Kupituluka mu Bijila 26:1-19
26 “Mwenda mafuku shi ubatwela mu ntanda ikupa Yehova Leza obe bu bupyani kadi wiiyate ke yobe koshikete’mo,
2 ukayata’ko byangulwa bibajinji bya mwangulo* obe onso wa nshi, byokakongakanya mu ntanda yobe ikupa Yehova Leza obe, ukebyela mu kilala ne kwenda ku kifuko kitonga Yehova Leza obe kwikala’po dijina dyandi.+
3 Ukenda kudi kitobo mwine ukengila mu mene mafuku’a ne kumunena’mba, ‘Dyalelo nalombola Yehova Leza obe amba, naiya mu ntanda yatyipile Yehova kudi bakulutuba betu kwitupa’yo.’+
4 “Penepa kitobo ukayata kilala mu kuboko kobe ne kwikitūla kumeso kwa kisōkelo kya Yehova Leza obe.
5 Ebiya ukanena ku meso a Yehova Leza obe amba, ‘Tata wadi mwine Alamia+ ulumbakana* kadi watūkīle ku Edipito,+ waikala’ko bu mweni, na bantu batyetye ba mu njibo yandi.+ Ino kwine’kwa waikala ke muzo mukatampe, mukomokomo kadi wa bantu bangi.+
6 Bene Edipito betususwile ne kwitumwesha malwa kadi betumuna bupika bwa malwa.+
7 Penepo twaanza kudidila Yehova, Leza wa bakulutuba betu, Yehova nandi waivwana diwi dyetu, wamona malwa etu, makambakano etu ne masusu etu.+
8 Mfulo mfulō, Yehova wetutambija mu Edipito na kuboko kwa bukomo ne kuboko kōlole+ ne na bilongwa bilenga moyo ne na biyukeno ne bingelengele.+
9 Kupwa wetuselela ku kino kifuko ne kwitupa ino ntanda, ntanda ikuka mabele ne būki.+
10 Pano naleta byangulwa bibajinji bya nshi yaumpele Yehova.’+
“Ufwaninwe kwibitūla ku meso a Yehova Leza obe ne kufukata ku meso a Yehova Leza obe.
11 Ebiya ukasangela bintu byonso biyampe bikupele Yehova Leza obe abe ne ba mu njibo yobe, abe ne mwine Levi ne mweni wa kibundi udi mu bukata mwenu.+
12 “Shi ubapu kuyata kipindi kimo kya pa bipindi dikumi+ bya mwangulo obe mu mwaka wa busatu, mwaka wa kipindi kimo kya pa bipindi dikumi, ukapa’kyo mwine Levi, ne mweni wa kibundi, ne mwana wampikwa shandi* ne mukaji wa kishala, kadi bakadīla’kyo mu bibundi* byobe+ ne byobekuta.
13 Ebiya ukanena ku meso a Yehova Leza obe amba, ‘Natambija kipindi kijila mu njibo yami, nape’kyo mwine Levi, ne mweni wa kibundi, ne mwana wampikwa shandi ne mukaji wa kishala+ enka mowaunsoñaninye, nkijilwilepo mbila yobe nansha kwiipēlula.
14 Nkyadile’kyopo ponadi mu madilo nansha kutalula’kyo ponadi wa disubi, nansha kupāna’kyo mwanda wa bafwe. Nakōkele diwi dya Yehova Leza wami kadi nalongele byonso byowaunsoñenye.
15 Pano tala tamba mu madiulu, kīkalo kyobe kijila, wesele bantu bobe Isalela ne ntanda yowetupele,+ monka mowatyipīle’kyo bakulutuba betu,+ ntanda ikuka mabele ne būki.’+
16 “Dyalelo dino’di Yehova Leza obe wakusoñanya ulonde ino misoñanya ne mutyibilo wa mambo. Ufwaninwe kwibilama ne kwibilonda na mutyima obe onso+ ne muya* obe onso.
17 Dyalelo ubatambula binenwa bya Yehova bya amba aye ukekalanga Leza obe shi unange mu mashinda andi, ulame misoñanya yandi+ ne mbila yandi+ ne mutyibilo wandi wa mambo+ ne shi wivwane diwi dyandi.
18 Kadi dyalelo Yehova watambula binenwa byenu bya amba banwe mukekalanga bantu bandi, kintu* kyandi kya pa bula,+ monka mwaemulaile’kyo, kadi amba mukalama mbila yandi yonso
19 ne amba ukemuzunzula peulu pa mizo mikwabo yonso yalongele,+ kwimupa mitendelo ne ntumbo ne nkuo shi mwilombole bu bantu bajila kudi Yehova Leza wenu,+ monka mwawalaile’kyo.”
Kunshi kwa Dyani
^ Kishima pa kishima i, “bipa.”
^ Bibwanika padi i, “ufwa.”
^ Kishima pa kishima i, “bibelo.”
^ Nansha’mba “mwanā nshiye.”
^ Tala Nshintulwilo ya Bishima.
^ Nansha’mba “kintu kya bulēme.”
