Nehemia 13:1-31
13 Mu dine difuku’dya kwatangilwe mukanda wa Mosesa mu matwi a bantu,+ kadi mwatenwe mulembwe amba mwine Amone nansha mwine Moabu+ kafwaninwepo kutwela mu kipwilo kya Leza wa bine,+
2 mwanda kebakasambakenepo bene Isalela na mikate ne na mema, ino bebalobela Balame amba ebafinge mafingo.+ Inoko Leza wetu waalamuna mafingo ke dyese.+
3 Abo’tu pa kwivwana Bijila, baanza kusonsolola bana bonso ba beni* mu Isalela.+
4 Kadi kumeso kwa kino’ki, kitobo mwine wadi utala byumba bya bibīko* bya njibo* ya Leza wetu+ i Ediashibi,+ mubutule wa Tobia.+
5 Wamupēle kyumba kikatampe kya kibīko,* kyobadi batūla’mo dibajinji kyamulambu kya miseke, ensense itōka, ne bipungwa ne kipindi kimo kya pa bipindi dikumi* bya miseke, bya vinyu mipya, ne bya māni,+ kyadi kifwaninwe kupebwa bene Levi,+ batuimba, ne batulama ba ku kibelo, pamo ne kyabuntu kya babitobo.+
6 Mu kino kitatyi kyonso nkyadipo mu Yelusalema, mwanda naendele kwa mulopwe mu mwaka wa 32+ wa Alatazelekishishi+ mulopwe wa Babiloni; kadi kitatyi pa kupita’po nalomba mulopwe ñende.
7 Penepo naiya ku Yelusalema, namona bintu bibi byalongele Ediashibi+ pa mwanda wa Tobia,+ pa kumupa kyumba kya kibīko mu kipango kya njibo ya Leza wa bine.
8 Kino kyaumfītyije mutyima bininge, ebiya naela panja pa kyumba kya kibīko* bintu bya ba mu njibo ya Tobia.
9 Kupwa nasoñanya, nabo basubula byumba bya bibīko;* ebiya najokejeja’mo bipungwa bya njibo ya Leza wa bine,+ na kyamulambu kya miseke ne ensense itōka.+
10 Kadi namwene amba bipindi bya bene Levi+ kebyadipo bibapebwa,+ penepo bene Levi ne batuimba badi bengila mwingilo baenda, muntu ne muntu ku budimi bwandi.+
11 Penepo natopeka baledi bampingakani+ amba: “Mwanda waka njibo ya Leza wa bine ibasūlwa?”+ Ebiya nebakongakanya pamo, nebajokejeja ku mingilo yabo.
12 Yuda ense waleta kipindi kimo kya pa bipindi dikumi+ bya miseke, bya vinyu mipya, ne bya māni ku byumba bya bibīko.+
13 Penepo napa Shelemia kitobo, ne Zadoki mutentudi,* ne Pedaya wa ku bene Levi, lupusa lwa kutala byumba bya bibīko, kadi Hanana mwanā Zakula mwanā Matania wadi wibakwasha’ko, mwanda bano bana-balume badi bamonwa bu bantu bakulupilwa. Badi na kiselwa kya kwabila banababo bipindi byabo.
14 A Leza wami, mvuluke+ pa uno mwanda, kadi kokajimankanya bilongwa byami bya buswe bwa ndamatyidile byonalongela njibo ya Leza wami ne mingilo* yayo.+
15 Mu mene mafuku’a namona bantu mu Yuda baponda byengelo bya vinyu mu dya Sabato,+ basela milwi ya miseke batwika’yo bampunda, kadi batwela na vinyu, na mañanza, na bikuyu, ne na biselwa bya miswelo yonso mu Yelusalema mu difuku dya Sabato.+ Penepo nebadyumuna baleke kupoteja byakudya mu dine difuku’dya.*
16 Kadi bene Tyila badi bashikata mu kibundi badi batwela na mwita wa lui ne bya busunga bya miswelo yonso, bapoteja’byo bantu ba Yuda ne mu Yelusalema mu dya Sabato.+
17 Ebiya natopeka bantu ba bulēme ba Yuda, nebanena’mba: “Le kyomulongela kino kintu kibi nenki i kika, mubajilula ne kujilula difuku dya Sabato?
