1-3. (a) Le i kyaka’ka kyātene bene Isalela pobātambilwe na bene Edipito? (b) Le Yehova wālwidile bantu bandi namani?

 BENE Isalela bātenwe mu kyaka—Aku lūlu lulalula koku nako dijiba kedyabukika. Kibumbo kya bulwi kya Edipito, na byabulwi bya kyonakanya, kyādi kibalonda, kisumininwe kwibakubija. a Ino, Mosesa wāzenza bantu ba Leza baleke kujimija lukulupilo. Wēbakulupija amba: “Yehova aye mwine ukemulwila.”—Divilu 14:14.

² Nansha nabya, bimweka bu Mosesa waābije Yehova Leza, nandi wāmulondolola amba: “Le kyoungabijijaabijija i kika? . . . tulula mukombo obe olole kuboko kobe pa dijiba widikalañanye.” (Divilu 14:15, 16) Fwatakanya’po mwāshilwidile binkumenkume. Ponka’po Yehova wāsoñanya mwikeulu, kadi dilenga dya dikumbi dyaenda ku mutamba wa Isalela, padi dyēadile bwa lubumbu ne kujika kibumbo kya bulwi kya bene Edipito. (Divilu 14:19, 20; Ñimbo ya Mitōto 105:39) Mosesa wāolola kuboko kwandi. Dijiba dyākalañanibwa na kivula kikatampe. Mema aikala na mekwata ne kwimana bwa lubumbu, pashala dishinda dibwanya kupita’po muzo onso mutuntulu!—Divilu 14:21; 15:8.

³ Felo pa kumona kino kilomboji kya bukomo, wādi ufwaninwe kusoñanya basola bandi bajoke. Inoko aye na mitatulo, webasoñanya bendelele. (Divilu 14:23) Bene Edipito nabo bātwela kebebalonda mu bukata mwa dijiba, ino makalo abo aoneka ne matonto mene keakonkoka’ko. Kupwa’tu kwa  bene Isalela kwabukila senene bukila bwa dijiba, Yehova wāsoñanya Mosesa amba: “Olola kuboko kobe pa dijiba amba mema ajokele pa bene Edipito, pa makalo abo a divita, ne pa basola babo ba pa tubalwe.” Mema adi bwa lubumbu abunduka, ne kulobeja Felo ne basola bandi!—Divilu 14:24-28; Ñimbo ya Mitōto 136:15.

4. (a) Le Yehova wēlombwele bu ani pa Dijiba Dityila? (b) Kutela Yehova bu “muntu wa bulwi” kukokeja kulengeja bamo balonge bika?

⁴ Kunyongololwa kwa muzo wa Isalela pa Dijiba Dityila i kinkumenkume kya nkuo mu mānga ya mwikadile Leza na bantu. Kwine’kwa, ko kwēlombwele Yehova bu “wa bulwi mukomokomo.” (Divilu 15:3) Le ubeimvwana namani patelwa Yehova uno muswelo? Kunena na bubine, divita diletelanga bantu bikoleja ne musala. Le kwingidija kwingidija Leza bukomo bwa konakanya kukulengejanga ukomenwe kumufwena?

5, 6. (a) Mwanda waka i kyendele’mo Leza etwe bu “Yehova wa bibumbo”? (b) Le divita dya Leza i dishile namani na dya bantu?

⁵ Leza i mutelwe misunsa 260 bu “Yehova wa bibumbo” mu Bisonekwa bya Kihebelu, ne misunsa ibidi mu Bisonekwa bya Kingidiki. (1 Samwele 1:11) Byadi Mfumu Mwinē Lupusa Lonso, Yehova wendejanga bibumbo bikatampe bya bamwikeulu. (Yoshua 5:13-15; 1 Balopwe 22:19) Bukomo bwa konakanya bwa kino kibumbo buleta moyo. (Isaya 37:36) Bukomo bwa konakanya bwa bantu bwikalanga bubi. Inoko, tufwaninwe kuvuluka amba mavita a Leza i meshile na a bantu. Basola ne bendeji ba kipolitike babwanya kunenena māya butambañani bwabo. Ino kadi mavita a bantu alwibwanga na lwiso ne na mutyima wa kwisakila.

