Kudi Bene Ngalatea 6:1-18
6 Banwe banabetu, nansha shi muntu wasāsuka kumeso kwa aye kujingulula’kyo, banwe babwenye bisakibwa ku mushipiditu tompai kōlola yao muntu na mushipiditu wa butūkanye.+ Ino tadija+ kutyina’mba ne abe mwine wakatompibwa.+
2 Mwiselejei’ko nyeke biselwa bilēma,+ nabya mukafikidija kijila kya Kidishitu.+
3 Mwanda shi muntu ulanga’mba i muntu mwinemwine aye’ko wa bitupu,+ wiongolanga aye mwine.
4 Ino muntu ne muntu abandaule bilongwa byandi,+ nabya ukekala na buluji bwa kusangela pa mwanda wandi aye mwine, ke na kwidingakanyapo na muntu mukwabo, aa.+
5 Mwanda muntu ne muntu ukeselelanga kiselwa* kyandi.+
6 Ne kadi, yewa ense ufundijibwa* mwanda, eabile bintu byonso biyampe na yewa umufundija.*+
7 Kemwakyongolwai: Leza kabengwepo kibengo. Mwanda kyokya kikuna muntu shi kika shi kika, e kyonka kyakangula;+
8 mwanda yewa ukuna pa mwanda wa ngitu yandi ukangulanga bubole ku ngitu yandi, ino yewa ukuna pa mwanda wa mushipiditu ukangulanga būmi bwa nyeke ku mushipiditu.+
9 Nanshi ketwakilekai’byo kulonga bilumbuluke, mwanda pa kitatyi kifwaninwe tukangulanga shi ketupūngilepo.*+
10 O mwanda nanshi, ponso potumona mukenga,* tulongelei bantu bonso biyampe, ino kutabukidila boba botubutulwa nabo mu lwitabijo.
11 Talai byonemulembela na masomo makatampe na kuboko kwami.
12 Boba bonso basaka kwimwekeja biyampe mu ngitu* e bo bakimba kwimuningila mutwele kwisao, baloñanga namino kutyina’mba bakapangwapangwa pa mwanda wa mutyi wa masusu* wa Kidishitu.
13 Mwanda enka ne boba batwela kwisao bene kebalamangapo Bijila,+ ino basakanga banwe mutwejibwe kwisao amba bamone kwitumbija pa mwanda wa ngitu yenu.
14 Ino ami nkyaketumbijapo nansha dimo, poso’nka pa mutyi wa masusu* wa Mfumwetu Yesu Kidishitu,+ padi aye ino ntanda yaipailwe* pa mwanda wami, ami nami pa mwanda wa ino ntanda.
15 Mwanda disao ne kubulwa disao ke kintupo kikatampe,+ ino kipangwa kipya kyo kintu kikatampe.+
16 Nanshi bonso banangila mu ndudi mwendele kino kijila bekale na ndoe ne lusa, en-en, kudi Isalela wa Leza.+
17 Tamba pano muntu kakinkambakanya, mwanda ngidi na biyukeno bya bu umpika wa Yesu pa umbidi wami.+
18 Kanye ka ku buntu bitupu ka Mfumwetu Yesu Kidishitu kekale na mushipiditu omulombola, banwe banabetu. Amena.
Kunshi kwa Dyani
^ Nansha’mba “kiselwa kya mingilo.”
^ Nansha’mba “ufundijibwa ku kanwa.”
^ Nansha’mba “umufundija ku kanwa.”
^ Nansha’mba “ketulekele’byopo.”
^ Kishima pa kishima i, “kitatyi kifwaninwe.”
^ Nansha’mba “basaka kumweka bu bayampe.”
^ Tala Nshintulwilo ya Bishima.
^ Tala Nshintulwilo ya Bishima.
^ Nansha’mba “yaipailwe ku mutyi wa masusu.”
