Kupituluka mu Bijila 15:1-23
15 “Ku mfulo kwa myaka isamba-ibidi yonso, ukalekela mapu.+
2 Mapu akalekelwa uno muswelo: Mwapulwa ense ukalekela mukwabo mapu amwapwile. Kakalandulapo mukwabo nansha mwanabo, mwanda kukelwa lubila lwa kulekela mapu kudi Yehova.+
3 Ubwanya kulandula mweni+ mapu, ino ufwaninwe kulekela mwanenu mapu o-onso akwapwile.
4 Inoko, kekudipo nansha umo mu bukata mwenu ufwaninwe kwikala mulanda, mwanda Yehova ukakwesela+ binebine mu ntanda ikupa Yehova Leza obe wiiyate bu bupyani,
5 ino i enka shi ukōkele binebine diwi dya Yehova Leza obe ne kulama biyampe ino mbila yonso yonkusoñanya dyalelo dino’di.+
6 Mwanda Yehova Leza obe ukakwesela enka mwaakulaile’kyo, abe ukapuja* mizo mivule, ino kukapulapo,+ kadi ukabikadila mizo mivule, ino abe keikakubikadilapo.+
7 “Shi mwanenu umo waikala ke mulanda mu bukata mwenu mu kibundi kimo kya mu bibundi byobe bya ntanda ikupa Yehova Leza obe, kokyumija mutyima obe nansha kwikala na kakama kudi mwanenu mulanda.+
8 Mwanda ufwaninwe kumubādila dikasa+ dyobe na buntu ne kumwapuja* byobya byonso byasaka nansha byabudilwe.
9 Tá mutyima kutyina wakatamija ino milangwe mibi mu mutyima obe ya amba, ‘Mwaka wa busamba-bubidi, mwaka wa kulekela mapu, ubafwena,’+ koleka kulombola buntu kudi mwanenu mulanda ne kuleka kumupa kintu. Shi adidile Yehova pa mwanda obe, bukekala bubi kodi.+
10 Ufwaninwe kumupa na buntu,+ kadi abe* kufwaninwepo kumupa na mutyima fututu, o mwanda Yehova Leza obe ukesela bilongwa byobe byonso ne mingilo yobe yonso.+
11 Mwanda mafuku onso kukekala balanda mu ntanda yobe.+ O mwanda nakusoñanya’mba, ‘Mwanenu umona malwa ne mulanda udi mu ntanda yobe, ufwaninwe kumubādila dikasa na buntu.’+
12 “Shi abakupoteja mwanenu umo mu banabenu, mwana-mulume nansha mwana-mukaji Muhebelu, kadi wakwingidila mu myaka isamba, nabya mu mwaka wa busamba-bubidi ufwaninwe kumupa bwanapabo.+
13 Kadi shi komupe bwanapabo, nabya kokamuleka ende makasa bitupu.
14 Ufwaninwe kumupa na buntu bintu bya mu mikōko yobe, kipūdilo kyobe, ne kyengelo kyobe kya māni ne kya vinyu. Ufwaninwe kumupa mungya madyese akwesele Yehova Leza obe.
15 Vuluka’mba waikele umpika mu ntanda ya Edipito ne amba Yehova Leza obe wakukūdile. O mwanda nakusoñanya kulonga kino’ki dyalelo.
16 “Ino shi wakunena’mba, ‘Nkisapo kukutaluka!’ mwanda ukusenswe abe ne ba mu njibo yobe, ke-pantu wadi na nsangaji pawadi nobe,+
17 nabya ukayata mutubulo ne kutubwila kutwi kwandi ku mulango, ebiya ukekala ke umpika obe mu būmi bwandi bonso. Ukalonga enka namino ne na umpika obe mwana-mukaji.
18 Kokibimona bu bikomo kitatyi kyomupa bwanapabo akutaluke, mwanda mingilo yaakwingidile mu myaka isamba yadi na mvubu misunsa ibidi kupita ya muntu wa kaji, kadi Yehova Leza obe wakwesele mu byonso byadi bilongwa.
19 “Ukapandula kudi Yehova Leza obe kilala-ndá kyonso kilume kya mu bañombe bobe ne mu mikōko yobe.+ Kufwaninwepo kwingila mwingilo nansha umo na kilala-ndá kya mu bañombe* bobe nansha kutenda myoya ya kilala-ndá kya mu mikōko yobe.
20 Abe ne ba mu njibo yobe mukadya’kyo ku meso a Yehova Leza obe mwaka ne mwaka mu kifuko kikatonga Yehova.+
21 Ino shi kidi na kabulema—kisunkuta, kya meso masabike, nansha kya bulema bo-bonso bukatampe—kufwaninwepo kwikilambula bu kitapwa kudi Yehova Leza obe.+
22 Ukadīla’kyo mu bibundi* byobe, ne muntu wa disubi ne wampikwa disubi mwine, monka mudīlwanga kasha nansha kasha kalume.+
23 Ino kufwaninwepo kudya mashi akyo;+ ukamwanga’o pa nshi pamo bwa mema.+
Kunshi kwa Dyani
^ Nansha’mba “ukapuja ne mulao ponka.”
^ Nansha’mba “kumwapuja ne mulao ponka.”
^ Kishima pa kishima i, “mutyima obe.”
^ Kishima pa kishima i, “ñombe.”
^ Kishima pa kishima i, “bibelo.”
