Kupituluka mu Bijila 4:1-49
4 “Shi ke pano, abe Isalela, teja misoñanya ne mutyibilo wa mambo onkufundija kulama, amba wikale mūmi,+ utwele ne kuyata ntanda ikupa Yehova Leza wa bakulutuba bobe.
2 Kemufwaninwepo kubweja ku kinenwa kyonemusoñanya, nansha kupatula’ko,+ amba mulame mbila ya Yehova Leza wenu yonemusoñanya.
3 “Meso enu emwenine byalongele Yehova mu mwanda wa Bāla wa Peole; Yehova Leza wenu watukije fututu mu bukata mwenu bantu bonso balondele Bāla wa Peole.+
4 Ino banwe balamete Yehova Leza wenu, banwe bonso mwi bōmi dyalelo dino’di.
5 Talai, nemufundije misoñanya ne mutyibilo wa mambo,+ monka mwaunsoñaninye Yehova Leza wami, amba mwiilame mu ntanda yomukayata ke yenu.
6 Mufwaninwe kwiilonda senene,+ mwanda yo ayo ikalombola tunangu+ ne ñeni+ komudi ku meso a bantu bakevwana ino misoñanya yonso, kadi bakanena’mba, ‘Bine, uno muzo mukatampe i bantu ba tunangu ne ba ñeni.’+
7 Mwanda le i muzo’ka mukatampe udi na baleza badi nao pabwipi na mwikadile netu Yehova Leza wetu ponso potumwita?+
8 Ne kadi le i muzo’ka mukatampe udi na misoñanya ne mutyibilo wa mambo moloke pamo bwa bino Bijila byonso byontūla ku meso enu dyalelo?+
9 “Abe tá mutyima ne kutadija senene,* kutyina’mba wakelwa bintu byemwenine meso obe kadi byakakutaluka ku mutyima mafuku onso a būmi bobe. Ufwaninwe ne kwibiyukanya ku bobe bana ne ku bobe bankana.+
10 Difuku dyowaimene ku meso a Yehova Leza obe mu Holeba, Yehova waunenene amba, ‘Kongakanya bantu pamo kondi, nebevwanije binenwa byami,+ mwanda wa bafunde kuntyina+ mafuku onso obakekala bōmi pa ntanda kadi amba bafundije babo bana.’+
11 “Penepa nenu mwafwena kemwimene munshi mwa lūlu, kadi lūlu lwadi lutēma mudilo kufika ne mūlu mwine;* kwadi fukutu, dikumbi, ne mfindi bwī.+
12 Penepo Yehova waanza kwisamba nenu mu mudilo.+ Mwaivwene diwi dinena, ino kemwamumwenepo mwaikadile+—dyadi diwi dyonka.+
13 Wemusapwila kipwano kyandi,+ kyawemusoñenye kulama—Mbila Dikumi.*+ Kupwa, walemba’yo pa bipāpo bibidi bya mabwe.+
14 Mu kine kitatyi’kya Yehova waunsoñenye nemufundije misoñanya ne mutyibilo wa mambo, byomufwaninwe kulama mu ntanda yomukatwela ne kuyata’yo ke yenu.
15 “O mwanda, tadijai senene*—byokemwamwenepo kintu nansha kimo difuku dyesambile nenu Yehova mu Holeba mu bukata bwa mudilo—
16 kutyina’mba mwakalonga bya kiboja na kwipungila nkishi musōnge welekeja kintu kyo-kyonso, shi kyelekejo kya mwana-mulume shi kya mwana-mukaji,+
17 shi kyelekejo kya nyema’ka udi pano pa ntanda shi kyelekejo kya kyoni’ka kitumbuka mūlu,+
18 shi kyelekejo kya kintu’ka kilandala pa nshi nansha kyelekejo kya mwita’ka udi mu mema munshi mwa ntanda.+
19 Kitatyi kyokatulula meso obe mūlu ne kumona dyuba ne kweji ne ñenyenye—bibumbo byonso bya mūlu—kokyongolwa kadi kokevukwila kobidi ne kwibingidila.+ Yehova Leza obe i mupāne’byo ku bantu bonso badi munshi mwa madiulu.
20 Ino banwe bo bantu bobayete kudi Yehova ne kopolwa mu nkelwa isungulula byuma, mu Edipito, amba mwikale bantu bandi-bandī,*+ na momwikadile dyalelo.
21 “Yehova waundobēle pa mwanda wenu,+ watyipa ne kutyipa’mba nkikabukapo Yodano nansha kutwela mu ntanda miyampe imupa Yehova Leza wenu bu bupyani.+
22 Mwanda amiwa nsa kufwila mu ino ntanda; nkisapo kwabuka Yodano,+ ino banwe musa kwabuka ne kuyata ino ntanda miyampe.
23 Tai mutyima kutyina’mba mwakelwa kipwano kya Yehova Leza wenu kyaasambile nenu,+ kadi kemwakīpungilai nkishi musōnge, kyelekejo kya kintu kyo-kyonso kimujidikile Yehova Leza wenu.+
24 Mwanda Yehova Leza wenu i mudilo uloteja,+ Leza usakanga kulamatwa bunka.+
25 “Shi ubabutula bana ne bankana kadi mubashikata kitatyi kilampe mu ntanda, kemulonga bya buñonaona ne kulonga nkishi musōnge+ shi wa muswelo’ka, kadi mubalonga bibi ku meso a Yehova Leza obe ne kumusanshija,+
26 nayata diulu ne ntanda bu batumoni pomudi dyalelo dino’di amba, bine mukakuba bukidibukidi mu ntanda yomwabukila Yodano kukeiyata ke yenu. Kemukashikata’mopo kyaba kilampe, ino mukatukila fututu.+
27 Yehova ukemupalakanya mu bukata mwa bantu,+ kadi i batyetye’tu bakapanda+ mu bukata mwa mizo yobakemupangila’mo kudi Yehova.
