Isaya 17:1-14
17 Musapu mubi pa Damakasa:+
“Tala! Damakasa kakekalapo bu kibundi monka,Kadi ukekala ke mulwi wa masala.+
2 Bibundi bya Aloele+ bikashibwa;Bikekala ke bifuko bya kulāla’mo luombeMwampikwa muntu nansha umo wa kwilukwatyija moyo.
3 Bibundi bikomejibwe bikajimina mu Efelaimi,+Ne bulopwe nabo mu Damakasa;+Kadi boba bashele’ko ba ShideaBakekala pamo bwa ntumbo ya bene Isalela,”* i Yehova wa bibumbo unena.
4 “Mu dyodya difuku ntumbo ya Yakoba ikatyepa,Kadi ngitu yandi mikomo nkē* ikanyana tē.
5 Kikekala’nka bwa mwangudi ukongakanya miseke ya mu budimiKadi kuboko kwandi kwangula bisansa bya miseke,Pamo’nka bwa muntu ukōkolola miseke mu Musanza* wa Lefaime.+
6 Enka bya kukōkolola byo bikashala,Pamo’nka bwa umpafu mukukulwe:
Kushalanga enka mpafu ibidi nansha isatu myele ku musambo wa ntengwa,Enka iná nansha itano ku misambo yao ipanga bipa,”+ i Yehova Leza wa Isalela unena.
7 Mu dyodya difuku muntu ukatala kudi Mulongi wandi, kadi meso andi akabambila Mwine Ujila wa Isalela.
8 Kakatalepo ku bisōkelo,+ mwingilo wa makasa andi;+ kadi kakabambilapo meso ku byobya bilongele minwe yandi, ekale bipanda bikola* nansha bisōkelo bya ensense.
9 Mu dyodya difuku bibundi byandi bya nsakwa mikomo bikekala pamo bwa kifuko kishibwe mu ntanda ya mityi,+Pamo bwa musambo mushibwe ku meso a bene Isalela;Kikekala ke mu ntanda mutuputupu.
10 Mwanda ubailwa Leza+ wa lupandilo lobe;Ubakomenwa kuvuluka Dibwe+ dya nsakwa yobe mikomo.
O mwanda ubakune bikunanwa bilumbuluke*Ne kwibitūla pamo na mutombo wa mweni.*
11 Dyuba usaanga senene lusao mu bikunanwa byobe,Lubanga umeneja nkunwa yobe,Ino mwangulo ukajimina mu difuku dya misongo ne misanshi keipu.+
12 Teja! Kudi kavutakanya ka bantu bangi,Bakambakanibwa pamo bwa majiba!
Kudi lupotopoto lwa mizo,Ivwanwa pamo bwa kutūta kwa mema makomo!
13 Mizo ikalenga lunwa pamo bwa kutūta kwa mema mangi.
Aye ukeifunina, nayo ikanyemena kulampe,Ikapepulwa na luvula pamo bwa mfumba ya pa ngulu,Pamo bwa pimbye winyenga mu luvula lwa kimpumpu.
14 Kyolwa kudi luzakalo.
Kumeso kwa kukya lubanga kebakidi’kopo.
Kino’ki kyo kipindi kya boba betwibaNe kyepelo kya boba betutūta.
Kunshi kwa Dyani
^ Kishima pa kishima i, “bana ba Isalela.”
^ Kishima pa kishima i, “māni a umbidi wandi.”
^ Nansha’mba “Dilungu dya Musanza.”
^ Tala Nshintulwilo ya Bishima.
^ Nansha’mba “bisangaja.”
^ Nansha’mba “leza wa kungi.”
