Bilongwa bya Mafuku wa Bubidi 5:1-14
5 Enka nenki Solomone wavuya mingilo yonso yaadi unenwe kwingila pa mwanda wa njibo ya Yehova.+ Kupwa Solomone watweja bintu byapandwile+ shandi Davida, kadi watūla ndalama, olo, ne bintu byonso mu bibīko bya byabulēme bya njibo ya Leza wa bine.+
2 Mu kine kitatyi’kya Solomone wakongakanya bakulumpe ba Isalela, mitwe yonso ya bisaka, bamfumu ba mobo a bashandya bene Isalela. Baiya ku Yelusalema kusela sanduku wa kipwano kya Yehova ku Kibundi kya Davida,+ ko kunena’mba, Ziona.+
3 Bantu bonso ba Isalela bebunga ku meso a mulopwe ku masobo* asobwanga mu kweji wa busamba-bubidi.+
4 Ebiya bakulumpe bonso ba Isalela baiya, bene Levi nabo batekuna Sanduku.+
5 Bakandija Sanduku, ne pema wa kubungakena’ko,+ ne bipungwa byonso bijila byadi mu pema. Babitobo ne bene Levi* bakanda nabyo.
6 Mulopwe Solomone ne kitango kyonso kya Isalela kyaityilwe kwitana nandi badi ku meso a Sanduku. Penepo balambula bitapwa+ bivule mpata bya mikōko ne bañombe kebibwanyapo kuyukwa bungi nansha kubalwa.
7 Kupwa babitobo bakatūla sanduku wa kipwano kya Yehova pa kifuko kyayo, mu kyumba kya munda bininge kya njibo, mu Kijila Nakampata, munshi mwa mapapa a bakelubi.+
8 Penepo mapapa a bakelubi adi mabāle pangala pa kifuko kyadi’po Sanduku, enka nenki bakelubi badi bapūte Sanduku ne mitembo yayo+ dya pangala.
9 Mitembo yadi milampe bininge o mwanda nsongo ya mitembo yadi imweka mu Kijila kumeso kwa kyumba kya munda bininge, inoko keyadipo imweka panja. Kadi ikidi’ko ne dyalelo.
10 Mu Sanduku kemwadipo kintu, ino mwadi’nka bipāpo bibidi byatūdile’mo Mosesa ku Holeba,+ pāsambile Yehova kipwano+ na bantu ba Isalela pobādi batamba mu Edipito.+
11 Babitobo pa kutamba mu kifuko kijila (mwanda babitobo bonso badi’po badi bepandule,+ nansha shi i ba mu kibumbo’ka),+
12 batuimba+ bonso bene Levi badi batalwa na Asafa,+ Hemana,+ Yedutuna,+ ne na babo bana ne banababo badi bavwele mbwija milumbuluke, bakwete membo, byombanwa bya myonji, ne nsense; badi bemene kutunduka kwa kisōkelo, kadi badi pamo na babitobo 120 badi bēla bimpungidi.+
13 Boba bēla bimpungidi ne batuimba pobadi batendela ne kufwija Yehova mwa kimo, ne padi pakanda mawi a mu bimpungidi, membo, ne byombanwa bikwabo bya ñimbo pobadi batendela Yehova amba, “mwanda i muyampe; buswe bwandi bwa ndamatyidile bulādilanga nyeke,”+ ponkapo dikumbi dyayula mu njibo, ke njibo ya Yehova kadi.+
14 Babitobo bakomenwa kwimana kwingila pa mwanda wa dikumbi’dya, mwanda ntumbo ya Yehova yayudile mu njibo ya Leza wa bine.+
