Papwile Divita II dya Ntanda mu 1945, Alemanye wadi mu masala. Bibundi byaonakanibwe, mu masomo mutupu kintu, mampitalo kutupu kwingila, mabombe alelakene konsokonso ampikwa kuladika. Ne kadi bya kudya byasakana, bei nayo yakandila’ka. Kimfwa, badi bapoteja mu bufyafya mangalame 500 a buleba ku lupeto lwadi lufutwa muntu wingila mayenga asamba!

Mu bantu batenwe na uno mwanda mwadi Batumoni ba Yehova bapityije myaka mivule mu bifungo ne mu makomponi a masusu pa mwanda wa lwitabijo lwabo. Mu 1945, bebakutulwile’nka na bisandi bya buloko byobadi bavwele. Batumoni bakwabo nabo bajimije bintu byabo byonso. Bamo badi bafwa nzala bininge, bapona’nka ne ku kupwila kwa bwine Kidishitu.

Batumoni ba Yehova ba mu matanda makwabo bakweshe’ko bukidibukidi na bya kudya ne bisandi. Banabetu ba ku kité kya ntanda yonso mu États-Unis banenene musambo wa Suise, mu Berne, ukwashe banabetu ba mu Alemanye. Nathan Knorr, mukendi wa ku kité, waiya mu Bulaya mwanda wa kukwatakanya ne kwendeja lubilo mwingilo wa bukwashi.

Batumoni ba mu Suise baleta pampikwa nsengwa bya kudya, bisandi ne lupeto. Bino bintu byatumwa mu Berne, mobebityakwile ne kwibikuta, kupwa bebituma mu Alemanye. Batumoni ba mu Suede, ba mu Kanada, ba mu États-Unis, ne mu matanda makwabo nabo baleta bya bukwashi, bine byakweshe bantu ba Yehova ba mu Alemanye ne ba mu matanda makwabo a Bulaya ne a Azia mwadi mavita.

Mu myeji’tu mityetye, musambo wa Suise watuma kafé, mabele, sukadi, mebele a buluba, bipa byumu, bya mani, ne bikopo bya mwita wa ntanda ne wa lui. Batuma ne lupeto.

Kadi, Batumoni ba mu Suise batumine mantoni atano a bisandi, kimfwa, bivwalwa bya pangala, bisandi bya bana-bakaji, ne makotyi a bana-balume. Kiteba kya Mulami kya mafuku 15 Kweji 1, 1946 kyanenene amba: “Batutu ne bakaka kebaletelepo bisandi bikulu, baletele bilumbuluke byobadi nabyo. Bepēne bya binebine mwanda wa kukwasha banababo ba mu Alemanye.”

Batumoni ba mu Suise baletele ne mikulu 1 000 ya bilato, bine byobabandawile shi bidi biyampe kumeso kwa kwibituma. Batutu ne bakaka ba mu Wiesbaden, mu Alemanye, batulumukile pa buya bwa bintu bishileshile byobatambwile. Kamoni umo walembele amba: “Nkulupile amba i kutupu mangajini nansha amo a bisandi muno mu Alemanye, mobapoteja bisandi ne bilato biyampe bya uno muswelo.”

Baendelele kutuma bukwashi kufika ne mu Kweji 8, 1948. Pa byonso, Batumoni ba mu Suise batumīne banababo ba mu Alemanye makese 444 a bintu, ko kunena’mba mantoni 25. Monka motwanenena, ke enkapo Batumoni ba mu Suise baletele bukwashi. Ino abo badi’tu kisumpi kya bantu batyetye, mwanda mu kine kitatyi’kya mu Suise mwadi’tu Batumoni 1 600 kete!

Yesu Kidishitu wānenene amba: “Pa kino bonso bakayuka’mba mwi bami bana ba bwanga—shi mudi na buswe umbukata mwenu.” (Yoano 13:34, 35) Buswe bulengejanga bantu ba Yehova bapāne bilumbuluke byobadi nabyo, ke bintupo byokebakidipo nabyo buya. (2 Bene Kodinda 8:1-4) Tutanga mu mukanda watambile ku Zurich amba, “batutu ne bakaka bavule badi basaka kukwasha’ko, baletele tulata twabo twa kutambwila’ko bya kudya ne lupeto.”

Bantu ba Yehova ba mu Alemanye nansha byobadi bapangwapangwa kadi mu musala, kebaijijepo baikala’tu biyampe. Kintu kimo kyebakweshe i bukwashi buteakanibwe senene kadi bwampikwa sengwa bwebapele banababo mu lwitabijo balombwele buswe bwa binebine bwa kwipāna.