Isaya 20:1-6
-
Kiyukeno pa Edipito ne pa Efiopya (1-6)
20 Mu mwaka obatumine Talatana* ku Ashedoda+ kudi Salekona mulopwe wa Ashidia, walwile na Ashedoda wamukwata.+
2 Mu kine kitatyi’kya Yehova wanena kupityila kudi Isaya+ mwanā Amoze amba: “Enda, vūla sāka mu kifuka kyobe, ne bikwabilo ku maulu obe.” Nandi walongela monka, wananga mutaka* kadi ku maulu pululu.
3 Penepo Yehova wanena’mba: “Monka mwanangila Isaya mwingidi wami mutaka kadi ku maulu pululu myaka isatu bu kiyukeno+ ne kilomboji padi Edipito+ ne Efiopya,+
4 mulopwe wa Ashidia nandi ukendeja misungi ya Edipito+ ne misungi ya Efiopya, banuke bana-balume ne banunu, mutaka kadi ku maulu pululu, matako pa ntanda, mutaka wa* Edipito.
5 Kadi bakatuyuka ne kufwijibwa bumvu pa mwanda wa Efiopya lukulupilo lwabo ne Edipito mitatulo yabo.*
6 Bekadi ba ino ntanda ya kwijiba bakanena mu dyodya difuku amba, ‘Talangai byafikila lukulupilo lwetu, kotwanyemēne amba etukwashe ne kwitukūla kudi mulopwe wa Ashidia! Le pano tukapanda namani?’”
Kunshi kwa Dyani
^ Nansha’mba “mukata wa basola.”
^ Nansha’mba “muvwale bityetye.”
^ Nansha’mba “mwanda wa bumvu bwa.”
^ Nansha’mba “wa buya bobatendela.”
