba misoñanya ya mwa kwikadila. Kadi basakilwa byonso bino tamba ku bunkasampe bwabo. Shi mwana kapebwapo bukwashi pa kitatyi kifwaninwe, ubwanya, ne i bine ukalonga bintu bizozeja mutyima.

Misoñanya milumbuluke kupita yonso i yoya itanwa mu Bible. Bufundiji bwimanine pa Bible budi na kamweno kupita bukwabo bonso. Shi bana bafundijibwe Bible, bakafula ku kujingulula amba byobya bibalombolwa, ke muntupo wibasapwila’byo, ino i Umpangi wabo, Shabo wa mūlu, unena’byo. Kino kikalengeja madingi ekale na lupusa lukatampe mpata kupita onso.

Bible ukankamika bambutwile kwingila na bukomo mwanda wa kutweja misoñanya myoloke mu ñeni ya babo bana. Inoko, kitatyi kyenda kitama bana, pavule pene bambutwile bamonanga’mba i bikomo kwisamba nabo  myanda ya mvubu mpata. Kino kitabo, Boila Ñeni Kudi Mufundiji Mukatampe, i kilembwe mwanda wa kukankaja ino ngikadilo kutyina’mba yakendelela. Kidi na myanda ya ku mushipiditu ikakwasha bambutwile kutangila’yo pamo na babo bana. Ne kadi, kishinsakanyanga mīsambo pa bukata bwa bankasampe ne boba batanga dino dibuku pamo nabo.

Ukamona’mba kino kitabo kilomba bana kuleta’po malondololo. I mulembwe bipangujo bivule bifwaninwe. Shi ubafika pa bino bipangujo, ukamona’po kashīko (—). Kino kikuvuluja pantu pa kwishinkija ne kukankamika mwana anene’po mwalangila. Bana basakanga nabo banena. Shi mwana katwejibwapo mu mīsambo, ukata mutyima kungi bukidibukidi.

Kintu kikwabo kya mvubu mpata i kino, bino bipangujo bikakukwasha uyuke bidi mu ñeni ya mwana. Kunena na bubine, mwana ukokeja padi kuleta malondololo a bubela. Inoko myanda milembwe ilonda kipangujo ne kipangujo i ya kukwasha mwana alame mulangilo moloke.

Kintu kikwabo kidi mu dino dibuku kishile na mu makwabo i bifwatulo byadyo 230. Bifwatulo bivule bidi na bushintuludi bulomba malondololo a mwana, kukwatañana na byamona ne byatanga. Pa kino, bandaula bifwatulo na mwana. I bingidilwa bilumbuluke bya bufundiji bilupwila patōka ñeni ya kuboila ku myanda yaefunda.

Shi mwana wayuka kutanga, mukankamike ekale ukutangila kino kitabo, witangila’kyo ne aye mwine. Kitatyi kyonso kyatanga’kyo, madingi mayampe adi’mo nao akenda ashala mu ñeni ne mu mutyima wandi. Ino pa kuningija bijimba bya buswe ne kalēmo pa bukata bobe ne obe mwana, longa buninge bobe bonso mwikale mutangila kino kitabo pamo, kadi kitatyi ne kitatyi.

Kintu kya makumi abala-anga a myaka kunyuma, bintu byadi bimweka bu mwiko ku bana kutala’byo, byo byobatala pano, kimfwa bulādi bwa munyanji, bya majende, ne bilongwa bikwabo bya bumvu. Pa kino basakilwa bulami, o mwanda kino kitabo kileta’bo na bulēmantu inoko pampikwa kafinda. Inoko, bana bafwaninwe nakampata kuludikwa ku Nsulo ya tunangu tonso, ke Yehova Leza, Tata wetu wa mūlu kadi. Yesu Kidishitu, Mufundiji Mukatampe, ye kwaādi uludikila bantu nyeke. Tukulupile na mutyima onso amba kino kitabo kekikabulwepo kwimukwasha banwe ne kisaka kyenu kumo kulongolola būmi bwenu bwikale bwa kusangaja Yehova, kadi na bubine mukeselwa madyese a nyeke ne nyekeke.