18 Mwene kino kyo kyalongele bakulutuba benu, penepo Leza wetu wetuletela bino byamalwa byonso ne pa kino kibundi? Pano mubabweja bulobo budyendyemuka pa Isalela pa kujilula Sabato.”+
19 Ebiya pa bibelo bya Yelusalema pashilula’tu kufīta kumeso kwa Sabato, nasoñanya bashite milango. Kadi nanena’mba kebafwaninwepo kwiishitula enka ne bipwa Sabato, naimika ne bengidi bami bamo pa bibelo kutyina’mba bakatweja biselwa mu difuku dya Sabato.
20 Penepo bansunga ne boba badi bapoteja bya busunga bya miswelo yonso balāla panja pa Yelusalema musunsa umo nansha misunsa ibidi.
21 Ebiya nebadyumuna kenebanena’mba: “Mwanda waka mulāla ku meso a lubumbu? Shi mulāle’ko monka, nsa kwimutalula’ko ku bukomo.” Tamba penepa kebailepo monka mu dya Sabato.
22 Kadi nasapwila bene Levi amba bafwaninwe kwisubula kyaba ne kyaba ne kwiya kulama ku bibelo mwanda wa difuku dya Sabato dikale dijila.+ A Leza wami, pa kino napo mvuluke, kadi mfwile’ko lusa mungya bungibungi bwa buswe bobe bwa ndamatyidile.+
23 Mu mene mafuku’a, namwene ne Bayuda basongele* bana-bakaji+ bene Ashedoda,+ bene Amone, ne bene Moabu.+
24 Babo bana bamo badi besamba kine Ashedoda, bakwabo nabo ludimi lwa bantu beshileshile, ino i kutupu nansha umo wadi uyukile kwisamba ludimi lwa Bayuda.
25 Penepo nebatopeka, nebafinga, nakupila ne bana-balume bamo,+ nebatukuna nywene ne kwibatyipija padi Leza amba: “Kemufwaninwepo kusongeja benu bana bana-bakaji kudi babo bana, kadi kemufwaninwepo kwitabija nansha dimo benu bana bana-balume nansha banwe bene kusonga babo bana bana-bakaji.+
26 Mwene Solomone mulopwe wa Isalela walongele bubi pa mwanda wa bano’ba? Mu mizo mingi kemwadipo mulopwe pamo bwa aye,+ kadi Leza wandi wadi umusenswe,+ ebiya Leza wamubikika pa Isalela ense. Ino bana-bakaji beni bamulongeje ne aye mwine bubi.+
27 Mwene kino i kikomo kwivwana banwe kulonga buno bubi bukatampe pa kuleka kukōkela Leza wetu kemusonge bana-bakaji beni?”+
28 Mwana umo wa Yoiada+ mwanā Ediashibi+ kitobo mukatampe waikele ke muko wa Sanabalata+ mwine Holone. Penepa namupangila kulampe nami.
29 A Leza wami, wibavuluke, mwanda abasubija butobo ne kipwano kya butobo+ ne bene Levi.+
30 Kadi nebasubula ku disubi dyonso dya beni, napa babitobo ne bene Levi mingilo, muntu ne muntu mwingilo wandi,+
31 nateakanya ne mwa kuletela nkuni+ pa kitatyi kitungwe ne bipa bibajinji byele.
A Leza wami, mvuluke biyampe.*+
Kunshi kwa Dyani
^ Nansha’mba “bana basobakane.”
^ Nansha’mba “byumba bya kudīla’mo.”
^ Nansha’mba “tempelo.”
^ Nansha’mba “kya kujikija dikumi.”
^ Nansha’mba “kyumba kya kudīla’mo.”
^ Nansha’mba “kyumba kya kudīla’mo.”
^ Nansha’mba “byumba bya kudīla’mo.”
^ Nansha’mba “musonekeji.”
^ Nansha’mba “bulami.”
^ Bibwanika padi i, “nebadyumuna mu dine difuku’dya baleke kupoteja byakudya.”
^ Nansha’mba “baselēle mu mobo abo.”
^ Nansha’mba “mwanda wa biyampe.”