⁶ Inoko, Yehova katononwangapo na kitumbuzaji kya bituputupu. Kupituluka mu Bijila 32:4 unena’mba: “Dibwe,  bilongwa byandi i bibwaninine, mwanda mashinda andi onso i moloke. Leza wa bubinebine wampikwa bukondame nansha patyetye; Aye i moloke kadi moloke swā.” Kinenwa kya Leza kitopekanga bulobo bubibubi, bukalabale ne butapani. (Ngalwilo 49:7; Ñimbo ya Mitōto 11:5) Nanshi Yehova kaloñangapo kintu pa kubulwa bubinga. Wingidijanga bukomo bwandi bwa konakanya enka shi wamone amba bibakoma mwa kulongela. Bidi enka mwēkinene mupolofeto Ezekyele amba: “Le ami nsangelanga lufu lwa mubi?’ i Mfumu Mwinē Lupusa Lonso Yehova unena. ‘Le nkisakangapo avundamine mashinda andi amba ashale mūmi?’”—Ezekyele 18:23.

7, 8. (a) Le Yoba wētupile na kunena bika pa masusu andi? (b) Edihu wālemunwine namani milangwe ya Yoba pa uno mwanda? (c) Lelo i ñeni’ka yotubwanya kuboila ku bintu byātene Yoba?

⁷ Penepa mwanda waka Yehova wingidijanga bukomo bwandi bwa konakanya? Kumeso kwa kulondolola twisambile bidi padi Yoba muntu moloke. Satana wātatene Yoba—ko kunena amba muntu yense—amba kabwanyapo kulama bululame bwandi mu matompo. Yehova wālondolwele kutatana kwa Satana na kumuleka atompe bululame bwa Yoba. Bipa byālupukile’ko, i Yoba kususuka na misongo, kujimija bupeta ne kufwilwa bana. (Yoba 1:1–2:8) Byākadipo uyukile kyaādi ususukila, Yoba wālonga kilubo na kunena amba masusu andi i mfuto ya kubulwa kwendela’mo itamba kudi Leza. Wāipangwile Leza kine kyaāmutūdile bu “kitōndo” ne “bu walwana.”—Yoba 7:20; 13:24.

⁸ Nsongwalume witwa bu Edihu wālombwele Yoba patōka amba wetupe mu binenwa, pa kunena’mba: “Le ukulupile amba abe udi na bubinga ponena’mba, ‘Amiwa ne moloke kutabuka Leza’?” (Yoba 35:2) Na bubine, kekyendele’mopo kulanga amba tuyukile bintu senene kupita Leza nansha amba Leza wetupe. Edihu wānene amba: “Kebibwanikapo Leza wa bine kulonga bintu na nshikani, nansha Mwinē Bukomo Bonso kulonga bibi.” Kupwa kadi wānene amba: “Ketubwanyapo kwivwanija Mwinē Bukomo Bonso; i mukatampe  mu bukomo, kadi kajilulangapo bululame bwandi ne boloke bwandi buvulevule.” (Yoba 34:10; 36:22, 23; 37:23) Twitabije amba shi Leza walu, nabya kudi bubinga buyampe bwalwila. Pa kino, tujingululei bubinga bumobumo bulengejanga kyaba kimo Leza wa ndoe elombole bu muntu wa bulwi.—1 Bene Kodinda 14:33.

9. Mwanda waka Leza ujila ulwanga mavita?

⁹ Mosesa pa kupwa kutendela Leza amba i “wa bulwi mukomokomo,” Wānene amba: “A Yehova, lelo i leza’ka udi pamo bwa abe? I ani udi bwa abe, wilombola bu mukomo mu buujila?” (Divilu 15:11) Mupolofeto Habakuka wānene bintu biifwane na bino amba: “Meso obe atōkanga bininge keafwaninwepo kumona kibi, kadi kubwanyapo kutala bubi bitupu.” (Habakuka 1:13) Kadi Yehova i Leza wa buswe, Leza ujila, moloke ne wa boloke. Kyaba kimo, ino ngikadilo i mutononanga engidije bukomo bwandi bwa konakanya. (Isaya 59:15-19; Luka 18:7) O mwanda, Leza kasebulangapo buujila bwandi shi bimulomba kulwa. Ino, ulwanga mwanda i ujila.—Divilu 39:30.

