KESHAI’NKA KUKESHA!
Mulanga Mupitepite—Le Bible Unena’po Namani?
“Lapolo ya mu Shine ilombola’mba uno mwaka kyanga i kipite, kadi uno musunsa ke wa busatu okwaikala kyanga kikomo mu bushipo namino.”—The Guardian, 7 Kweji 9, 2022.
“Uno ke mwaka wa butano usa kufika mulanga mu kipindi kya kutunduka mu Afrika.”—UN News, 26 Kweji 8, 2022.
“Kipindi kikatampe kya Bulaya kisa kwikala mu mulanga mubi bininge kupita ulongekele mu myaka 500.”—BBC News, 23 Kweji 8, 2022.
Bashayuka ba myanda ya kushinta kwa bitatyi banena’mba milanga ya uno muswelo isa kwendelela na kubipila’ko bininge. Le tubwanya kukulupila’mba bino bintu bisa kulumbuluka kumeso’ku? Le Bible unena’po namani?
Milanga ne Bupolofeto bwa mu Bible
Bible wālaile pa mwanda utala ano etu mafuku amba:
“Kukekala . . . bimpengele bya nzala byadi koku kebidi koku.”—Luka 21:11.
Divule dine mulanga uletanga bipupo bya nzala. Bipupo bya nzala, masusu ne lufu bine bilupukanga ku milanga bifikidijanga bupolofeto bwa mu Bible.—Kusokwelwa 6:6, 8.
Kine kilengejanga Milanga Mibimibi Ikale’ko
Bible uleta bubinga bwa kyalwilo bwine bulengejanga milanga mibimibi ikale’ko. Unena’mba:
“Muntu wenda kadipo na lupusa lwa kōlola ditabula dyandi.”—Yelemia 10:23.
Ko kunena’mba bantu kebadipo na lupusa lwa kōlola matabula abo, nansha’mba kebabwanyapo kwiludika abo bene. Butyibi bobakwata mu miswelo yobaludika, bo bulengejanga kwikale milanga ne mema ōme.
Befundi bavule ba sianse i betabije’mba mingilo ya bantu yo mine ilengejanga kwikale kyanga ntanda yonso, kine kilengeja kwikale milanga.
Bantu ba lwiso ne bantu ba politike bene kebatēlepo mutyima ku būmi bwetu bwa kumeso batetanga mityi mu matō, bōna luvula ne bupangi, bine bilengejanga bōne masulo a mema.
Ino nansha nankyo Bible witupanga lukulupilo.
Le kudi lukulupilo’ka kumeso’ku?
Bible imulaye amba Leza ukavuya makambakano a kubulwa mema. Muswelo’ka?
1. Leza usa “konakanya boba bonakanya ntanda.” (Kusokwelwa 11:18.) Usa kutalula’ko bene balengeja mema ōme, ko kunena’mba, bantu babi, ba lwiso bene bonakanya bifuko kitujokolokele.—2 Temote 3:1, 2.
2. “Nshi myūmu tē ikekala ke kijiba kya mabungu.” (Isaya 35:1, 6, 7) Leza usa kulongolola bintu byonenwe na milanga ne kwalamuna ino ntanda ikale paladisa misangilwe mema senene shē.
3. “Utalanga ntanda, wiilengeja ipe bipa bingi ne kwiipeteja bininge” (Ñimbo ya Mitōto 65:9) Leza pasa kwesela bantu bonso, ntanda isa kuyula byakudya biyampe ne mema atōka tō.
Tala'po Bidi ne Bino:
KESHAI’NKA KUKESHA!
Kwikala’ko kwa Kyanga Kikomo Ntanda Yonso—Le Bible Unena’po Namani?
Le bikakoma kushikata pa ino ntanda?
BIPANGUJO BYA MU BIBLE BILONDOLWELWE
Lelo Ntanda Ikonakanibwa?
Byobya binena Bible bibwanya kukutulumuja.
ESSENTIAL BIBLE TEACHINGS
Mwanda waka Leza wāpangile ntanda?
Ntanda yetu i miyule’mo bintu bilumbuluke. I mitūlwe pa kifuko kifwaninwe na ku dyuba, ijinanga na kulonda ndudi, ne kujokoloka na lubilo lufwaninwe. Mwanda waka Leza wālongele bukomo pa kupanga ntanda?
BIPANGUJO BYA MU BIBLE BILONDOLWELWE
Le Kiyukeno kya “Mafuku a Mfulo,” Nansha “Kyaba kya ku Mfulo” I Kiyukeno’ka?
Bible utela ngikadilo nansha bintu byadi bya kulongeka kumeso kwa “mfulo ya ntanda.”
KESHAI’KA KUKESHA!
Bantu Bonanga Ntanda—Le I Bika Binena’po Bible?
Vese umo wa mu Bible ulombola bintu bisatu bitala kīkalo kwetu kya ntanda.
MYANDA ITUTALA
Lomba Kwifunda Bible
Mwisambilei pa bipangujo bya mu Bible, yukila’ko bivule pa Batumoni ba Yehova.
