Minjiki i kyabuntu kiyampe kitambile kudi Yehova. Idi na lupusa pa milangwe yetu, pa motwikadile, kadi ibwanya kwitulengeja tulonge bintu. Ye mwikadile ne ñimbo yetu ya ntentekelo. Na bubine, ino ñimbo ibwanya kulonga bivule: Ibwanya kwitufwenya kudi Yehova.

 Tamba mu 2014, twi balupule ñimbo ya ntentekelo 70 ne kupita, ne kadi dyalelo, kintu kya lwimbo lumo mu ino ñimbo ludi mu ndimi 500 ne kupita! Ino padi ubeipangula’mba, ‘le i bāni baloñanga ino ñimbo, ne ilupulwanga namani?’

 Ñimbo ya ntentekelo ilupulwanga na kisumpi kya minjiki, kingila ku Mwingilo wa Kukwata Mawi ne Mavideo, mwingilo utalwa na Komite wa Bufundiji wa Kitango Kyendeji. Kisumpi kya minjiki kidi na batutu ne bakaka 13 bakwasha ku kubunda ñimbo, kulumbulula mawi, kutandika mpangiko, ne ku kulupulwa kwa ñimbo. Kadi Komite wa Bufundiji i mwitabije banabetu ba kwilanga ba ntanda yonso bengidila kwabo, bakweshe ku mingilo pamo bwa, kubunda ñimbo, komba byombanwa, ne kwimba. Bano batutu ne bakaka bengidijanga na kwityepeja bwino bwabo pampikwa kukimba kwitumbika.

 Le lwimbo lwa ntentekelo lulupulwanga namani? Dibajinji, Komite wa Bufundiji utoñanga bisonekwa pakemanina lwimbo ne mwa kwiivwanina bantu shi abelwivwana. Kupwa kisumpi kya minjiki kyatonga muntu wa kubunda lwimbo ne wa kulemba binenwa bya lwimbo. Kadi bateakanya mwa kwimbila. Ebiya Komite wa Bufundiji wateja byobateakenye ne kulombola bintu bikwabo bya kulonga’mo. Kupwa kisumpi kya minjiki kyalemununa lwimbo ne kukwata bya mfulo. Ino ñimbo ikwatyilwanga mu bifuko bishileshile, kimfwa mu mobo a Betele ne ku batutu ne bakaka badi na bya kukwatyila’mo.

 Pa kubunda ñimbo ne kwiikwata, kutentekela pa bintu bikwabo, banabetu bengidijanga bifuko mukwatyilwanga, mpangiko ya ntanda ya minjiki, ne bibīko bya bintu bikwatwe ku mawi. Kadi uno mwingilo ulomba kwingidija bingidilwa pamo bwa byombanwa bya minjiki, bya kusobakanya nabyo mawi, bya kubaija mawi, maekutere, ne mamikolo. Mikolo imo ibwanya kulomba kushilwila ku madolala 100 kutūla ku madolala 1 000 ne kupita. Mu 2020, twalupwile madolala 116 000 mwanda wa kupota bya kukwata nabyo minjiki.

 Le tuloñanga bukomo’ka mwanda wa kulea lupeto? Pa kyaba kya kwikala na kisumpi kikatampe kya minjiki ku Betele, twingidijanga banabetu bavule ba kwilanga bengidila kwabo. Kadi, pa kyaba kya kukongakanya bantu bavule ne kwibakwata, divule dine banabetu balupulanga minjiki na kwingidija mpangiko ya mu olodinatele, bavumija’mo byombanwa bivule.

 Batutu ne bakaka basenswe kwivwana ñimbo ya ntentekelo. Tara ushikatanga mu Beletanye, unena’mba: “Ñimbo intūjanga kitatyi kyomzumbija mutyima. Kitatyi kyoneivwana mu lwetu ludimi, monanga’nka bwa Yehova umpambile bīpa.” Tutu umo wa mu Kazakstan witwa bu Dmitry unena’mba: “Nsenswe kwivwana ñimbo yonkibwanyapo kwiipangula shi ikwatañene na misoñanya ya mu Bible. Ne kadi, ñimbo inkwashanga nte nyeke mutyima ku kipwano kyami na Yehova.”

 Delia wa mu Afrika wa Kunshi, ulombola mwamwena ñimbo ya ntentekelo amba: “Ikomejanga lwitabijo lwami. Kitatyi kyontyumukilwe mutyima ne kyondi mu makambakano, kudi nyeke lwimbo lukwatañene bininge na ngikadilo yondi’mo. Divule dine, enka ne mwimbilo wa lwimbo ushintanga muswelo oneivwana!”

 Bantu bavule badi na ñimbo imo ya ntentekelo yobasenswe bininge. Lerato, nandi wa mu Afrika wa Kunshi, unena’mba: “Lwimbo lunena’mba ‘Pabwipi Ponka’ ne lunena’mba ‘Ntanda Mipya Īya’ko,’ inkwashanga mone mu ñeni kitatyi kyonkalubula mama onsenswe ukasanguka. Kitatyi kyonso kyongivwana ino ñimbo, mumonanga mu ñeni wiya kondi lubilo makasa mabāle.”

 Lwimbo lumo lwa ntentekelo lwakweshe bininge nkasampe umo mwana-mukaji wa mu Sri Lanka. Unena’mba: “Polofesele wetu wamfutulwile ku meso a kalasa konso mwanda’po’tu ne Kamoni wa Yehova. Naivwene moyo, kadi nakomenwa ne kya kunena. Ami pa kujokela ku njibo, mama wankankamika ngivwane lwimbo lunena’mba ‘Étudier rend fort.’ Luno lwimbo lwankweshe ndyuke amba nsakilwa kulonga bukimbi ne kuteakanya bya kulondolola. Difuku dilonda’po, nakesamba na polofesele. Wangivwana ne kunena’mba waivwanija biyampe nkulupilo ya Batumoni ba Yehova. Mfwijanga’ko bulongolodi bwa Yehova pa kwitupa ino ñimbo ikankamika.”

 Le lupeto lotusakilwa pa kulupula ñimbo lutambanga kwepi? I ku byabuntu bya ntanda yonso, bivule bine bitulwanga mu miswelo ilombwelwe mu donate.jw.org. Mwafwai’ko ne byabuntu byenu bya na mutyima tō.