10. Le i muswelo’ka umo kete wādi wa kupwa lwana lutelelwe mu Ngalwilo 3:15, ne i bika bikamwena’mo boloke?

¹⁰ Tala bintu byālupukile pa kupwa kwa ba Adama ne Eva, ba mulume ne mukaji babajinji kutombokela Leza. (Ngalwilo 3:1-6) Le Yehova wālekele kubulwa koloka kwabo, kōne kyepelo kyandi kya bu Mubikadi Mwinē Bukomo Bonso. Byadi Leza moloke, wādi ufwaninwe kwibatyibila nsambu ya lufu. (Bene Loma 6:23) Leza wālaile mu bupolofeto bubajinji bwa mu Bible amba, pakekala nshikani pa bukata bwa bengidi bandi ne balondi ba “nyoka,” ke Satana kadi. (Kusokwelwa 12:9; Ngalwilo 3:15) Mfulo mfulō, luno lwana kelwādipo’nka lwa konakanya Satana kete. (Bene Loma 16:20) Ino, kino kilongwa kya butyibi kyādi kyakupa bantu boloke madyese mavule, kutalulwa kwa lupusa lwa ntanda ya Satana  kwine kukalengeja kwikale paladisa ntanda yonso. (Mateo 19:28) Boba badi ku mutamba wa Satana bakendelela kwikala bu kikoleja kya ku ngitu ne ku mushipiditu kya bantu ba Leza. Difuku dimo, Yehova ukebatalulanga’ko.

11. Mwanda waka Leza wādi ufwaninwe kuleta dilobe dya ntanda?

¹¹ Leza wālongele’po kintu na Dilobe dya mu mafuku a Noa. Ngalwilo 6:11, 12 unena amba: “Ntanda yādi ke myoneke ku meso a Leza wa bine, kadi ntanda yādi miyule lūma. Bine, Leza wātala pa ntanda, ino yō, yādi myoneke; ngitu yonso yāonene mashinda ayo pano pa ntanda.” Le Leza wādi wa kuleka banonga-bibi bonakanye ntanda na bilongwa bya disubi? Mhm. Yehova wādi ufwaninwe kuleta dilobe dya ntanda mwanda wa kutalula’ko boba bādi na bilongwa bya butapani ne bya busekese.

12. (a) Le Yehova wālaile bika pa “lutundu” lwa Abalahama? (b) Mwanda waka bene Amole bākubijibwe?

¹² Kadi Leza wālongele muswelo umo onka ne pa bene Kenani. Yehova wālombwele amba kudi Abalahama kukatamba lutundu, kupityila ku luno lutundu bisaka byonso bya pano pa ntanda bikeselwa. Kukwatañana na uno mulao, Leza wālaile amba lutundu lwa Abalahama lwādi lufwaninwe kupebwa ntanda ya Kenani, ntanda yādi ikelwe na bantu bādi betwa bu bene Amole. Le Leza wādi na bubinga bwa kufundula bano bantu mu ntanda yabo ku bukomo? Yehova wālaile amba kuno kufundulwa ku bukomo kekwādipo kwa kulongeka mu kintu kya myaka 400—kufika ne byāikele “kilubo kya bene Amole” “pa mfulo.” b (Ngalwilo 12:1-3; 13:14, 15; 15:13, 16; 22:18) Mumbula bwa kino kitatyi, bene Amole bēkujije mutwe bininge mu bilongwa bya munyanji. Kenani yāikele  ke ntanda ya butōtyi bwa bankishi, kumwanga mashi, ne bilongwa bya busekese bwenda muongo pa ntanda. (Divilu 23:24; 34:12, 13; Umbadilo 33:52) Bekadi ba ino ntanda bādi bela’nka ne kwela bana babo bu bitapwa mu mudilo. Le Leza wādi wa kuleka bantu bandi betūle mu kino kyaka kya bano bantu banonga-bibi? Nansha dimo! Wānene amba: “Ntanda i ya disubi, nkeipanga mfuto pa kilubo kyayo, kadi ntanda nayo ikalasanga bekadi bayo.” (Divilu 18:21-25) Inoko, Yehova kāipailepo bantu pa kubulwa kusansanya. Mwanda bene Kenani ba mityima myoloke kimfwa Lehaba ne bene Ngibeone bāpandile.—Yoshua 6:25; 9:3-27.