28 Kwine’kwa mukengidila’ko baleza ba mityi ne ba mabwe balongelwe na makasa a bantu,+ baleza kebabwanyapo kumona nansha kwivwana nansha kudya nansha kwivwana luvumba.
29 “Shi mukimbe Yehova Leza wenu kwine’kwa, bine mukamusokola,+ shi mumukimbidile na mutyima wenu onso ne muya* wenu onso.+
30 Pomukekala mu makambakano makomo ne kufikilwa na bino bintu byonso mu mafuku a kumeso, nabya mukajokela kudi Yehova Leza wenu ne kwivwana diwi dyandi.+
31 Mwanda Yehova Leza wenu i Leza wa lusa.+ Kakemusalapo nansha kwimutūta nansha kwilwa kipwano kyaatyipīle bakulutuba benu.+
32 “Shi ke pano, ipangula myanda ya mafuku a pa kala, tamba difuku dyāpangile Leza muntu pano pa ntanda; kimba tamba ku mfulo imo ya diulu kutūla ne ku mfulo mikwabo ya diulu. Le ke kulongeke kintu kikatampe bwa kino nansha kwivwanika kintu pamo bwa kino?+
33 Le bantu bakwabo ke bevwane diwi dya Leza dīsamba mu mudilo na mowaivwanine’dyo ne kushala bashala bōmi?+
34 Nansha le Leza ke mutompe kwitambijija muzo mu bukata mwa muzo mukwabo na butyibi,* na biyukeno, na bingelengele,+ na divita,+ na kuboko kwa bukomo,+ na kuboko kōlole, ne na bilongwa bilenga luzakalo,+ na mwemulongēle Yehova Leza wenu mu Edipito ku meso enu?
35 Bakulombwele bino bintu, mwanda wa uyuke amba Yehova i Leza wa bine;+ kekudipo mukwabo poso’nka aye.+
36 Wakwivwanije diwi dyandi tamba momwa mūlu mwanda wa kukōlola, kadi pano panshi wakumwekeje mudilo wandi mukatampe, waivwene ne binenwa byandi mu mudilo.+
37 “Abe watambile mu Edipito ku meso andi na bukomo bwandi bukatampe, mwanda aye wadi usenswe bakulutuba bobe ne kutonga lutundu* lwabo lukāya’ko.+
38 Aye wapangile ku meso obe mizo mikatampe kadi mikomo kukupita, mwanda wa kukutweja ne kukupa ntanda yabo bu bupyani, na mobikadile dyalelo.+
39 Nanshi yuka dyalelo dino’di, ne kwikilama ku mutyima’mba Yehova i Leza wa bine momwa mūlu ne pano panshi pene.+ Kekudipo mukwabo.+
40 Ufwaninwe kulama misoñanya yandi ne mbila yandi yonkusoñanya dyalelo dino’di, mwanda wa bikwendekele biyampe abewa ne bobe bana bakāya’ko, amba wikale kitatyi kilampe mu ntanda ikupa Yehova Leza obe.”+
41 Mu kine kitatyi’kya Mosesa watūla’ko bibundi bisatu ku mutamba wa kutunduka kwa Yodano.+
42 Shi muntu waipaya muntu mukwabo kwampikwa kusaka ne kadipo umushikilwe+ dibajinji, ufwaninwe kunyemena mu kibundi kimo pa bino’bi ne kupanda wapanda.+
43 Bibundi bine i bino, Bezele+ mu ntanda mutuputupu pa dilungu dya pa mutenta* kya bene Lubeni, Lamote+ mu Ngileade kya bene Ngade, ne Ngolane+ mu Bashane kya bene Manase.+
44 Bino’bi byo Bijila+ byatūdile Mosesa ku meso a bantu ba Isalela.
45 Bino’bi byo bivulujo, misoñanya, ne mutyibilo wa mambo byobapele bene Isalela kudi Mosesa pobatambile mu Edipito,+
46 mu ntanda ya Yodano, mu musanza witadidile na Bete-Peole,+ mu ntanda ya Mulopwe Shihone wa bene Amole, wadi wikele mu Heshebone,+ obanekenye kudi Mosesa ne bene Isalela pobatambile mu Edipito.+
47 Bayata ntanda yandi ne ntanda ya Oka mulopwe+ wa Bashane, balopwe babidi ba bene Amole badi mu ntanda ya kutunduka kwa Yodano,
48 tamba ku Aloele,+ udi kufulakufula kwa Musanza wa Alenona,* kufika ne ku Lūlu lwa Shiona, ko kunena’mba, Helemone,+
49 ne Alaba ense mu ntanda ya kutunduka kwa Yodano, kufika ne ku Dijiba dya ku Alaba,* munshi mwa matēlo a Pisika.+
Kunshi kwa Dyani
^ Nansha’mba “tá mutyima bininge ku muya obe.”
^ Kishima pa kishima i, “kufika ne pa mutyima wa mūlu.”
^ Kishima pa kishima i, “Binenwa Dikumi.” Biyukene ne bu Bijila Dikumi.
^ Nansha’mba “tai mutyima ku myuya yenu.”
^ Nansha’mba “bupyani bwandi.”
^ Tala Nshintulwilo ya Bishima.
^ Nansha’mba “matompo.”
^ Kishima pa kishima i, “lukunwa.”
^ Nansha’mba “nzaba ya peulu.”
^ Nansha’mba “Kinekaneka kya Alenona.”
^ Ko kunena’mba, Dijiba dya Mwepo, nansha Dijiba Difwe.
