Ezekyele 5:1-17
5 “Ino abe, mwanā muntu, yata kipete kya bui wikingidije pamo bwa bwembe bwa yewa utendanga. Witende ku mutwe obe ne myevu yobe, kupwa usele bipimo bya kupima nabyo ne kwabanya nywene bipindibipindi.
2 Kipindi kimo kya pa bipindi byayo bisatu ukekisōka munda mwa kibundi shi mafuku a kasāla abapu.+ Kupwa ukasela kipindi kikwabo kya pa bipindi bisatu, wikitape na kipete kufulakufula konso kwa kibundi,*+ ino kipindi kya mfulo kya pa bipindi bisatu ukekikusankanya mu luvula, ebiya ami nkasomona kipete kya kwibalonda.+
3 “Ukayata ne bipindi bityetye byayo, wibivungile mu kivwalwa* kyobe.
4 Kadi ukasela’ko imo wiyele mu mudilo wiisōke fututu. Enka nenki, mudilo ukasambakana ku njibo yonso ya Isalela.+
5 “Mfumu Mwinē Lupusa Lonso Yehova wanena namino amba: ‘Uno’u i Yelusalema. Namutūla mu bukata mwa mizo, matanda mamujokoloke konsokonso.
6 Ino aye watombokela mutyibilo wami wa mambo ne bitungo byami, walonga bibi kupita mizo ne matanda amujokolokele.+ Mwanda abapele mutyibilo wami wa mambo kadi kebanangīlepo mu bitungo byami.’
7 “O mwanda Mfumu Mwinē Lupusa Lonso Yehova wanena namino amba: ‘Byowakambakenye bininge kupita mizo ikujokolokele kadi kwanangīlepo mu bitungo byami nansha kulonda mutyibilo wami wa mambo, ino walondele mutyibilo wa mambo wa mizo ikujokolokele,+
8 Mfumu Mwinē Lupusa Lonso Yehova wanena namino amba: “A kibundi,+ nsa kulwa nobe kadi nsa kufikidija butyibi mu bukata mobe ku meso a mizo.+
9 Nsa kukulonga kintu kyonkyalongele kashā, kadi kyonkikalongapo monka, pa mwanda wa bilongwa byobe byonso bya munyanji.+
10 “‘“O mwanda bashabana bakadya babo bana,+ bana nabo bakadya bashabo, kadi nkafikidija butyibi mu bukata mobe ne kupalakenya bonso bashele kodi ku mitamba yonso.”’*+
11 “‘Bine nanshi ne byondi mūmi,’ i Mfumu Mwinē Lupusa Lonso Yehova unena, ‘byomwasubije kipandulwe kyami na bilezaleza byenu bya mukenye ne na bilongwa byenu byonso bya munyanji,+ nami nkemupela;* diso dyami kedikemwivwaninapo bulanda kadi nkikemufwilapo lusa nansha dimo.+
12 Kipindi kyobe kimo kya pa bipindi bisatu kikafwa ku kipupo kya misongo* nansha koneka mu bukata mobe na kipupo kya nzala. Kipindi kikwabo kya pa bipindi bisatu kikapona kufulakufula kobe konso na kipete.+ Nkapalakenya ku mitamba yonso* kipindi kya mfulo kya pa bipindi bisatu, kadi nkasomona kipete kya kwibalonda.+
13 Penepo bulobo bwami bukafika ku mfulo, kadi bukalabale bonemukalabela bukatūka, nami nkasangala.+ Kadi bakayuka’mba ami, Yehova, nesambe amba nsaka kulamatwa bunka,+ shi napu kwibapungulwila bukalabale bwami.
14 “‘Nkakwalamuna kodi kifuko kisalwe ne kintu kya kutukibwa mu mizo ikujokolokele ne mu meso a bapityeshinda bonso.+
15 Ukekala kintu kya kutukibwa ne kuzobejibwa,+ kimfwa kya kudyumukila’po ne nzuba ku mizo ikujokolokele, shi nafikidija podi butyibi na bulobo, na bukalabale ne na mfuto ya bukalabale. Ami, Yehova, nesambe’kyo.
16 “‘Nkebatumina miketo ya lufu ya kipupo kya nzala ya kwibonakanya. Miketo yontuma ikemonakanya.+ Nkemubipijija bininge kipupo kya nzala na kutalula bibīko byenu bya byakudya.*+
17 Nkemutumina kipupo kya nzala ne banyema ba ntanda ba budyani,+ bakakwipaila bana. Kipupo kya misongo ne kumwanga mashi bikakulēmenena, kadi nkakuletela kipete.+ Ami, Yehova, nesambe’kyo.’”
Kunshi kwa Dyani
^ Kishima pa kishima i, “kwandi.”
^ Nansha’mba “kunshi kwa kivwalwa.”
^ Kishima pa kishima i, “ku mvula yonso.”
^ Nansha’mba “nkemutyepeja.”
^ Nansha’mba “misongo.”
^ Kishima pa kishima i, “ku mvula yonso.”
^ Kishima pa kishima i, “kutyumuna mikombo yobe ya mikate.” Ifunkila padi pa mikombo yadi ingidijibwa pa kubīka mikate.
