Musapudi 12:1-14
12 Nanshi, vuluka Umpangi obe Mukatakata mu mafuku a busongwalume bobe,+ kumeso kwa mafuku a tusua* kwiya+ ne kepafikile myaka yokanena’mba: “Nkiisangedilepo nansha dimo”;
2 kumeso kwa dyuba ne kitōkeji ne kweji ne ñenyenye kufīta fututu,+ ne makumbi kujoka pa kupwa kwa* kinya kya mvula;
3 mu difuku dizakala balami* ba njibo, ne bana-balume bakomokomo betonta, ne bana-bakaji baleka’byo kupela bukula mwanda abatyepa, ne balolo batadila pa madidisha bamona’mba kufīta;+
4 peshita bibelo byenda ku dishinda, patyepa lunwa lwa mpelo ipela, pabūka muntu pa kudila kwa koni, kadi bana bana-bakaji bonso ba lwimbo bapungila bininge.+
5 Ne kadi, muntu katyina peulu, kadi mu kipito mudi luzakalo. Mutyi wa alemonde utōya maluba,+ ne tēte wikoka, ne tubipa tuleta nzala ketukilongapo kintu, mwanda muntu wendanga ku njibo yandi ya myaka na myaka+ kadi bantu badila madilo bendakana mu dishinda;+
6 kumeso kwa monji wa ndalama kutalulwa, ne lweso lwa olo kuvingakana, ne mulondo wa ku nsulo ya mema kuladika, ne ditonto dya kyumbu kuvingakana.
7 Penepo luvumbi lwajokela ku nshi,+ monka molwadi lwikadile, mushipiditu* nao wajokela kudi Leza wa bine wapēne’o.+
8 Nkonga-bantu+ unena’mba: “Kya bitupu kikatampe kutabuka! Kintu kyonso i kya bitupu.”+
9 Nkonga-bantu kadipo’tu’nka na tunangu kete ino wafundije bantu nyeke byaadi uyukile,+ kadi walangulukile bininge ne kukimba bya binebine mwanda wa kukongakanya* nkindi mivule.+
10 Nkonga-bantu wakimbile kutana binenwa bisangaja+ ne kulemba binenwa byoloke bya bubine.
11 Binenwa bya ba tunangu bidi pamo bwa tumisungu twa bakumbi,+ kadi binenwa byabo bikongakanye pamo bidi pamo bwa misumadi mipōpwe mbū; byaletelwe na mukumbi umo.
12 A wami mwana, kutentekela pa bino bintu byonso’bi dyumuka kino’ki: Kulemba mabuku mavule kekudipo na mfulo, kadi kwipāna’mo bininge kupungijanga ngitu.+
13 Bintu byonso byobyaivwanwa, mfulo ya mwanda i ino: Tyina Leza wa bine+ kadi lama mbila yandi,+ mwanda kino kyo kine kifwaninwe kulonga muntu.+
14 Mwanda Leza wa bine ukatyibila kilongwa kyonso mambo, ne kyokya kifyeme kine, mwanda wa kuyuka shi i kiyampe nansha shi i kibi.+
Kunshi kwa Dyani
^ Nansha’mba “mafuku a byamalwa.”
^ Bibwanika padi i, “na.”
^ Nansha’mba “batulama.”
^ Nansha’mba “bukomo bwa būmi.”
^ Nansha’mba “kupanga senene.”