13, 14. (a) Mwanda waka Leza wādi ufwaninwe kupandula dijina dyandi? (b) Le Yehova wādi ufwaninwe kusubula dijina dyandi ku mutonko namani?

¹³ Yehova byadi ujila, dijina dyandi nadyo i dijila. (Bene Levi 22:32) Yesu wāfundije bana bandi ba bwanga kulombela amba: “Dijina dyobe dipandulwe.” (Mateo 6:9) Butomboki bwa mu Edena bwāfutulwije dijina dya Leza, ntumbo yandi ne muswelo wandi wa kuludika mwine. Yehova kādipo wa kuleka uno mbepai ne buno butomboki. Wādi ufwaninwe kusubula dijina dyandi ku uno mutonko.—Isaya 48:11.

¹⁴ Tulangulukilei monka padi bene Isalela. Po bādi bu bapika mu Edipito, Leza wālaile Abalahama amba kupityila ku lutundu lwandi bisaka byonso bya pano pa ntanda bikeselwa kupityila ku luno lutundu, bintu byādi bimweka bu kebibwanikapo. Yehova wāsubwile dijina dyandi ku mutonko na kunyongolola bantu bandi ne kwibekadija bu muzo. Mupolofeto Danyele wālombwele Leza mu milombelo amba: “A Yehova Leza wetu, Abe watambije bantu bobe mu ntanda ya Edipito na kuboko kwa bukomo, welongela dijina.”—Danyele 9:15.

15. Mwanda waka Yehova wānyongolwele Bayuda mu bupika mu Babiloni?

¹⁵ Kintu kisangaja i kino, Danyele wālombele uno muswelo kitatyi kyādi kisakilwa Bayuda bukwashi bwa Yehova pa  mwanda wa dijina Dyandi. Pano Bayuda bampikwa kikōkeji bādi bu misungi mu Babiloni. Yelusalema mwipata mwabo, wādi mu masala. Danyele wādi uyukile amba kujokeja Bayuda mu ntanda yabo kwādi kwa kutumbija dijina dya Yehova. O mwanda Danyele wālombele amba: “A Yehova, ivwana. A Yehova, lekela. A Yehova, tá mutyima ne kulonga’po kintu! Kokeja, pa mwanda wa abe mwine, a Leza wami, mwanda dijina dyobe dyaityīlwe pa kibundi kyobe ne pa bantu bobe.”—Danyele 9:18, 19.

16. Mwanda waka kusaka kusaka kubingija Yehova dijina dyandi kekushintululapo amba i wa kansontomokela ne wa kwisakila?

¹⁶ Nansha shi Yehova usakanga kubingija dijina dyandi, le kino kishintulula amba i wa kansontomokela ne wa kwisakila? Aa, mwanda buujila ne boloke bwandi bo bumutononanga akinge bantu bandi. Tala Ngalwilo shapita 14. Mu uno shapita tutanga’mo myanda ya balopwe baná bakwete Lota ne kisaka kyandi, ke Lota mwipwa wa Abalahama kadi. Kupityila ku bukwashi bwa Leza, Abalahama wānekenye bano balopwe bādi bakomo bininge! Ino nsekununi ya bushindañani imweka’tu bu i ngalwilo ya mānga ya “mukanda wa Mavita a Yehova,” mukanda udi ne myanda mikwabo ya malwi yampikwa kusonekwa mu Bible. (Umbadilo 21:14) Mashindañani makwabo mavule ādi akīya kumeso.

17. Le i bika bilombola amba Yehova wālwidile bene Isalela pa kupwa kutwela’bo mu ntanda ya Kenani? Leta bimfwa.

¹⁷ Kumeso’tu kwa bene Isalela kutwela mu Kenani, Mosesa wēbakulupije amba: “Yehova Leza wenu ukemutangidila kumeso kadi ukemulwila, monka mwaalongele mu Edipito mu meso enu.” (Kupituluka mu Bijila 1:30; 20:1) Kushilwila padi Yoshua, mpingakani wa Mosesa, kufika ne mu kitatyi kya batyibi ne mu kitatyi kya bubikadi bwa balopwe Bayuda ba kikōkeji, bine Yehova wādi ulwila bantu bandi ne kwibapa mashindañani mavule pa balwana nabo.—Yoshua 10:1-14; Batyibi 4:12-17; 2 Samwele 5:17-21.

