Rusi Watambe Ikrene Bulwi
Rusi washilwile kutamba Ikrene bulwi mu mafuku 24 Kweji 2, 2022, ku mansá a mu lubanga, wamutambile bulwi nansha bilonga bendeji ba ntanda yonso bukomo bwa kwepuka divita. Le luno lwana lubwanya namani kwikala na lupusa pa ntanda? Mukelenge António Guterres, mulembi wa Bumo bwa Mizo wanenene panopano amba: “Buno bulwi bubwanya kuvutakanya mutyima-ntenke mu Bulaya ne pa ntanda ponso, enka ne kuleta musala oketubwanyapo kufwatakanya.”
Le mungya Bible, ino myanda ilombola bika?
Yesu Kidishitu wālaile amba “muzo ukatamba muzo mukwabo ne bulopwe nabo bulopwe bukwabo.” (Mateo 24:7) Tanga kishinte kinena’mba, “Le Kiyukeno kya ‘Mafuku a Mfulo,’ Nansha ‘Kyaba kya ku Mfulo’ I Kiyukeno’ka?” umone mavita a dyalelo moafikidijija bupolofeto bwa Yesu.
Mukanda wa mu Bible wa Kusokwelwa udingakanyanga myanda ya mavita na muntu utentamine pa kabalwe “katyila pyā bwa mudilo” mwine utalula “ndoe pano pa ntanda.” (Kusokwelwa 6:4) Tanga kishinte kinena’mba, “Ba pa Tubalwe Baná—Le I Bāni?” umone buno bupolofeto mobufunkila pa mavita adi’ko dyalelo.
Mukanda wa Danyele wālaile lwana pa bukata bwa “mulopwe wa kungala” ne “mulopwe wa kunshi.” (Danyele 11:25-45) Tala video inena’mba, Bupolofeto Ke Bufikidile—Danyele Shapita 11 umone mwanda waka Rusi ne boba bamukwatakenye batelwanga bu mulopwe wa kungala. a
Kadi mukanda wa Kusokwelwa utela ne “divita dya difuku dikatampe dya Leza Mwinē Bukomo Bonso.” (Kusokwelwa 16:14, 16) Inoko dino adyo ke divitapo dya mizo īlwa na motwibimwena dyalelo’mu. Tanga kishinte kinena’mba, “Le Divita dya Amakedona I Bika?” mwanda wa uyuke myanda isa kulongeka kumeso’ku.
Mwanda waka ubwanya kutengela na nsangaji būmi bwa kumeso?
Bible unena’mba Leza usa kufudija “mavita konsokonso pano pa ntanda.” (Ñimbo ya Mitōto 46:9) Tanga kishinte kinena’mba, “Lukulupilo lwa Bine lwa Būmi Bulumbuluke bwa Kumeso” uyuke mwikadile būmi bwa kumeso bulaile Leza.
Yesu wāfundije balondi bandi kulombela’mba Bulopwe bwa Leza bwiye. (Mateo 6:9, 10) Buno Bulopwe i umbikalo wa mūlu ukafikidija kiswa-mutyima kya Leza pano pa ntanda, ne mu kino kiswa-mutyima kya Leza, mubadilwa kutūlwa kwa ndoe pano pa ntanda. Pa kuyuka muswelo obwanya kumwena mu buno Bulopwe, tala video inena’mba, Le Bulopwe bwa Leza I Bika?
Mu Ikrene mudi Batumoni ba Yehova 129 000 ne kupita. Nabo kebekujangapo mu bya ino ntanda kadi bapelanga kwiela mu divita monka mupelelanga ne Batumoni ba mu matanda makwabo. (Yoano 18:36) Batumoni ba Yehova bendelelanga na kusapula “myanda miyampe ya Bulopwe” pa ntanda ponso amba Bulopwe’bu bo bukapwija myanda ya bantu, kubadila’mo ne myanda ya mavita. (Mateo 24:14) Tukwita wisambe netu mwa kuyukila’ko bivule pa musapu wa mu Bible uleta lukulupilo.
a Pa kuyuka myanda yonso ya buno bupolofeto, tala kishinte kinena’mba, “‘Mulopwe wa Kungala’ mu Kitatyi kya ku Mfulo” ne kino kinena’mba, “Le ‘Mulopwe wa Kungala’ Dyalelo I Ani?”
Tala'po Bidi ne Bino:
KESHAI’NKA KUKESHA!
Balefije ba mu Ikrene—Binena’po Bible
Bible walombola nsulo mine ya uno mwanda ne moukapwila lonso.
BIPANGUJO BYA MU BIBLE BILONDOLWELWE
Le Bulopwe bwa Leza Bukalonga Bika?
Tala bintu byobwanya kutengela pakaludika Bulopwe bwa Leza ino ntanda.
ESSENTIAL BIBLE TEACHINGS
Le Bulopwe bwa Leza I Bika?
Yesu paādi usapula, wāfundije bininge myanda ya Bulopwe bwa Leza kupita’ko myanda mikwabo. Mu tutwa twa myaka, balondi bandi nabo bālombele buno Bulopwe bwiye.
BIPANGUJO BYA MU BIBLE BILONDOLWELWE
Le Kyamalwa Kikatampe I Bika?
Bobwa bwitwa bu ‘bupolofeto bwa mu bitatyi bya ku mfulo’ bufunkila pa kitatyi kilampe kya makambakano a muzo wa muntu. Le i bika byotubwanya kutengela bisa kulongeka?