18. (a) Yehova byakashintangapo, mwanda waka tufwaninwe kumufwija’ko? (b) Le i bika bisa kulongeka kitatyi kikanana lwana lutelelwe mu Ngalwilo 3:15?

 ¹⁸ Yehova kashintyilepo; ne kitungo kyandi kya kwalamuna ntanda ke paladisa ya nsangaji nakyo kekishintyilepo. (Ngalwilo 1:27, 28) Leza ukishikilwe bubi. Kadi usenswe bininge bantu bandi ne usa kulonga’po kintu pa mwanda wabo panopano ponka. (Ñimbo ya Mitōto 11:7) Na bubine, lwana lutelelwe mu Ngalwilo 3:15 lusa kufikidila panopano ponka mu muswelo mutyani. Pa kupandula dijina dyandi ne kukinga bantu bandi, Yehova usa kwikala monka “wa bulwi mukomokomo”!—Zekadia 14:3; Kusokwelwa 16:14, 16.

19. (a) Leta kimfwa kilombola mwanda waka bukomo bwa Leza bwa konakanya bwitufwenyanga kwadi. (b) Le mutyima wa Leza wa kwitulwila udi na lupusa’ka potudi?

¹⁹ Langulukila pa kino kimfwa: Fwatakanya’po bidi shi muntu wamone nyama wa budyani watambe kyandi kisaka, washilula kulwa nandi ne kwipaya nyema wa budyani’wa. Le ulanga amba mukaji wandi ne bandi bana basa kufītwa pa kilongwa kyandi? Inoko, ukasaka batengwe bininge pa buno buswe bwa kubulwa kwisakila bwaebasenswe. Mu muswelo umo onka, ketufwaninwepo kufītwa pa mwanda wa muswelo wingidija Leza bukomo bwandi bwa konakanya. Mutyima  wandi wa kusaka kulwa mwanda wa kwitukinga ufwaninwe kuvudija buswe bwetu kwadi. Bulēme bwetu pa bukomo bwandi bwa kulwa bukavula. Nanshi tubwanya kwingidila “Leza mingilo ikola yaitabija na kutyina Leza ne nzuba ponka.” —Bahebelu 12:28.

20. Shi ketwivwanijepo senene nsekununi ya mu Bible itala pa bulwi bwa Leza, le tufwaninwe kulonga’po namani, ne mwanda waka?

²⁰ Na bubine, Bible kanenepo kanda ne kanda katala pa butyibi bwa bulwi bwa Yehova Leza. Ino kyotufwaninwe kuyuka i kino: Yehova kengidijangapo bukomo bwandi bwa konakanya na bukondame, konakanya’tu mu kavutakanya, nansha mu muswelo mutyani. Divule kutala nsekununi isambile’po Bible, nansha myanda ya kala kubwanya kwitukwasha tujingulule bintu senene. (Nkindi 18:13) Nansha byoketujingulwilepo kanda ne kanda, ino kwifunda bivule padi Yehova ne kulangulukila pa ngikadila yandi miyampe kubwanya kwitukwasha tutalule kutatana kotubwanya kwikala nako. Shi tulonge namino, tukamona amba tudi na bubinga bwendele’mo bwa kukulupidila Yehova Leza wetu.—Yoba 34:12.

21. Nansha Yehova byaikalanga kyaba kimo bu “wa bulwi mukomokomo,” ino le i mwitobwe mavita?

²¹ Nansha Yehova byadi “wa bulwi mukomokomo” shi ngikadilo kampanda imulomba kulwa, ke kunenapo amba i muntu witobelwe kulwa. Mu kimonwa kya Ezekyele kya dikalo dya mūlu, Yehova utelelwe’mo bu mwiteakanye kala kulwa na balwana nandi. Inoko, Ezekyele wāmwene Leza mujokolokwe na nkongolo—kilomboji kilombola ndoe. (Ngalwilo 9:13; Ezekyele 1:28; Kusokwelwa 4:3) Na bubine, Yehova i muntu utalala kadi muntu wa ndoe. Mutumibwa Yoano wāsonekele amba “Leza i buswe.” (1 Yoano 4:8) Yehova wingidijanga ngikadila yandi yonso na bujalale. Bine, tudi na dyese’po kashā dya kufwena kudi uno Leza mukomo kadi wa buswe!